ފުރިހަމަ ތައްޔާރީތަކަކާއި އެކު ދިވެހީންގެ އުފެއްދުންތެރިކަމުގެ އެންމެ ބޮޑު މައުރަޒު މާދަމާ ފަށަނީ

ބިޒްނަސް ސެންޓަރ ކޯޕަރޭޝަން (ބީސީސީ) އާއި އިކޮނޮމިކް މިނިސްޓްރީ ގުޅިގެން، މިހާތަނަށް ބޭއްވޭ އެންމެ ބޮޑު ދިވެހީންގެ އުފެއްދުންތެރިކަމުގެ މައުރަޒު 2025 މާދަމާ ފެށުމަށް ތައްޔާރުވެއްޖެއެވެ. މި މައުރަޒަކީ އެތައް ސަތޭކަ ދިވެހި ފަންނުވެރިންގެ އުފެއްދުންތައް އެއް ތަނަކުން ފެންނާނެ ފުރުޞަތެކެވެ.

މިއަދު ނޫސްވެރިންނަށް ދެއްކި މައުރަޒުގެ އެންމެ ފަހުގެ ތައްޔާރީތަކާ ގުޅޭގޮތުން މަޢުލޫމާތު ދެއްވަމުން، އިކޮނޮމިކް މިނިސްޓްރީގެ ސްޓޭޓް މިނިސްޓަރު އަބްދުﷲ ސިޔާޒް ވިދާޅުވީ، މި މައުރަޒުގައި އެކި އަތޮޅުތަކުން 300 އަށްވުރެ ގިނަ ބައިވެރިން ހުށަހެޅުންތައް ހުށަހަޅާފައިވާ ކަމަށެވެ. އަދި މި ހަރަކާތުގެ މަޤްޞަދަކީ ދިވެހީންގެ އުފެއްދުންތެރިކަން އިތުރުކޮށް، އުފެއްދުންތެރިކަމަށް އިތުރު ޝައުޤުވެރިކަމެއް ގެނައުމާއި، ވިޔަފާރިއަށް ފަހި މާޙައުލެއް ޤާއިމުކޮށްދިނުން ކަމުގައި ފާހަގަކުރެއްވިއެވެ.

މައުރަޒު ކުރިއަށްދާނީ ދެ ބަޔަކަށް ބަހާލައިގެންނެވެ. އެއީ ވާދަކުރުމުގެ ބަޔާއި ޑިސްޕްލޭއަށް އެކަނި ބަހައްޓާ ބައެވެ. ވާދަކުރުމުގެ ބަޔަށް 3،000 އަށްވުރެ ގިނަ ހުށަހެޅުންތައް ލިބިފައިވާ ކަމަށް ސިޔާޒް ހާމަކުރެއްވިއެވެ. އަދި ރައީސުލްޖުމްހޫރިއްޔާ މުޙައްމަދު މުޢިއްޒުގެ އަމާޒަކީ މި މައުރަޒު އަހަރުން އަހަރަށް ފުޅާކޮށް، ބައިނަލްއަޤްވާމީ ފެންވަރުގެ މައުރަޒަކަށް ހެދުން ކަމުގައިވެސް ވިދާޅުވިއެވެ.

މައުރަޒުގައި ބައިވެރިކުރާ ތަކެތީގެ ވަނަތައް ހޮވާ މިރޭ ވަނީ އިނާމުދިނުމަށް ޚާއްސަ ރަސްމިއްޔާތެއް ސޯޝަލް ސެންޓަރުގައި ބާއްވާފައެވެ. މިރަސްމިއްޔާޓު ޝަރަފުވެރިކޮށްދެއްވީ ރައީސުލްޖުމްހޫރިއްޔާ ޑރ މުޙައްމަދު މުޢިއްޒުއެވެ. ވަނަތައް ކަނޑައަޅާފައިވަނީ އެކަމަށް ޚާއްޞަ ޕެނަލަކުން ފަނޑިޔާރުކަން ކޮށްގެން ކަމަށް ސިޔާޒް ވިދާޅުވިއެވެ. މާދަމާ ރޭ ހުޅުވޭ މި މައުރަޒު، މި މަހުގެ 23 ވާހުކުރުދުވަހުން 31 މެއިގެ ނިޔަލަށް ހުޅުމާލޭ ސެންޓްރަލް ޕާކުގައި ކުރިއަށްދާނެއެވެ.

