ސްޓޫޑެންޓް ލޯނު ސްކީމް: 2025 ވަނަ އަހަރު 282 މިލިއަނަށް ވުރެ ގިނަ ރުފިޔާ ދޫކޮށްފި

މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާބެހޭ ވުޒާރާ (މިނިސްޓްރީ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމެންޓް) އިން ހާމަކުރައްވާފައިވާ ގޮތުގައި، 2024-2025 ވަނަ އަހަރުގެ މަތީ ތަޢުލީމުގެ ސްކީމްތަކުގެ ދަށުން ދެމުންގެންދާ ސްޓޫޑެންޓް ލޯނު ސްކީމްގެ ދަށުން 2025 ވަނަ އަހަރު މިހާތަނަށް 282 މިލިއަން ރުފިޔާއަށް ވުރެ ގިނަ ފައިސާ ދޫކޮށްފައިވެއެވެ. މި މައުލޫމާތު ހިމެނޭ ތަފާސް ހިސާބު މިނިސްޓްރީން ރަސްމީކޮށް އާންމުކޮށްފައިވަނީ މިއަދުއެވެ.

ވުޒާރާއިން އާންމުކުރި އެންމެ ފަހުގެ ތަފާސްހިސާބުތަކުން ދައްކާ ގޮތުގައި، މި ސްކީމް ފެށުނު ފަހުން މިހާތަނަށް ދޫކޮށްފައިވާ ޖުމްލަ އަދަދު ވަނީ 982.7 މިލިއަން ރުފިޔާއަށް އަރާފައެވެ. ހަމައެކަނި 2025 ވަނަ އަހަރަށް ބަލާއިރު، ދިވެހި ދަރިވަރުންނަށް ރާއްޖެއާއި ރާއްޖެއިން ބޭރުން މަތީ ތަޢުލީމު ހާސިލުކުރުމަށް އެހީތެރިވުމަށް 282,369,322.43 ރުފިޔާ ދޫކޮށްފައިވެއެވެ.
މިހާތަނަށް ސްކީމުގެ ދަށުން އެހީތެރިކަން ދެވުނު ދަރިވަރުންގެ މައިގަނޑު ތަފާސްހިސާބުތައް:

މިހާތަނަށް ފައިސާގެ އެހީ ދެވިފައިވާ ދަރިވަރުން: 1,151

ފިރިހެން: 543
އަންހެން: 608

މިހާތަނަށް ގްރެޖުއޭޓްވެފައިވާ ދަރިވަރުން: 863

ފިރިހެން: 500
އަންހެން: 363

2025 ވަނަ އަހަރަށް ބަލާއިރު، މިނިސްޓްރީން ވަނީ އިތުރު 274 ދަރިވަރުންނަށް އެހީތެރިކަން ފޯރުކޮށްދީފައެވެ. އޭގެތެރޭގައި 112 ފިރިހެން ދަރިވަރުންނާއި 162 އަންހެން ދަރިވަރުން ހިމެނެއެވެ. އަދި މި އަހަރުގެ ތެރޭގައި 281 ދަރިވަރުން ގްރެޖުއޭޓްވެފައިވާ ކަމަށް ވެސް ރިޕޯޓުކޮށްފައިވެއެވެ.

📊 Student Loan Scheme Higher Education Statistics 2024–2025

Updated: 17th July 2025 pic.twitter.com/AGE14VyTIz

— Min. of Higher Edu, Labour and Skills Development (@MoHEmv) July 20, 2025

ފާހަގަކޮށްލެވޭ ގޮތުގައި، 2025 ވަނަ އަހަރު މި ސްކީމުގެ ދަށުން މިހާރުވެސް 1,642 ދަރިވަރުން ދަނީ ކިޔަވަމުންނެވެ. އޭގެތެރެއިން 978 އަންހެން ދަރިވަރުންނާއި 664 ފިރިހެން ދަރިވަރުން ހިމެނެއެވެ.