އެއަރ އޭޝިއާގެ ފްލައިޓެއް ޖައްސަންޖެހޭ އެއަރޕޯޓް ނޫން އެހެން އެއަރޕޯޓަކަށް ޖައްސައިފި!

ދެކުނު ކޮރެއާއަށް ދަތުރުކުރަމުންދިޔަ އެއަރއޭޝިއާ އެކްސްގެ ފްލައިޓެއް، ގަސްތުކުރި އެއަރޕޯޓް ކަމަށްވާ އިންޗިއޮން އިންޓަރނޭޝަނަލް އެއަރޕޯޓް (އައި.ސީ.އެން) ބަދަލުގައި، ގިމްޕޯ އިންޓަރނޭޝަނަލް އެއަރޕޯޓް (ޖީ.އެމް.ޕީ) އަށް ޖެއްސުމުގެ ސަބަބުން، އެއަރލައިނަށް ގިނަ ފާޑުކިއުންތަކެއް އަމާޒުވެއްޖެއެވެ.

ނިއުސް ރިޕޯޓްތައް ބުނާގޮތުން، ކުއާލަލަމްޕޫރު އިންޓަރނޭޝަނަލް އެއަރޕޯޓުން ދަތުރުފެށި އެއަރއޭޝިއާގެ ފްލައިޓް "ޑީ7 506"، އިންޗިއޮނަށް ވާސިލްވާން 13 އޯގަސްޓް ވާ އާދީއްތަ ދުވަހުގެ ރޭ 7:50 ގައި ތާވަލުކުރެވިފައި އޮތް ނަމަވެސް، ފްލައިޓް 8:08 ގައި ޖައްސާފައިވަނީ އިންޗިއޮނުން 35 ކިލޯމީޓަރު ދުރުގައި އޮންނަ ގިމްޕޯއަށެވެ. ފްލައިޓް ޖައްސައި، ކެޕްޓަން އިންޗިއޮނަށް އާދެވިއްޖެކަމަށް އިއުލާން ކުރުމާއެކު، ގިނަ ފަސިންޖަރުން ތިބި ގޮނޑިތަކުން ތެދުވެ، މަތީގައި ހުންނަ ކަމަރާތަކުން އެމީހުންގެ ދާގީނާ ނެގުމަށް ތައްޔާރުވިއެވެ. ނަމަވެސް، ބައެއް ފަސިންޖަރުން ބޭރު ބަލައި، އެމީހުންގެ ފޯނުތަކުން ޗެކްކުރުމަށްފަހު އެނގުނީ ގިމްޕޯއަށް ފްލައިޓްޖެއްސިކަމެވެ.

ކޮރެއާ ހެރަލްޑް ނޫހަށް މައުލޫމާތު ދެމުން، މެލޭޝިއާއިން ދަތުރެއް ނިންމާލާފައި އޭނާގެ ފިރިމީހާ އާއި އަށް އަހަރުގެ ދަރިފުޅާއެކު އެނބުރި ދިޔަ ލީ މި-ހުއާން ނަމަކަށް ކިޔާ ފަސިންޖަރަކު ބުނީ، "ހުރިހާ އެންމެންނަށްވެސް ކަންބޮޑުވުން ކުރިމަތިވި. ފަސިންޖަރުން އެންގުމާ ހަމައަށްވެސް ގިމްޕޯއަށް ފެބީކަމެއް ކެބިން ކްރޫއަށްވެސް ނޭނގޭ ކަހަލަ." ލީ މި-ހުއާން އިތުރަށް ބުނީ، " ކްރޫ މެމްބަރަކު އޭނާގެ މައިންބަފައިން އިންޗިއޮން އިންޓަރނޭޝަނަލް އެއަރޕޯޓްގައި އޭނާއަށް އިންތިޒާރު ކުރަމުންދާކަމަށް ބުނެ، ގުޅަން ޖެހޭ ކަމަށްވެސް ބުނި."

