ޚަބަރު
ނުވަ ރަށެއްގެ ޞިއްޙީ މަރުކަޒުތައް އިމާރާތްކުރުމަށް ފެނަކައާ ހަވާލުކޮށްފި
ނުވަ ރަށެއްގެ ޞިއްޙީ މަރުކަޒުތައް އިމާރާތްކުރުމަށް ފެނަކައާ ހަވާލުކުރުން
ހެލްތު މިނިސްޓްރީގައި ބޭއްވުނު ރަސްމިއްޔާތެއްގައި، ރާއްޖޭގެ ނުވަ ރަށެއްގެ ޞިއްޙީ ޚިދުމަތްދޭ ތަންތަނުގެ ޢިމާރާތްކުރުމުގެ މަސައްކަތް ފެނަކަ ކޯޕަރޭޝަނާ ހަވާލުކޮށްފިއެވެ.
މި އެއްބަސްވުމުގައި ހެލްތު މިނިސްޓްރީގެ ފަރާތުން ސޮއިކުރެއްވީ ސްޓޭޓް މިނިސްޓަރ އިސްމާޢިލް ޝަރީފެވެ. އަދި ފެނަކައިގެ ފަރާތުން ސޮއިކުރެއްވީ އެ ކުންފުނީގެ ޑެޕިއުޓީ މެނޭޖިންގ ޑިރެކްޓަރ، މުޙައްމަދު އާރިފެވެ.
މި މަޝްރޫޢުގެ ދަށުން، ދެ ރަށެއްގައި ޞިއްޙީ މަރުކަޒުގެ އައު އިމާރާތް ކުރުމާއި، 7 ރަށެއްގައި އެކްސްޕެންޝަން މަސައްކަތް ކުރުން ހިމެނެއެވެ. އައު އިމާރާތް ކުރެވޭ ދެ ރަށަކީ ހއ. މޮޅަދޫ އާއި ރ. މަޑުއްވަރީއެވެ.
އެކްސްޕެންޝަން މަސައްކަތް ކުރެވޭ ރަށްތަކަކީ ހއ. މުރައިދޫ، ހއ. ތަކަންދޫ، ހދ. ނޭކުރެންދޫ، ރ. ކިނޮޅަސް، ރ. ފައިނު، ރ. ރަސްމާދޫ އަދި ދ. ރިނބުދޫއެވެ.
09 ރަށެއްގެ ޞިއްޙީ ޚިދުމަތްދޭ ތަންތަނުގެ އައު ޢިމާރާތްކުރުމުގެ އެއްބަސްވުމުގައި @TeamFenaka އާއެކު، ރޭ ވަނީ ސޮއިކުރެވިފައެވެ. pic.twitter.com/i5kHVvzg0q
— Ministry of Health (@MoHmv) May 29, 2025
މި މަޝްރޫޢުގެ ޖުމްލަ އަގަކީ 127,701,459.78 ރުފިޔާއެވެ. މީގެ ތެރެއިން އެންމެ ބޮޑު އަގެއް ހިނގާނީ ރ. މަޑުއްވަރީ ޞިއްޙީ މަރުކަޒުގެ އައު ޢިމާރާތުގެ މަސައްކަތަށެވެ. އެ މަސައްކަތުގެ އަގަކީ 28,579,999.99 ރުފިޔާއެވެ. އެންމެ ކުޑަ އަގެއް ހިނގާނީ ރ. ކިނޮޅަސް ޞިއްޙީ މަރުކަޒުގެ އެކްސްޕެންޝަން ޢިމާރާތުގެ މަސައްކަތަށެވެ. އެ މަސައްކަތުގެ އަގަކީ 9,206,428.86 ރުފިޔާއެވެ.
