އައްޑޫ ސިޓީ ހިތަދޫގައި 'އަހަންނަކީ ނޫސްވެރިއެއް' ޕްރޮގްރާމް ފަށައިފި

އައްޑޫ ސިޓީ ހިތަދޫގައި 'އަހަންނަކީ ނޫސްވެރިއެއް' ޕްރޮގްރާމް ފަށައިފިއެވެ. މިއީ ޒުވާނުން ބާރުވެރިކުރުވުމާއި މަޢުލޫމާތާއި ފަންނާ ބެހޭ ވުޒާރާއިން އިސްނަގައިގެން ކުރިއަށްގެންދާ ޕްރޮގްރާމެކެވެ.

މި ޕްރޮގްރާމްގެ މަޤްޞަދަކީ، ރާއްޖޭގެ މުޖްތަމަޢުގައި ހިނގާ އެކި ކަންކަމަށް ޒުވާނުންގެ މެދުގައި ހޭލުންތެރިކަމާއި ފާޑުކިޔުންތެރި ވިސްނުން ކުރިއެރުވުމެވެ. އައްޑޫގައި ފެށި ތަމްރީން ޕްރޮގުރާމް ކުރިއަށްދާނީ 3 ދުވަހުގެ މުއްދަތަކަށެވެ. މި ޕްރޮގުރާމްގައި އައްޑޫ ސިޓީގެ އެކި ރަށްތަކުން ޖުމްލަ 37 މީހުން ބައިވެރިވާއިރު، އޭގެ ތެރޭގައި ކައުންސިލް އިދާރާއާއި ސަރުކާރު އެކި އިދާރާތަކުގެ މުވައްޒަފުންނާއި މި ސަރަޙައްދުގައި ހިންގާ އޮންލައިން ނޫސްތައް ހިމެނެއެވެ.

ޒުވާނުން ބާރުވެރިކުރުވުމާއި މަޢުލޫމާތާއި ފަންނާބެހޭ ވުޒާރާގެ ސްޓޭޓް މިނިސްޓަރ ޢަލީ ޝަމްޢާން ވިދާޅުވީ، އައްޑޫގައި ކުރިއަށްދާ ޕްރޮގްރާމްގައި މައިގަނޑު ގޮތެއްގައި އަލިއަޅުވާލާނީ ޚަބަރު ފެތުރުމާއި ޚަބަރު ފެތުރުމުގައި ޒިންމާދާރު ވާންވީ ގޮތްތަކާއި އަޚްލާޤީ މިންގަނޑުތަކަކުގެ މައްޗަށް ކަމަށެވެ.

ސޯޝަލް މީޑިއާ އެކި މަންސަތަކުގައި ގިނަ ބަޔަކު ހަރަކާތްތެރިވާ މުޖްތަމައުއެއް އޮތް ތަނެއްމީ. އެހެންވީމައި އެންމެން ވެސް ރައްކާތެރިވާންޖެހޭ ފެތުރޭ ޚަބަރާއި ޚަބަރު ފެތުރުމުގައި މައިގަނޑުގޮ ތެއްގައި އެކަމުގެ މައްޗައް އަލި އަޅުވާލާ ސެޝަންތައް ކުރިއަށް ގެންދާނީ.

ޢަލީ ޝަމްޢާން ވިދާޅުވިއެވެ.

'އަހަންނަކީ ނޫސްވެރިއެއް' އަކީ ތަޢުލީމީ އަދި މުޖުތަމަޢު ބިނާކޮށް ހިންގާ ޕްރޮގްރާމްތަކުގެ ތެރެއިން ދިވެހި ޒުވާނުން ބާރުވެރިކުރުވުމަށް ސަރުކާރުން ކުރަމުންދާ މަސައްކަތުގެ ބައެކެވެ. އަދި ކުރިއަށް އޮތް ތަނުގައި އިތުރު ރަށްރަށަށް ވެސް މި ޕްރޮގްރާމް ތަޢާރަފް ކުރުމަށް ޒުވާނުން ބާރުވެރިކުރުވުމާއި މަޢުލޫމާތާއި ފަންނާ ބެހޭ ވުޒާރާއިން ވަނީ ރާވާފައެވެ. 

އައްޑޫސިޓީގައި ކުރިއަށް ގެންދާ ޕްރޮގްރާމަކީ، އަތޮޅުތަކުގައި މިގޮތަށް ކުރިއަށްގެންދާ 4 ވަނަ ޕްރޮގުރާމެވެ. މީގެ ކުރިން، މާލެ ، ފުވައްމުލައް، ރ. އަތޮޅުގައި މި ޕްރޮގްރާމް ކުރިއަށް ގެންގޮސްފައިވެއެވެ.