މެލޭޝިއާގައި ކިޔަވާ ބޭރު ޤައުމުތަކުގެ ދަރިވަރުންގެ އަތުން %6ގެ ޓެކުހެއް ނެގުމަށް އެ ޤައުމުގެ ސަރުކާރުން ނިންމައިފި

މެލޭޝިޔާގައި އަމިއްލަ ކުންފުނިތަކުން ހިންގާ މަތީ ތަޢުލީމު ފޯރުކޮށްދޭ މަރުކަޒުތަކުގައި ތަޢުލީމު ހާސިލު ކުރާ ބޭރު ޤައުމުތަކުގެ ދަރިވަރުންގެ އަތުން %6 ގެ ޓެކުހެއް ނެގުމަށް އެ ޤައުމުގެ ސަރުކާރުން ނިންމައިފިއެވެ. މިކަން ހާމަކޮށްފައިވަނީ މެލޭޝިޔާގެ މާލީ ވުޒާރާއިން މި ޖޫން މަހުގެ 9 ވަނަ ދުވަހު ނެރުނު ބަޔާނެއްގައެވެ. މެލޭޝިޔާއަކީ ރާއްޖޭގެ ގިނަ އަދަދެއްގެ ދަރިވަރުން މަތީ ތަޢުލީމު ހާސިލު ކުރަމުންދާ މުހިންމު މަންޒިލެކެވެ.

މެލޭޝިޔާގެ މާލީ ވުޒާރާއިން ބުނި ގޮތުގައި، މި ޓެކުސް ނެގުމަށް ނިންމާފައިވަނީ އެ ޤައުމުގައި މުދަލާއި ޚިދުމަތުން ނަގާ ސޭލްސް އެންޑް ސަރވިސް ޓެކުސް (އެސްއެސްޓީ)އަށް ގެނެސްފައިވާ އައު އިސްލާޙުގެ ދަށުންނެވެ. މި އައު އިސްލާޙުތަކަށް ޖުލައި 1ވަނަ ދުވަހުން ފެށިގެން އަމަލު ކުރަން ފަށާނެ ކަމަށް އެ ވުޒާރާއިން ހާމަކުރިއެވެ. މަތީ ތަޢުލީމު ފޯރުކޮށްދޭ ޔުނިވަރސިޓީތަކާއި ކޮލެޖުތަކުގެ އިތުރުން ޕްރީސްކޫލްތަކާއި އެހެނިހެން މަދަރުސާތައް، އަދި ބަސް ދަސްކޮށްދޭ މަރުކަޒުތަކުގައި ތަޢުލީމު ހާސިލު ކުރާ ބޭރު ޤައުމުތަކުގެ ދަރިވަރުން ވެސް މި ޓެކުސް ދައްކަން ޖެހޭނެއެވެ.

މެލޭޝިޔާ ސަރުކާރުން ބޭރުގެ ދަރިވަރުންނަށް ޚާއްޞަކޮށް މި އައު ޓެކުހެއް ތަޢާރުފުކޮށްފައި މި ވަނީ ޤައުމުގެ މާލީ ހާލަތު ހަރުދަނާކޮށް، ޓެކުސް ނެގޭ ދާއިރާތައް ފުޅާކޮށް، ދައުލަތުގެ އާމްދަނީ އިތުރު ކުރުމުގެ ގޮތުންނެވެ. މާލީ ވުޒާރާގެ ބަޔާނުގައި ބުނެފައިވާ ގޮތުގައި، ބޭރު ޤައުމުތަކުގެ ދަރިވަރުންނަށް ޚާއްޞަކޮށް އެސްއެސްޓީ ނެގޭ ދާއިރާތައް ފުޅާކޮށްފައި މިވަނީ މެލޭޝިޔާގެ ރައްޔިތުންނަށް ދިމާވާ ބުރަ ކުޑަކުރުމުގެ ގޮތުން ކަމަށް ވެސް ރިޕޯޓުތައް ބުނެއެވެ.

އަމިއްލަ ކުންފުނިތަކުން ހިންގާ މަތީ ތަޢުލީމު ފޯރުކޮށްދޭ މަރުކަޒުތަކުން މި ޓެކުހަށް ރަޖިސްޓަރީ ވާން ޖެހޭނީ ޓިޔުޝަން ފީގެ ގޮތުގައި ބޭރު ޤައުމުތަކުގެ ދަރިވަރުންގެ އަތުން އަހަރަކު 14,000 އެމެރިކާ ޑޮލަރަށް ވުރެ ބޮޑު ފީއެއް ނަގާ ނަމައެވެ. މީގެ އިތުރުން، ބޭރު ޤައުމުތަކުގެ ދަރިވަރުންނަށް މަތީ ތަޢުލީމު ފޯރުކޮށްދޭ ހުރިހާ މަރުކަޒަކުން ޓެކުހަށް ރަޖިސްޓަރީ ކުރުން ވެސް އޮތީ ލާޒިމު ކޮށްފައެވެ. އޭގެ ތެރޭގައި ބޭރުގެ ބަސްތައް ދަސްކޮށްދޭ މަރުކަޒުތައް ވެސް ހިމެނެއެވެ.

2025ވަނަ އަހަރު ނިމުމުގެ ކުރިން މެލޭޝިޔާގެ މަތީ ތަޢުލީމު ފޯރުކޮށްދޭ މަރުކަޒުތަކުގައި ތަޢުލީމު ހާސިލު ކުރާ ބޭރު ޤައުމުތަކުގެ ދަރިވަރުންގެ އަދަދު 250,000 އަށްވުރެ އިތުރު ކުރުމަށް އެ ޤައުމުގެ ތަޢުލީމާ ބެހޭ ވުޒާރާއިން އޮތީ އަޒުމު ކަނޑައަޅާފައެވެ. ނަމަވެސް، މަސްރަޙު ދިރާސާ ކުރާ ފަރާތްތަކުން ބުނީ، ބޭރު ޤައުމުތަކުގެ ދަރިވަރުންގެ އަތުން %6ގެ ޓެކުހެއް ނެގުމަށް ނިންމުމާ އެކު، އެ ލަނޑިދަނޑި ހާސިލު ކުރެވުމުގެ ފުރުޞަތު ހަނިވެފައިވާ ކަމުގައެވެ.

މެލޭޝިޔާ ސަރުކާރުގެ މި ނިންމުމާ މެދު އިނގިރޭސިވިލާތުގެ ކަމާ ގުޅޭ އިދާރާއެއް ކަމުގައިވާ ބްރިޓިޝް ކައުންސިލުން ވަނީ ކަންބޮޑުވުން ފާޅުކޮށްފައެވެ. އެ ކައުންސިލުން ބުނީ، މެލޭޝިޔާގެ މަތީ ތަޢުލީމު ފޯރުކޮށްދޭ މަރުކަޒުތަކާ ގުޅިގެން ކޮންމެ އަހަރަކު އިނގިރޭސިވިލާތުގެ ގިނަ އަދަދެއްގެ ދަރިވަރުން މެލޭޝިޔާގެ މަރުކަޒުތަކަށް ފޮނުވަމުންދާ ކަމުގައެވެ. އަދި، އެ ފަދަ ދަރިވަރުންގެ އަތުން އައު ޓެކުހެއް ނެގުމަށް ނިންމުމާ ގުޅިގެން، އެ ޤައުމުގައި މަތީ ތަޢުލީމު ހާސިލު ކުރުމަށް އޮތް ޝައުޤުވެރިކަން ގެއްލިގެންދާނެ ކަމުގައި ވެސް އެ ކައުންސިލުން ބުންޏެވެ.