ކޮރެއާ އެއަރޕޯޓްސް ކޯޕަރޭޝަން ބުނިގޮތުގައި، ފްލައިޓް ގިމްޕޯއަށް ޖެއްސިކަން އެންގީ އިންޗިއޮން އެއަރޕޯޓް ސަރަހައްދުގައި "ޓާބިއުލަންސް" އޮތުމުންނެވެ. ތެޔޮ އެޅުމަށްފަހު، ފްލައިޓް އިންޗިއޮނަށް ދަތުރުފެށީ ގާތްގަޑަކަށް ދެގަޑިއިރު ފަހުން، ރޭގަނޑު 10:17 ގައެވެ.

އޯގަސްޓް 14 ގައި ނެރުނު ބަޔާނެއްގައި، އެއަރއޭޝިއާ އެކްސްއިން ސާފުކޮށްދީފައިވަނީ، އިންޗިއޮންގައި މޫސުން ގޯސްވުމުގެ ސަބަބުން ވައިގެ ދަތުރުފަތުރު ބޮޑުތަނުން ބާރުބޮޑުވެފައިވުމުން، ތެޔޮ އެޅުމަށްޓަކައި ފްލައިޓް ގިމްޕޯއަށް އަނބުރާލީ ކަމަށެވެ. އެއަރއޭޝިއާ އެކްސް (އޭ.އޭ.އެކްސް) ބުނީ، ފްލައިޓް ޑީ7506 ތެޔޮ އެޅުމަށްޓަކައި ގިމްޕޯ އިންޓަރނޭޝަނަލް އެއަރޕޯޓް (ޖީ.އެމް.ޕީ) އަށް އަނބުރާލީ އިންޗިއޮން (އައި.ސީ.އެން) ގައި މޫސުން ގޯސްވުމުގެ ސަބަބުން ވައިގެ ދަތުރުފަތުރަށް ދަތިތަކެއް ކުރިމަތިވުމުން ކަމަށެވެ.

އެއަރލައިނުން ބުނީ، "ބޯޓު ޖެއްސުމަށްފަހު ކެބިން ކްރޫގެ އިއުލާނުގައި މައުލޫމާތު ދިނުމުގައި ގޯހެއް ހިނގާފައިވާ ކަމަށާއި، އެކަން ކެޕްޓަން ވަގުތުން ސާފުކޮށްދީ، މޫސުން ގޯސްވުމާއި ތެޔޮ އެޅުމަށްޓަކައި ގިމްޕޯއަށް ފްލައިޓް އަނބުރާލިކަން ކަށަވަރުކޮށްދިން ކަމަށެވެ. ކެޕްޓަން ވަނީ ކުރިމަތިވި ދަތިކަމަށްޓަކައި ފަސިންޖަރުންގެ ކިބައިން މައާފަށް އެދި، ގިމްޕޯއަށް ޖެއްސީ ތެޔޮ އެޅުމަށް ކަމަށާއި، ފްލައިޓް އަސްލު މަންޒިލަށް ދަތުރުކުރާނެ ކަމުގެ ޔަގީންކަން ދީފައިވާ ކަމަށެވެ."

އެއަރއޭޝިއާ އެކްސްގެ ސީ.އީ.އޯ، ބެންޔަމިން އިސްމާއިލް ވިދާޅުވީ، "މިއީ އިންޗިއޮންގައި މޫސުން ގޯސްވުމުގެ ސަބަބުން ކުރިމަތިވި ކުއްލި ހާލަތެއް. ދަތުރު ލަސްވުމުގެ ފުރުސަތާއި، ބޭނުންވާ މިންވަރަށް ތެޔޮ ނެތި ޖެއްސުމުގެ ނުރައްކަލަށްފަހު، ސަލާމަތީ ކަންކަމަށްޓަކައި ތެޔޮ އެޅުމަށް ގިމްޕޯ އިންޓަރނޭޝަނަލް އެއަރޕޯޓްއަށް ފްލައިޓް އަނބުރާލީ." އޭނާ އިތުރަށް ވިދާޅުވީ، "ހުރިހާ ސަލާމަތީ ކަންކަން ފުރިހަމަކުރުމަށްފަހު، ފްލައިޓް އިންޗިއޮން އިންޓަރނޭޝަނަލް އެއަރޕޯޓަށް ފުރައިގަތް، އަދި ފަސިންޖަރުން އެތަނަށް ފައިބައިގެންދިޔަ. މިފަދަ ހާލަތްތަކުގައި އިތުރު ސާފުކަމެއް ދިނުމަށް، އަޅުގަނޑުމެންގެ އެތެރޭގެ އިއުލާންތަކާއި މަތިންދާބޯޓުގައި މައުލޫމާތު ބަދަލުކުރުމުގެ އުސޫލުތައްވެސް އަލުން ބަލާނަން. މި އޮޕަރޭޝަނަލް ބަދަލުގެ ތެރޭގައި އެންމެންގެ ސަލާމަތްތެރިކަން ކަށަވަރުކުރުމަށްޓަކައި، އެއްބާރުލުން ދެއްވިކަމަށްޓަކައި ފަސިންޖަރުންނަށް ޝުކުރު ދަންނަވާކަމަށެވެ.

