ދުނިޔެ
އެއަރ އިންޑިއާ ބޯޓު ވެއްޓުން ޚާދިސާ: ދެ އިންޖީނު ހުއްޓި، ތެޔޮ ހުސްވީ ކުއްލިއަކަށް
އެއަރ އިންޑިއާ ބޯޓު ވެއްޓުނު ޚާދިސާ
އަހްމަދާބާދުގައި ހިނގި އެއާ އިންޑިއާގެ ބޯޓުވެއްޓުނު ހިތާމަވެރި ޚާދިސާގައި 260 މީހުން މަރުވި މައްސަލައިގެ ތަހުޤީގުގެ ފުރަތަމަ ރިޕޯޓު، އިންޑިއާގެ އެއާކްރާފްޓް އެކްސިޑެންޓް އިންވެސްޓިގޭޝަން ބިއުރޯ (AAIB) އިން ވަނީ އާންމުކޮށްފައެވެ. މި ރިޕޯޓުން ވަނީ، ބޯޓުގެ ދެ އިންޖީނުވެސް ކުއްލިއަކަށް ތެޔޮ ހުސްވެގެން ހުއްޓިފައިވާކަން ކަށަވަރުކޮށްދީ، ބޯޓު ދުއްވުމުގެ އުސޫލުތަކާ ގުޅޭގޮތުން ނާޒުކު ސަލާމަތީ ކަންބޮޑުވުންތަކެއް އުފައްދާފައެވެ.
މިދިޔަ ޖޫން މަހު، ބޯއިންގެ ދެ އިންޖީނުލީ މި ބޯޓުކޮޅު ވެއްޓުނީ އަހްމަދާބާދުގައި ހުންނަ ސަރުދާރު ވަލްލަބްބާއީ ޕަޓޭލް އިންޓަރނޭޝަނަލް އެއާޕޯޓުން ފުރިތާ ކުޑައިރުކޮޅެއްގެ ތެރޭގައެވެ. މަރުވި މީހުންގެ ތެރޭގައި ކުރީގެ ގުޖަރާތުގެ ޗީފް މިނިސްޓަރ ވިޖޭ ރޫޕާނީ އާއި، މަޝްހޫރު ވިޔަފާރިވެރިންނާއި ސިޔާސީ ބޭފުޅުން ހިމެނެއެވެ. މި ޚާދިސާއަކީ އިންޑިއާގެ އޭވިއޭޝަން ތާރީޚުގައި ހިނގާފައިވާ އެންމެ ނުރައްކާތެރި ހާދިސާތަކުގެ ތެރޭގައި ހިމެނޭ އެއް ޚާދިސާއެވެ.
ކުއްލިއަކަށް ތެޔޮ ހުސްވެ އިންޖީނު ހުއްޓުން
އޭއޭއައިބީގެ ތަހުޤީގުން ދައްކާ ގޮތުގައި، ބޯޓުގެ ދެ އިންޖީނުގެވެސް ތެޔޮ ކޮންޓްރޯލް ސްވިޗް، ސިކުންތެއްގެ ތެރޭގައި "ކަޓްއޮފް" ޕޮޒިޝަނަށް ގޮސްފައިވެއެވެ. މިކަމުގެ ސަބަބުން އިންޖީނުތަކަށް ތެޔޮ ލިބުން އެއްކޮށް ކެނޑި، ބޯޓުގެ ކޮންޓްރޯލް ގެއްލި، އަވަހަށް ބޯޓު ތިރިއަށްޖެހި، ރެސިޑެންޝަލް ސަރަހައްދަކަށް ވެއްޓުނެވެ.
