ކުޅުދުއްފުށި ސިޓީ ކައުންސިލްގެ ޚިދުމަތްތައް ޒަމާނީކުރަން 'ކުންބުޓި ޕޯޓަލް' ޓެސްޓަށް ހުޅުވައިފި

ކުޅުދުއްފުށި ސިޓީ ކައުންސިލުން ފޯރުކޮށްދޭ ހިދުމަތްތަކަށް ފަސޭހަކަމާއެކު އޮންލައިންކޮށް އެދިލެއްވޭނެ އިންތިޒާމެއް ހަމަޖެއްސުމަށް އުފައްދާފައިވާ ޚާއްސަ ޕޯޓަލް، "ކުންބުޓި ޕޯޓަލް" ޓެސްޓުކުރުމަށް މިއަދު ހުޅުވާލައިފިއެވެ.

މި ޕޯޓަލް ހުޅުވާލާފައިވަނީ ކުޅުދުއްފުށި ސިޓީގައި ދިރިއުޅޭ ރައްޔިތުންނަށް ކައުންސިލްގެ ހިދުމަތްތައް ލިބިގަތުމަށް ފަސޭހަ ގޮތްތަކެއް ހޯދައިދިނުމުގެ ގޮތުންނެވެ. މިވަގުތު މި ޕޯޓަލް މެދުވެރިކޮށް، ކައުންސިލުން ފޯރުކޮށްދޭ 7 ހިދުމަތަކަށް އޮންލައިންކޮށް އެދިލެއްވޭނެއެވެ.

ކުޅުދުއްފުށި ސިޓީ ކައުންސިލުން ފޯރުކޮށްދޭ ހިދުމަތްތަކަށް ފަސޭހަކަމާއި އެކު އޮންލައިންކޮށް އެދިލެއްވޭނެ އިންތިޒާމެއް ހަމަޖެއްސުމަށް އުފައްދާފައިވާ ޕޯޓަލް، "ކުންބުޓި ޕޯޓަލް" ޓެސްޓުކުރުމަށް މިއަދު (20 ޖުލައި 2025) ވަނީ ހުޅުވާލާފައި.

މި އިދާރާއިން ފޯރުކޮށްދޭ 7 ހިދުމަތަކަށް މި ޕޯޓަލް… pic.twitter.com/qVrsyGLS31

— Kulhudhuffushi City Council (@kfcitycouncil) July 20, 2025

މި މަޝްރޫއަކީ ކުޅުދުއްފުށި ސިޓީ ކައުންސިލްގެ "ސްމާޓް ކައުންސިލް" ސިޔާސަތުގެ ދަށުން، ކައުންސިލްގެ ހިދުމަތްތައް ޑިޖިޓަލައިޒްކުރުމާއި، ޒަމާނީކޮށް ރައްޔިތުންނާ ގާތަށް ހިދުމަތްތައް ގެނައުމަށް ހިންގޭ މުހިންމު މަޝްރޫއުއެކެވެ. މި ޕޯޓަލްގެ ސަބަބުން ރައްޔިތުންނަށް ކައުންސިލްގެ ހިދުމަތްތައް ލިބިގަތުމަށް ދަތުރުކުރުމުގެ ބޭނުން ނުޖެހި، ގޭގައި ތިބެގެން ނުވަތަ ކޮންމެ ތަނެއްގައި ތިބެގެންވެސް އެދެވޭނެއެވެ.

ކުޅުދުއްފުށި ސިޓީ ކައުންސިލުން މައުލޫމާތު ދީފައިވާ ގޮތުގައި، ކުރިއަށް އޮތްތަނުގައި މި ޕޯޓަލް މެދުވެރިކޮށް މި އިދާރާއިން ފޯރުކޮށްދޭ ޖުމްލަ 33 ހިދުމަތަކަށް އެދިލެއްވޭނެ އިންތިޒާމް ހަމަޖައްސާނެއެވެ. މިއީ ސިޓީގެ ރައްޔިތުންނަށް ފޯރުކޮށްދޭ ހިދުމަތްތަކުގެ ފެންވަރު ރަނގަޅުކުރުމަށް އަޅާ މުހިންމު ފިޔަވަޅެކެވެ.