މިއީ އެއަރއޭޝިއާގެ ފްލައިޓަކަށް ގަސްތުކުރި އެއަރޕޯޓް ނޫން އެހެން އެއަޕޯތެއްގައި ޖެއްސި ފުރަތަމަ ފަހަރެއް ނޫނެވެ. 2015 ވަނަ އަހަރު ސިޑްނީން މެލޭޝިއާއަށް ދަތުރުކުރި އެއަރއޭޝިއާ ފްލައިޓެއް ގަސްތުކުރި މަންޒިލަށް ނުގޮސް، ޕައިލޮޓް ނެވިގޭޝަން ސިސްޓަމަށް ގޯސް ކޯޑިނޭޓްސް އެންޓަރކުރުމުގެ ސަބަބުން މެލްބަންއަށް ޖައްސާފައިވެއެވެ. ވައިގެ ސަލާމަތީ ތަހުގީގުތަކުން އެނގުނުގޮތުގައި، އެއަރބަސް އޭ330 ފްލައިޓް ސިޑްނީ އިންޓަރނޭޝަނަލް އެއަރޕޯޓުން 10 މާރިޗު 2015 ވަނަ އަހަރު 11:55 ގައި ފުރުމަށް ތާވަލުކުރެވިފައި އޮތް ނަމަވެސް، ގާތްގަޑަކަށް 9 ގަޑިއިރު ފަހުން ކުއާލަލަމްޕޫރަށް ވާސިލްވާން އޮތް ފްލައިޓް 2:00 ގައި ޖައްސާފައިވަނީ މެލްބަންއަށެވެ. އެއީ މައުލޫމާތު އެންޓަރ ކުރުމުގައި ހިނގި ގޯސްތަކާއި، ކޮމްޕިއުޓަރ ސިސްޓަމުން ދެވުނު އާދަޔާ ހިލާފު އަޑުތަކަށް ކްރޫން ސަމާލުކަން ނުދިނުމާއި، ސިޑްނީގައި މޫސުން ގޯސްވުމުގެ ސަބަބުން ކަމަށް ރިޕޯޓްތައް ބުނެއެވެ.

މެލްބަން އެއަރޕޯޓް އޮންނަނީ ސިޑްނީން 722 ކިލޯމީޓަރު ދެކުނު-އެފްރިކާގެ ދިމާލަށެވެ. ކުއާލަލަމްޕޫރު އޮންނަނީ 6,611 ކިލޯމީޓަރު ހުޅަނގު-އުތުރުގެ ދިމާލަށެވެ. އޮސްޓްރޭލިއަން ޓްރާންސްޕޯޓް ސޭފްޓީ ބިއުރޯ (އޭ.ޓީ.އެސް.ބީ) ގެ ރިޕޯޓެއްގައިވާ ގޮތުން، މި މައްސަލަ ދިމާވީ ހެޑްސެޓްތަކެއް ހަލާކުވުމުގެ ސަބަބުން ކެޕްޓަނާއި ފަސްޓް އޮފިސަރުގެ އާދަކޮށް ކުރާ ޕްރީ-ފްލައިޓް ޗެކްތައް ބަދަލުވުމުންނެވެ.