ބަންގްލަދޭޝްގެ ސިޔާސީ ޕާޓީ "ޖަމާޢަތެ އިސްލާމީ"ގެ މައްޗަށް އޮތް މަނާ ކުރުން ބަންގްލަދޭޝްގެ ސުޕްރީމް ކޯޓުން ނަގައިފި

ބަންގްލަދޭޝްގެ ކުރީގެ ބޮޑުވަޒީރު ޝެއިޚް ހަސީނާގެ ސަރުކާރުން 10 އަހަރަށްވުރެ ގިނަ ދުވަހުގެ ކުރިން މަނާކުރި އެ ޤައުމުގެ އެންމެ ބޮޑު އިސްލާމީ ޕާޓީގެ ރަޖިސްޓްރޭޝަން އަލުން ދީފިއެވެ.

އާދީއްތަ ދުވަހު ސުޕްރީމް ކޯޓުން ނިންމި މި ނިންމުމާ ގުޅިގެން، "ޖަމާޢަތެ އިސްލާމީ"އަށް މިހާރު އިލެކްޝަން ކޮމިޝަނުގައި ރަސްމީކޮށް ރަޖިސްޓްރީ ކުރެވޭނެއެވެ. މިއީ ވަގުތީ ސަރުކާރުން ޔަގީންކޮށްދީފައިވާ ގޮތުގައި އަންނަ އަހަރުގެ ޖޫން މަހުގެ ކުރިން ބޭއްވުމަށް ހަމަޖެހިފައިވާ އާންމު އިންތިޚާބުގައި ބައިވެރިވުމުގެ މަގު ތަނަވަސްވެގެން ދިޔުމެކެވެ.

ޖަމާޢަތެ އިސްލާމީގެ ވަކީލު ޝިޝިރު މޮނިރު ވިދާޅުވި ގޮތުގައި މި ނިންމުމަކީ 170 މިލިއަން މުސްލިމުން ދިރިއުޅޭ ޤައުމުގައި "ޑިމޮކްރެޓިކް، އިންކްލޫސިވް އަދި ގިނަ ޕާޓީތަކެއް ހިމެނޭ ނިޒާމެއް" ޤާއިމުކުރުމަށް މަގުފަހިވެގެންދާނެ ކަމެކެވެ.

ޕާޓީގެ އިސް ލީޑަރެއް ކަމުގައިވާ އޭޓީއެމް އަޒްހަރުލް އިސްލާމްގެ މައްޗަށް ކުރެވުނު ޙުކުމް ބާތިލުކުރުމަށްފަހު މި ނިންމުން ވަނީ އައިސްފައެވެ. އިސްލާމްގެ މައްޗަށް 2014 ވަނަ އަހަރު މަރުގެ ޙުކުމް އިއްވާފައިވަނީ 1971 ވަނަ އަހަރު ބަންގްލަދޭޝްގެ މިނިވަންކަމަށް ކުރި ހަނގުރާމައިގައި ރޭޕްކުރުމާއި، މަރުގެ ކުށްތަކާއި އަދި ނަސްލު ހަލާކުކުރުމުގެ ދަޢުވާގެ ދަށުންނެވެ.

ޖަމާޢަތެ އިސްލާމީގެ ލީޑަރު ޝަފީޤުއް ރަޙްމާން ވިދާޅުވެފައިވަނީ "އަޅުގަނޑުމެން، ވަކިވަކި ފަރުދުންގެ ގޮތުގައި ނުވަތަ ޕާޓީއެއްގެ ގޮތުގައި ވިޔަސް، ކުށްތަކުން މިންޖެއް ނޫން" ކަމަށެވެ. އަދި "އަޅުގަނޑުމެން ކުށެއް ކޮށްފައިވާނަމަ، މާފަށް އެދެން" ކަމަށްވެސް އެމަނިކުފާނު ވިދާޅުވިއެވެ.

ފާއިތުވި އޯގަސްޓް މަހު ދަރިވަރުންގެ އިސްނެގުމުގައި ހިންގުނު ޤައުމީ އިހުތިޖާޖަކާ ގުޅިގެން ހަސީނާގެ ސަރުކާރު ވައްޓާލުމަށްފަހު، 2013 ވަނަ އަހަރު ހައިކޯޓުން ނެރުނު ޕާޓީގެ ރަޖިސްޓްރޭޝަން ބާތިލުކުރި އަމުރު މުރާޖަޢާކޮށްދިނުމަށް ޕާޓީން އެދިފައިވެއެވެ. 

 77 އަހަރުގެ އުމުރުފުޅުގައި އިންޑިއާއަށް ވަޑައިގެން ހުންނެވި ހަސީނާގެ މައްޗަށް، އދ. އިން ބުނާގޮތުގައި 1،400 މީހުން މަރުވި އިހުތިޖާޖުތަކާ ގުޅިގެން "ސިސްޓަމެޓިކް އެޓޭކް" އެއްގެ ދަޢުވާ ކުރެވި، ޣައިރު ހާޒިރުގައި ޝަރީޢަތް ކުރިއަށްދެއެވެ.