ހުޅުމާލޭގެ މެކޭނިކަލް ޕާކިންގ ސިސްޓަމްތައް ބޭނުންކުރަން ފަށަނީ

ހުޅުމާލޭގައި ބަހައްޓާފައިވާ މެކޭނިކަލް ޕާކިންގ ސިސްޓަމްތައް ވަރަށް އަވަހަށް ބޭނުންކުރަން ފަށާނެ ކަމަށް ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން އިއްޔެ ހާމަކޮށްފިއެވެ. މިއީ މާލެ ސަރަހައްދުގައި ދިމާވެފައިވާ ޕާކިންގގެ މައްސަލަ ހައްލުކުރުމަށް "މާލެފަހި" ޕްރޮގްރާމުގެ ދަށުން ކުރެވޭ މުހިންމު މަސައްކަތެއް ކަމަށް ވުޒާރާއިން ބުނެފައިވެއެވެ.

ވުޒާރާގެ ޑެޕިއުޓީ މިނިސްޓަރ، ޢަލީ ނިޝާން ވިދާޅުވި ގޮތުގައި، ހުޅުމާލޭ ފުރަތަމަ ފިޔަވަހީގައި މިހާރު ބަހައްޓާފައިވާ ރެކުތައް ދެވަނަ ފިޔަވައްސަށް ބަދަލުކުރުމާ ގުޅޭގޮތުން ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އާ މަޝްވަރާކޮށް، އަގުވެސް ކަނޑައަޅާފައިވެއެވެ. ނަމަވެސް މިކަމަށް ބޮޑު ޚަރަދެއް ހިނގާނެތީއާއި، ފުރަތަމަ ފިޔަވަހީގައި ދިރިއުޅޭ ފަރާތްތަކަށް ދަތިތަކެއް ކުރިމަތިވެދާނެތީ، އެކަން ނުކުރަން ނިންމާފައިވާ ކަމަށް ނިޝާން ހާމަކުރެއްވިއެވެ.

2017 ވަނަ އަހަރު ހަތަރު ފުރޮޅުލީ އުޅަނދުތަކަށް ޚާއްސަކޮށްގެން ހުޅުމާލޭގައި ގާއިމުކުރި މި ޕާކިންގ ސިސްޓަމްތައް މިހާތަނަށް ބޭނުންކުރަން ނުފެށުމަކީ އާންމުންގެ ބޮޑު ކަންބޮޑުވުމެކެވެ. ހުޅުމާލޭ ފުރަތަމަ ފިޔަވަހީގައި 255 އުޅަނދުގެ ޖާގައިގެ 8 ސިސްޓަމް ބަހައްޓާފައިވެއެވެ.

މި ސިސްޓަމްތައް ބޭނުންކުރަން ފެށުމުގެ އިތުރުން، ޕާކިންގގެ މައްސަލައަށް ވަގުތީ ހައްލެއްގެ ގޮތުން ހުޅުމާލޭގައި މިހާރުވެސް ދެ ބިމެއް ވަގުތީ ޕާކިންގ ޒޯނުގެނުގެ ގޮތުގައި ބޭނުންކުރަމުންދާ ކަމަށް ވުޒާރާއިން ފާހަގަކޮށްފައިވެއެވެ.
މި ޕާކިންގ ސިސްޓަމްތައް ބޭނުންކުރަން ފެށުމުން، މާލެ ސަރަހައްދުގައި ދިމާވެފައިވާ ޕާކިންގގެ މައްސަލައަށް ކޮންމެވެސް ވަރެއްގެ ލުޔެއް ލިބިގެންދާނެ ކަމަށް އުންމީދު ކުރެވެއެވެ. ނަމަވެސް، މި މައްސަލައަށް ދާއިމީ ހައްލެއް ހޯދުމަށް އިތުރު ފިޔަވަޅުތަކެއް އަޅަންޖެހޭ ކަމަށް ގިނަ ފަރާތްތަކުން ފާހަގަކުރަމުންދެއެވެ.