ނާސާގެ "ޕާކަރ ސޯލާ ޕްރޯބް" އިރުގެ އެންމެ ގާތަށްގޮސް އައު ހޯދުންތަކެއް ހޯދައިފި

އިރުގެ ހަކަތަ ދުނިޔެއަށް ވާސިލްވަނީ ކިހިނެއްތޯ ސުވާލުއުފެދޭތޯ؟ ނާސާގެ ޕާކަރ ސޯލާ ޕްރޯބްއިން މި ސުވާލުގެ ޖަވާބު ހޯދުމަށް ކުރާ މަސައްކަތުގައި އަނެއްކާވެސް ބޮޑު ކުރިއެރުމެއް ހޯދައިފިއެވެ. ތާރީޚީ މިންވަރަކަށް އިރާއި ގާތްވެ، ދުނިޔެއިން އުފެއްދި އެއްވެސް އެއްޗެއް ދުވަހަކުވެސް ނުދާހާ ގާތަށް (3.8 މިލިއަން މޭލު ނުވަތަ 6.1 މިލިއަން ކިލޯމީޓަރު) ގޮސް، އިރުން މުޅިން އަލަށް ފެނުނު މަންޒަރުތަކެއް މި ޕްރޯބްއިންވަނީ ރެކޯޑްކޮށްފައެވެ.

2024 ވަނަ އަހަރުގެ ޑިސެމްބަރު މަހުގެ 24 ވަނަ ދުވަހު ހިންގި  މި އުދުހުމުގެ ތެރެއިން ނަގާފައިވާ  ފޮޓޯތަކުގެ ސަބަބުން، އިރުގެ އެންމެ ބޮޑު ސިއްރުތަކުގެ ތެރެއެން އެއް ސިއްރަކީ ކަމަށްވާ އިރުގެ ވައި (ސޯލާ ވައި) އުފެދި، އިރުގެ ބާރުގަދަ  އެ ވައި  ނިކުންނަ ގޮތް ދެނެގަތުމަށް ސައިންސްވެރިންނަށް އެހީތެރިވެދެއެވެ. ލައިވް ސައިންސް އިން ބުނެފައިވާ ގޮތުގައި، މި އޮބްޒަވޭޝަންތަކުގެ ސަބަބުން އިރުގެ ބޭރުގެ ވަރަށް ހޫނު ފަށަލައެއް ކަމަށްވާ ކޮރޯނާ – އިރުގެ ވައި އުފެދޭ ހިސާބު – ދެނެގަތުމަށް ވަރަށް މުހިންމު މައުލޫމާތުތަކެއް ލިބިފައިވެއެވެ.

އިރުގެ ވައި ނުވަތަ ސޯލާ ވަޔަކީ އިރުން ކެނޑިނޭޅި ބޭރުވާ ޗާޖްވެފައިވާ ދޯދި ތަކެކެވެ. މި ވައިގެ ސަބަބުން ދުނިޔޭގެ މެގްނެޓިކް ދާއިރާއަށް އަސަރުކޮށް، އުތުރުގެ އަދި ދެކުނުގައި ފުރިހަމަ އަލިތަކެއް (އޮރޯރާސް) އުފެދިގެންދެއެވެ. ނަމަވެސް، މި ވައިގެ ސަބަބުން ބާރުގަދަ ޖިއޯމެގްނެޓިކް ތޫފާންތައްވެސް އުފެދި، ސެޓެލައިޓްތަކާއި ކަރަންޓް ނެޓްވޯކްތަކަށާއި މުވާސަލާތީ ނިޒާމުތަކަށް ބުރޫއެރުމަކީވެސް އެކަށީގެންވާ ކަމެކެވެ. މި ވައި އުފެދޭ ގޮތް ދެނެގަތުމުން މިފަދަ ސްޕޭސް ވެދަރ އިވެންޓްތައް ކުރިން ދެނެގަނެ، އެކަމަށް ތައްޔާރުވުމަށް އެހީތެރިވެދޭނެއެވެ.

ދެ ބާވަތެއްގެ ވައި ދެނެގަނެފި

އިރުގެ ވައިގެ އެންމެ ބޮޑު އެއް ސިއްރަކީ ލަހުން ދައުރުވާ އިރުގެ ވައި (ސްލޯ ސޯލާ އެއަރ) އެވެ. މި ވައި ދަތުރުކުރަނީ އަވަހަށް ދައުރުވާ އިރުގެ ވައި (ފާސްޓް ސޯލާ އެއަރ) އަށްވުރެ މަޑު ދުވެއްޔެއްގައެވެ.  ދިގު މުއްދަތެއްގައި ސައިންސްވެރިން ވަނީ މި ވައި އުފެދޭ ގޮތާއި، އެހެން ވައްތަރުތަކާ ތަފާތުކޮށް މި ވައިގެ މިސްރާބު ބަދަލުވަނީ ކީއްވެގެންތޯ ބަހުސްކޮށްފައެވެ.

ޕާކަރ ސޯލާ ޕްރޯބްގެ އެންމެ ފަހުގެ ހޯދުންތަކުގެ ސަބަބުން މިހާރު ވަރަށް ބޮޑު ކުރިއެރުމެއް ލިބިފައިވެއެވެ. ލިބިފައިވާ މައުލޫމާތުތަކުން މިހާރު ވަނީ ލަހުން ދައުރުވާ އިރުގެ ވައިގެ  ވަކި ދެ ވައްތަރެއްވާކަން ކަށަވަރުކޮށްފައެވެ. އެއީ:

އެލްފްވޭނިކް ވައި – މި ވައި ނުކުންނަނީ އިރުގެ ކޮރޯނަލް ހޯލްސް ކިޔާ ފިނި ހިސާބުތަކުން ކަމަށް ބެލެވެއެވެ.
ނޮން-އެލްފްވޭނިކް ވައި – މި ވައި ބޭރުވަނީ ހޫނު މެގްނެޓިކް ލޫޕްސް ކަމަށްވާ ހެލްމެޓް ސްޓްރީމާސް އިން ކަމަށް ބެލެވެއެވެ.