ޔަމަން ކައިރިއަށް ބޯޓެއް ބަންޑުންޖަހާލާ 68 މީހުން މަރުވެ ގިނަ ބަޔަކު ގެއްލިއްޖެ

ޔަމަންގެ ދެކުނު ސަރަހައްދުން އެފްރިކާގެ ބޯޓެއް ބަންޑުންޖަހާލާ،  ހިތާމަވެރި ހާދިސާއެއް ހިނގައިފިއެވެ. މި ހާދިސާގައި މަދުވެގެން 68 މީހުން މަރުވެފައިވާ އިރު، އެތައް ބަޔަކު ގެއްލިފައިވާ ކަމަށް ރިޕޯޓުތައް ބުނެއެވެ.

މި ހާދިސާ ހިނގާފައިވަނީ ޔަމަންގެ އަބްޔަން ޕްރޮވިންސާ ކައިރީގައިވާ ޚަންފަރު ޑިސްޓްރިކްޓް ކައިރިންނެވެ. ބަންޑުންވި ބޯޓުގައި ދަތުރުކުރީ ހޯން އޮފް އެފްރިކާ ސަރަހައްދުން އެތެރެވުމަށް މަސައްކަތްކުރަމުން ދިޔަ 154 އެތިއޯޕިއާ މީހުންނެވެ. އދ. ގެ އިންޓަރނޭޝަނަލް އޯގަނައިޒޭޝަން ފޯ މައިގްރޭޝަން (އައި.އޯ.އެމް) އިން ބުނި ގޮތުގައި، ދޯނި ބަންޑުންވުމަށްފަހު ސަލާމަތް ކުރެވިފައިވަނީ އެންމެ 12 މީހުންކަމަށެެވެ.

އޮފިޝަލުން ބުނާ ގޮތުގައި، މި ބޯޓު ބަންޑުންޖަހާލީ ކަނޑުގަދަވުމުގެ ސަބަބުންނެވެ. ހާދިސާގައި މަރުވި 54 މީހުންގެ ހަށިގަނޑު  ގޮނޑުދޮށުން ފެނުނުއިރު، އިތުރު 14 މީހުންގެ ހަށިގަނޑު އެހެން ތަނަކުން ފެނި، ހޮސްޕިޓަލެއްގެ މޯޗަރީއަށް ވަނީ ގެންގޮސްފައެވެ. ސަލާމަތީ ބާރުތަކުން ކަނޑުގެ ނުރައްކާތެރި ހާލަތްތަކާ ކުރިމަތިލާން ޖެހިފައިވީ ނަމަވެސް، ގެއްލިފައިވާ މީހުން ހޯދުމުގެ މަސައްކަތް އަދިވެސް ދަނީ ކުރިއަށެވެ.

ޔަމަންގެ ސިއްހީ އޮފިޝަލުން ވަނީ މީހުން މަރުވިކަން ކަށަވަރުކޮށްދީފައެވެ. އަދި މަރުވި މީހުންގެ ހަށިގަނޑު ޝަގްރާ ސިޓީ ކައިރީގައި ވަޅުލުމުގެ އިންތިޒާމްތައް ހަމަޖައްސަމުންދާ ކަމަށް ވެސް އެފަރާތުން ވަނީ ބުނެފައެވެ. ޒަންޒިބާރގެ ސިއްހީ އޮފީހުގެ ޑިރެކްޓަރު ޢަބްދުލް ޤާދިރު ބަޖަމީލް ވިދާޅުވީ، މޫސުން ގޯސްވުމުގެ ސަބަބުން ދަތިތަކެއް ހުރި ނަމަވެސް، ގެއްލިފައިވާ މީހުން ހޯދުމުގެ މަސައްކަތް ހުއްޓާނުލާ ކުރިއަށްދާ ކަމަށެވެ.

