ފުރަތަމަ ކޮމަންވެލްތު ބީޗް ހޭންޑްބޯޅަ މުބާރާތުގެ ތަށި ޕާކިސްތާނަށް، ރާއްޖެއަށް ލޯ މެޑެލް!

ފުރަތަމަ ފަހަރަށް ރާއްޖޭގައި ބޭއްވި ކޮމަންވެލްތު ބީޗް ހޭންޑްބޯޅަ މުބާރާތުގެ ޗެމްޕިއަންކަން، ފައިނަލުގައި ސްރީ ލަންކާ ބަލިކޮށް ޕާކިސްތާނުން ހޯދައިފިއެވެ. މި މުބާރާތުގައި ރާއްޖެއިން ވަނީ ލޯ މެޑެލް ހާސިލުކޮށް، ގައުމީ ކުޅިވަރުގެ ތާރީޚީ ކާމިޔާބީއެއް ހޯދާފައެވެ.

ކުޅުދުއްފުށި ސިޓީގައި ގާއިމުކޮށްފައިވާ ބައިނަލްއަގުވާމީ ފެންވަރުގެ ބީޗް ހޭންޑްބޯޅަ ކޯޓުގައި މިރޭ ކުޅުނު ފައިނަލް މެޗު ޕާކިސްތާނުން ކާމިޔާބުކުރީ ސްރީ ލަންކާ އަތުން ސީދާ ދެ ސެޓުންނެވެ. ޕާކިސްތާނުން މި މެޗުގެ ސެޓުތައް ގެންދިޔައީ 26-18 އަދި 28-18 ގެ ހަމަޖެހޭ ނަތީޖާއަކުންނެވެ.
މި މުބާރާތުގެ ލޯ މެޑެލް ރާއްޖެއިން ހޯދީ، ބަންގްލަދޭޝް އަތުން 2-1 ސެޓުން މޮޅުވެގެންނެވެ. މީގެ އިތުރުން ފަސްވަނަ ހޯދި އިންޑިއާއިން ވަނީ ރޭންކިން މެޗުގައި ދެކުނު އެފްރިކާ ބަލިކޮށްފައެވެ. އެ މެޗު އިންޑިއާއިން ކާމިޔާބުކުރީ 2-1 ސެޓުންނެވެ.

ކޮމަންވެލްތުގެ ގައުމުތަކަށް ދައުވަތުދީގެން ބޭއްވި މި ތާރީޚީ މުބާރާތުގައި ޖުމްލަ ހަ ޓީމެއް ވާދަކުރިއެވެ.  މި މުބާރާތް ކާމިޔާބުކަމާއެކު ނިންމާލުމާއެކު، ކުޅުދުއްފުށީގެ ބައިނަލްއަގުވާމީ ކޯޓުގެ ފެންވަރު ދުނިޔެއަށް ހާމަވެގެން ގޮސްފައިވާ ކަމަށް ގިނަ ބަޔަކު ދެކެއެވެ.