ކޮކްޕިޓް ވޮއިސް ރިކޯޑަރ (ސީވީއާރް) އިން ވަނީ ޕައިލަޓުންގެ މެދުގައި ހިނގި މުހިންމު ވާހަކައެއް ރެކޯޑްކޮށްފައެވެ. އެއް ޕައިލަޓަކު އަނެއް ޕައިލަޓާ ސުވާލުކޮށްފައިވެއެވެ، "ތި ކަނޑާލީ ކީއްވެ؟" މި ސުވާލަށް ދެވަނަ ޕައިލަޓު ޖަވާބުދީފައިވަނީ، "އަހަރެން ނޫން ކަނޑާލީ." ނަމަވެސް މި ރިޕޯޓްގައި، ސްވިޗްތައް ކަޓްއޮފް މޯޑަށް ދިޔަ ސަބަބެއް ކަނޑައަޅާފައި ނުވެއެވެ. އަދި މެކޭނިކަލް ނުވަތަ މެނުއަލް ކުށެއްވެސް ރަސްމީކޮށް ހޯދިފައެއް ނުވެއެވެ.
ބޯއިން ނުވަތަ އިންޖީނު އުފެއްދި ފަރާތަށް އެއްވެސް ފިޔަވަޅެއް ނެތް
މި ބޮޑު ހާދިސާ ހިނގާފައިވީ ނަމަވެސް، ފުރަތަމަ ރިޕޯޓުގައި ބޯއިން ނުވަތަ އިންޖީނު އުފެއްދި ކުންފުންޏާ ދެކޮޅަށް އެއްވެސް ފިޔަވަޅެއް އެޅުމަށް ހުށަހަޅާފައި ނުވެއެވެ. އޮފިޝަލުން ބުނެފައިވަނީ، މެކޭނިކަލް ކުށެއްތޯ، ޕައިލަޓުގެ ކުށެއްތޯ ނުވަތަ ސޮފްޓްވެއާގެ މައްސަލައެއްތޯ ބެލުމަށް އިތުރަށް އަޑުއަހާނެ ކަމަށެވެ.
ރިޕޯޓުގައި ބަޔާންކޮށްފައިވާ ގޮތުގައި، މުޅި ތަޚްގީގު، ސިސްޓަމް ޑައިގްނޯސްޓިކްސް އާއި ކޮމްޕޯނެންޓް ފެއިލްޔަރ އެނެލިސިސް ހިމެނޭ ގޮތަށް ނިންމުމަށް އެއް އަހަރަށްވުރެ ގިނަ ދުވަސް ނެގުމަކީ އެކަށީގެންވާ ކަމެކެވެ. އަދި ބޯޓު ދުއްވާފައި ވަނިކޮށް ދިމާވި މައްސަލަ ދެވަނަ ފަހަރަށް ކުރެވޭތޯ ބެލުމަށް، އެކި ޓެސްޓުތަކާއި ސިމިއުލޭޝަންތައް ހެދުމުގެ މުހިންމުކަންވެސް ރިޕޯޓުގައި ފާހަގަކޮށްފައިވެއެވެ.
އާންމުންގެ އެދުން: ހާމަކަންބޮޑުކުރުން
މި ޚާދިސާއާ ގުޅިގެން އާންމުންގެ ނުރުހުން އުފެދި، އޭވިއޭޝަން ދާއިރާއަށް ބޮޑެތި އިސްލާހުތައް ގެނައުމަށް ވަނީ ގޮވާލާފައެވެ. މަރުވި މީހުންގެ އާއިލާތަކުން ވަނީ ތަޚްގީގީ މަސައްކަތުގައި ޖަވާބުދާރީވުމާއި، ދެފުށްފެންނަ ގޮތަކަށް ކަންކަން ހާމަކުރުމަށް ގޮވާލާފައެވެ. ސިވިލް އޭވިއޭޝަން މިނިސްޓްރީން ވަނީ ފުޅާ ދާއިރާއެއްގައި ފައިނަލް ރިޕޯޓެއް ނެރޭނެ ކަމަށާއި ސަލާމަތީ ހުރިހާ ހުށަހެޅުމަކަށް އަމަލުކުރާނެ ކަމަށް ވައުދުވެފައެވެ.
މިދިޔަ ޖޫން މަހު ހިނގި މި ހާދިސާއަކީ މި ގިނަ ދިހަވަރުގެ އަހަރުތަކުގައި އިންޑިއާއަށް ދިމާވި އެންމެ ނުރައްކާތެރި ވައިގެ ޚާދިސާއެވެ.
Ads by MSS