ޔަމަން އާއި ހޯން އޮފް އެފްރިކާ ދެމެދުގައިވާ ކަނޑުގެ މަގަކީ ދުނިޔޭގައި ހިނގާ އެންމެ ނުރައްކާތެރި ހިޖުރައިގެ މަގުތަކުގެ ތެރެއިން އެއް މަގެވެ. އެތައްހާސް މީހުން ޚާއްސަކޮށް  އެތިއޯޕިއާ އާއި ސޯމާލިއާއިން، މި ކޮރިޑޯ ބޭނުންކޮށްގެން ހިޖުރަކުރަނީ، ދިރިއުޅުމަށް ބޮޑެތި ފަސޭހަތަކެއް ހޯދުމުގެ އުއްމީދުގައި ގަލްފް ގައުމުތަކަށް ދިއުމަށެވެ. ގިނަ ބަޔަކު ހިޖުރަކުރަނީ އެމީހުންގެ ގައުމުތަކުގައި ހިނގާ ހަނގުރާމަ، ފަގީރުކަން، ނުވަތަ ސިޔާސީ ހަލަބޮލިކަމުން ސަލާމަތްވުމަށެވެ.

މީހުން ވަގަށް އެއްތަނުން އަނެއްތަނަށް ގެންދާ ފަރާތްތަކުން ގިނައިން ބޭނުންކުރަނީ ސަލާމަތީގޮތުން ރައްކާތެރިކަން ކުޑަ، ގިނަ ބަޔަކު އަރުވާފައިވާ ބޯޓުތަކެވެ. މި ބޯޓުތަކުން ރަތް ކަނޑު ނުވަތަ ގަލްފް އޮފް އޭޑެން ހުރަސްކުރުމަކީ ނުރައްކާތެރި ދަތުރެއް ނަމަވެސް، މާޔޫސްކަމުގެ ތެރޭގައި ތިބި ގިނަ ބަޔަކު މި ނުރައްކާތެރި ދަތުރު ކުރަން މަޖުބޫރުވެއެވެ. އައި.އޯ.އެމް.ގެ މައުލޫމާތުތަކަށް ބަލާއިރު، 2024 ވަނަ އަހަރު 60,000 އަށް ވުރެ ގިނަ ހިޖްރަކުރާމީހުން ވަނީ ޔަމަނަށް އައިސްފައެވެ. މިއީ ކުރީ އަހަރުގެ 100,000 އަށް ވުރެ މަދު އަދަދެކެވެ. ނަމަވެސް، ނުރައްކާތެރިކަން އަދިވެސް އެބައޮތެވެ.

 2024 ވަނަ އަހަރު މި މަގުން ދަތުރުކުރި 558 މީހުން މަރުވެފައިވާ ކަމަށް އައި.އޯ.އެމް. އިން ރިކޯޑްކޮށްފައިވެއެވެ. ފާއިތުވި ދިހަ އަހަރު ތެރޭގައި މި ދަތުރުގައި މަދުވެގެން 2,082 މީހުން މަރުވެފައި ނުވަތަ ގެއްލިފައިވާއިރު، އޭގެ ތެރެއިން 700 އަށް ވުރެ ގިނަ މީހުން ވަނީ ގެނބިގެން މަރުވެފައެވެ.

ޔަމަންގެ ސަރުކާރުގެ ސިފައިންނާއި ހޫތީ ހަނގުރާމަވެރިންގެ މެދުގައި 2022 ވަނަ އަހަރު އެއްބަސްވުމަކަށް އާދެވުމަށްފަހު، މިކަން ކޮންމެވެސް ވަރަކަށް މަދުވެފައިވީ ނަމަވެސް، އެ ގައުމު އަދިވެސް ކުރިމަތިލަނީ ބޮޑު އިންސާނީ ކާރިސާއަކާ އެވެ. ޔަމަންގައި މިހާރުވެސް ގާތްގަނޑަކަށް 380،000 ރެފިއުޖީންނާއި ހިޖްރަކޮށްފައިވާމީހުން ދިރިއުޅެމުންދާ އިރު، އޭގެ ތެރެއިން ގިނަ ބަޔަކު ދިރިއުޅެނީ ދަތި ހާލަތްތަކުގައެވެ.

އައި.އޯ.އެމް.އިންކަނޑުގެ މި މަގު ސިފަކޮށްފައިވަނީ ހިޖްރަވެރީންނަށް އެންމެ ބިޒީ އަދި އެންމެ މީހުން މަރުވާ މަގުގެ ގޮތުގައެވެ. މި އެޖެންސީން ދަނީ އިތުރު ހިތާމަވެރި ހާދިސާތައް ހުއްޓުވުމަށް، ރައްކާތެރި ބަދަލުތަކަށް ގޮވާލައި، ބައިނަލްއަޤްވާމީ އެހީތެރިކަން އިތުރުކުރުމަށް މަސައްކަތް ކުރަމުންނެވެ.