ރާއްޖޭގެ ހުރިހާ އަތޮޅުތަކުން މި މައުރަޒުގައި ބައިވެރިވެފައިވާއިރު، އެންމެ ގިނަ ހުށަހެޅުންތައް ހުށަހަޅާފައިވަނީ ބ. ތުޅާދޫން ކަމަށް ސިޔާޒް ފާހަގަކުރެއްވިއެވެ. 15 ދާއިރާއަކުން 81 ގިންތިއަކަށް ކުރިއަށްދާ މި މައުރަޒުގައި އެންމެ ގިނައިން ބައިވެރިކޮށްފައިވަނީ ލިޔެލާ ޖެހުމުގެ އުފެއްދުންތައް ކަމަށްވެސް އޭނާ ވިދާޅުވިއެވެ.
މި މައުރަޒުގެ ޚާއްޞަ ކަމެއްގެ ގޮތުގައި ސިޔާޒް ފާހަގަކުރެއްވީ  ޑިޖިޓަލް އުފެއްދުންތަކާއި ޚިދުމަތްތައްވެސް ދައްކާލުމެވެ. މީގެ އިތުރުން، މި މައުރަޒުގައި ދިވެހި ބޭސްވެރިކަމާއި، ގަހަނާ އަދި ދިވެހީންގެ ތަފާތު ހުނަރުތަކާއި އުފެއްދުންތައް ފެންނާނެ ކަމަށް އޭނާ ވިދާޅުވިއެވެ.
"މިއީ ދިވެހީންގެ އުފެއްދުންތައް އެއް ފުރާޅެއްގެ ދަށުން ފެންނާނެ އެންމެ ބޮޑު މައުރަޒު," ސިޔާޒް ވިދާޅުވިއެވެ. "މި މައުރަޒުންޒުން ދިވެހީންގެ އުފެއްދުންތެރިކަމުގެ ފުރިހަމަ މަންޒަރެއް ފެނިގެންދާނެ."
މި މައުރަޒަކީ ދިވެހި އުފެއްދުންތެރިންނަށް އެމީހުންގެ ހުނަރާއި ޤާބިލުކަން ދައްކާލުމުގެ މުހިންމު ފުރުޞަތެއް ކަމަށާއި، މީގެ ސަބަބުން ދިވެހި އުފެއްދުންތަކަށް އިތުރު ވިޔަފާރީގެ ފުރުޞަތުތައް ހުޅުވިގެންދާނެ ކަމަށް އިކޮނޮމިކް މިނިސްޓްރީން އުންމީދުކުރެއެވެ.
މައުރަޒު ބެލުމަށް ޢާންމުންނަށް ހުޅުވާލެވިފައިވާއިރު، ސަރުކާރުގެ އިސް ބޭފުޅުންނާއި، ވިޔަފާރިވެރިން އަދި ބޭރުގެ ޑިޕްލޮމެޓުން މން މި މައުރަޒު ބައްލަވާލެއްވުމަށް ވަޑައިގަންނަވާނެ ކަމަށް ބެލެވެއެވެ. މީގެއިތުރުން 23 އަދި 24 ވަނަ ދުވަހުގެ ރޭ ޚާއްސަކުރެވިފައިވަނީ ދިވެހި ސަޤާފީ މުނިފޫހިފިލުވުމުގެ އައިޓަމްތަކާއި އެކުގައެވެ.