ރާއްޖޭގެ ފަތުރުވެރިކަމުގެ ބާނީ، މުޙައްމަދު ޢުމަރު މަނިކު އަވަހާރަވުމުން ނައިބު ރައީސް ތަޢުޒިޔާ ވިދާޅުވެއްޖެ

ރާއްޖެއަށް ފަތުރުވެރިކަން ތަޢާރަފްކޮށް، އެ ސިނާއަތް ކުރިއެރުވުމަށް ގިނަ ޚިދުމަތްތަކެއް ކޮށްދެއްވި، ނިޝާން މުލީގޭ ޝަރަފުގެ ޢިއްޒަތުގެ ވެރިޔާ އަލް މަރުޙޫމް މުޙައްމަދު ޢުމަރު މަނިކު (އެމް.ޔޫ. މަނިކު) އަވަހާރަވުމާއި ގުޅިގެން ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފް ތަޢުޒިޔާ ވިދާޅުވެއްޖެއެވެ.

ނައިބު ރައީސް ޙުސައިން މުޙައްމަދު ލަޠީފް މީސް މީޑިޔާގައި ޙިއްސާކުރެއްވި ޕޯސްޓެއްގައި ވިދާޅުވީ، ރާއްޖެއަށް ފަތުރުވެރިކަން ތަޢާރަފުކޮށް ގިނަގުނަ ކުރިއެރުންތައް ގެނެސްދެއްވި ނިޝާން މުލީގޭ ޝަރަފުގެ ޢިއްޒަތުގެ ވެރިޔާ މުޙައްމަދު ޢުމަރު މަނިކު  އަވަހާރަވި ޚަބަރު އެހީ ނުހަނު ފުން ހިތާމައާ އެކު ކަމަށެވެ.އަދި ނައިބު ރައީސް ވިދާޅުވީ، މަރުޙޫމްގެ ލޮބުވެތި ޢާއިލާއަށް އިޚުލާޞްތެރިކަމާއެކު ތަޢުޒިޔާ ދަންނަވާ ކަމަށެވެ. މީގެ އިތުރުން، މާތްﷲ މަރުޙޫމްގެ ފުރާނަފުޅު ޖަންނަތުލް ފިރުދައުސްގައި ލެއްވުމަށް އެދި ނައިބު ރައީސް ވަނީ ދުޢާ ދަންނަވާފައެވެ.

އެމް.ޔޫ. މަނިކު އަވަހާރަވީ، ސިއްޙީ ޙާލުކޮޅު ދެރަވެ، ފަރުވާދެމުންދަނިކޮށް، ސިންގަޕޫރުގައި ރޭގެ ވަގުތެއްގައެވެ. އަވަހާރަވިއިރު އުމުރުފުޅުން 78 އަހަރުފުޅެވެ. އެމަނިކުފާނުގެ ޖަނާޒާ ބޭއްވުމަށް ހަމަޖެހިފައިވަނީ މިއަދު އަސުރު ނަމާދަށްފަހު ސިންގަޕޫރުގައެވެ.

إِنَّا لِلَّٰهِ وَإِنَّا إِلَيْهِ رَاجِعُونَ

ދިވެހިރާއްޖެއަށް ފަތުރުވެރިކަން ތަޢާރަފްކޮށް ގިނަގުނަ ކުރިއެރުންތައް ގެނެސްދެއްވި އެއް ބާނީ ކަމުގައިވާ ނިޝާން މުލީގޭ ޝަރަފުގެ ޢިއްޒަތުގެވެރިޔާ މުޙައްމަދު ޢުމަރު މަނިކު (އެމްޔޫ މަނިކު) އަވަހާރަވި ޚަބަރު އެހީ ނުހަނު ފުން ހިތާމަޔާއެކު.… pic.twitter.com/QL2jeEI6ES

— Hussain Mohamed Latheef (@HucenSembe) August 30, 2025

މުޙައްމަދު ޢުމަރު މަނިކު، ސަރުކާރަށް ޚިދްމަތް ކުރައްވަން ފަށްޓަވާފައިވަނީ، 5 ޖޫން 1971 ގައެވެ. އަދި ރާއްޖޭގައި 1972 ވަނަ އަހަރު ފަތުރުވެރިކަމުގެ ވިޔަފާރި ފެށުމުގައި ކުރީސަފުގައި މަސައްކަތްކުރެއްވި އެއް ބާނީއަކީވެސް އެމަނިކުފާނެވެ. ރާއްޖޭގެ ފަތުރުވެރިކަމަށް އެމަނިކުފާނު ކޮށްދެއްވި އަގުހުރި ޚިދުމަތްތަކުގެ ސަބަބުން، ދިވެހިރާއްޖޭގެ ތަރައްޤީއަށް އެތައް ފިޔަވަޅުތަކެއް ކުރިއަށް އެޅިގެން ގޮސްފައިވެއެވެ.