2026 އިން ފެށިގެން ކައުންސިލްތަކަށް ކަރަންޓު ބިލު ޑޮމެސްޓިކް ރޭޓުން، ލާމަރުކަޒީ ނިޒާމު ކުރިއެރުވުމަށް ބޮޑު ލުޔެއް!

ރާއްޖޭގެ ލާމަރުކަޒީ ނިޒާމު އިތުރަށް ހަރުދަނާކޮށް، ކައުންސިލްތަކަށް މާލީ މިނިވަންކަން ދިނުމުގެ ގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މުހިންމު ނިންމެވުމެއް ނިންމަވައިފިއެވެ. އެގޮތުން، ރާއްޖޭގެ ހުރިހާ ސިޓީތަކާއި ރަށްރަށުގެ އާންމު ތަންތަނާއި މަގުތައް ދިއްލުމަށް ހޭދަވާ ކަރަންޓަށް ކައުންސިލްތަކަށް ބިލުކުރާނީ ޑޮމެސްޓިކް ރޭޓުން ކަމަށް ރައީސުލްޖުމްހޫރިއްޔާ ވަނީ ނިންމަވާފައެވެ. މި ބަދަލު ޢަމަލުކުރަން ފަށާނީ އަންނަ އަހަރުގެ ޖެނުއަރީ މަހުގެ އެކަކުން ފެށިގެންނެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިކަން ހާމަކުރެއްވީ އެމަނިކުފާނު ސޯޝަލް މީޑިއާ މެދުވެރިކޮށް ހިއްސާކުރެއްވި ޕޯސްޓެއްގައެވެ. އެމަނިކުފާނު ވިދާޅުވީ، މިހާރު ފެނަކަ ކޯޕަރޭޝަން ނުވަތަ ސްޓެލްކޯއިން ކައުންސިލްތަކަށް އާންމު ތަންތަނާއި މަގުތައް ދިއްލުމަށް ހޭދަވާ ކަރަންޓަށް ބިލުކުރަނީ ވިޔަފާރިތަކަށް ބިލުކުރާ ރޭޓުތަކުގައި ކަމަށެވެ. މީގެ ސަބަބުން ކަރަންޓު ބިލު ބޮޑުވެ، ބައެއް ކައުންސިލްތަކަށް އެ ބިލުތައް ދައްކަން ދަތިތަކާ ކުރިމަތިލާން ޖެހޭ ކަމަށެވެ.

ރައީސްގެ މި ނިންމެވުމާއެކު، ކައުންސިލްތަކަށް އާންމު ތަންތަނާއި މަގުތައް ދިއްލުމަށް ކުރާ ހޭދަ އެތައް ގުނައެއް ކުޑަވެގެންދާނެއެވެ. މިކަމުގެ ސަބަބުން، ކައުންސިލްތަކަށް އެހެނިހެން މުނިސިޕަލް ޚިދުމަތްތަކަށް ޚަރަދުކުރުމަށް ލިބޭ ފައިސާގެ ޢަދަދު ބޮޑުވެގެންދާނެ ކަމަށް ރައީސް ފާހަގަކުރެއްވިއެވެ. މި ބަދަލަކީ ލާމަރުކަޒީ ނިޒާމު އިތުރަށް ތަރައްގީކޮށް، ރައްޔިތުންނާ ގާތުން ޚިދުމަތްދިނުމަށް އެޅޭ ވަރަށް މުހިންމު ފިޔަވަޅެކެވެ.

މި ބަދަލުގެ އިތުރުންވެސް ލާމަރުކަޒީ ނިޒާމު ހަރުދަނާ ކުރުމަށްޓަކައި އެތައް ކަމެއް ނިންމަވާފައިވާ ކަމަށް ރައީސުލްޖުމްހޫރިއްޔާ ވިދާޅުވިއެވެ. އަންނަ އަހަރުގެ ބަޖެޓާއެކު މިކަންކަން ޢަމަލުކުރަން ފެށުމަށް ނިންމަވާފައިވެއެވެ. އެގޮތުން:

• ކައުންސިލްތަކަށް ސަރުކާރުން ދޭ ޢާންމު ހިލޭ އެހީގެ ފައިސާ (ބްލޮކް ގްރާންޓް) ފޯރުކޮށްދިނުމަށްޓަކައި ކަނޑައަޅާފައިވާ ފިސްކަލް ފޯރމިއުލާ މުރާޖާކުރުމަށް ނިންމަވާފައިވެއެވެ. މިހާރުގެ ފޯރމިއުލާގައި އާބާދީ ކުޑަ ރަށްތަކަށް ލިބޭ މިންވަރު މަދުކަން ފާހަގަކުރެވޭތީ، މުރާޖާކުރުމުގައި ރަށުގެ ބޮޑުމިނަށް ރިޢާޔަތްކުރެވޭ ގޮތަށް ބަދަލުކުރާނެއެވެ. މި ބަދަލާއެކު 2026 ވަނަ އަހަރުގެ ބަޖެޓު ހުށަހެޅުމަށް ވަނީ ނިންމަވާފައެވެ.
• ރަށްރަށުގެ އަންހެނުންގެ ތަރައްގީއަށް މަސައްކަތް ކުރާ ކޮމިޓީ (ޑަބްލިއު.ޑީ.ސީ) ގެ ބަޖެޓް ދެގުނަ ބޮޑުކުރެއްވުމަށް ނިންމަވާފައިވެއެވެ.
• ޑަބްލިއު.ޑީ.ސީގެ މެންބަރުންނަށް ލިބޭ ރަމަޟާން މަހުގެ އެލަވެންސަކީ ކައުންސިލް ބަޖެޓުން ލިބޭ އެއްޗެއްގެ ގޮތުގައި ހަމަޖައްސާފައިވެއެވެ.
• ރައީސުލްޖުމްހޫރިއްޔާގެ މި ނިންމެވުންތަކުގެ ސަބަބުން، ކައުންސިލްތަކުގެ މާލީ ހާލަތު ރަނގަޅުވެ، ރައްޔިތުންނަށް ދެވޭ ޚިދުމަތްތައް ހަރުދަނާވެ، ރާއްޖޭގެ ލާމަރުކަޒީ ނިޒާމަށް އިތުރު ބާރެއް ލިބިގެންދާނެކަމަށް ބެލެވެއެވެ.

ލާމަރުކަޒީ ނިޒާމު އިތުރަށް ތަރައްޤީ ކުރުމަށް ކުރެވޭ ކަންކަމުގެ ތެރެއިން، ޖެނުއަރީ 1، 2026 އިން ފެށިގެން،ރާއްޖޭގެ ހުރިހާ ސިޓިތަކާއި ރަށްރަށުގައި މަގުތަކާއި ޢާއްމު ތަންތަން ދިއްލުމަށް ކައުންސިލް ތަކަށް ފެނަކަ/ސްޓެލްކޯ އިން ބިލް ކުރާނީ ޑޮމެސްޓިކް ރޭޓުން. ނަތީޖާއެއްގެ ގޮތުން…

— Dr Mohamed Muizzu (@MMuizzu) September 8, 2025