ސްޓެލްކޯ އާއި ވާޓްސިލާ ގުޅިގެން ކިއުއީއެޗްއެސް ސެޝަނެއް ބާއްވައިފި

ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އާއި އެ ކުންފުނީގެ މުހިންމު ބައިވެރިއެއް ކަމުގައިވާ ފިންލޭންޑްގެ ކުންފުނި ވާޓްސިލާ ގުޅިގެން، ސްޓެލްކޯގެ މުވައްޒަފުންނަށް ޚާއްޞަކޮށްގެން ކޮލިޓީ، އެންވަޔަރަންމަންޓަލް، ހެލްތު އެންޑް ސޭފްޓީ (ކިއުއީއެޗްއެސް) ސެޝަނެއް ބާއްވައިފިއެވެ.
މި ސެޝަން ބޭއްވުނީ ސްޓެލްކޯގެ މައި އޮފީހުގައެވެ. ސެޝަނުގައި ވާޓްސިލާގެ އިސްވެރިންނާއި، ސްޓެލްކޯގެ މެނޭޖިންގ ޑިރެކްޓަރ ހުސެއިން ފަހުމީ ހިމެނޭ ގޮތަށް ސްޓެލްކޯގެ އިސްވެރިން ބައިވެރިވެ ވަޑައިގެންނެވިއެވެ.
ސްޓެލްކޯއިން މައުލޫމާތު ދެއްވި ގޮތުގައި، މި ސެޝަނަކީ އީޖާދީ ކަންކަމާއި، ދެމެހެހެއްޓެނިވި ގޮތެއްގައި ތަރައްގީވުމާއި، ހިންގުމުގެ ފެންވަރު މަތިކުރުމަށް ދެ ކުންފުނީގެ ދެމެދުގައި އޮތް ޒަމާންވީ ގުޅުމުގައި ލިބުނު ވަރަށް ބޮޑު ކާމިޔާބީއެކެވެ.
މި ސެޝަންގައި ވާޓްސިލާއިން ވަނީ ސްޓެލްކޯއަށް 75 އަހަރު ފުރުމުގެ މުނާސަބަތުގައި ސްޓެލްކޯގެ އަގު ވަޒަންކޮށް ހަނދާނީ ފިލައެއް އަރުވާފައެވެ. އަދި ސްޓެލްކޯއިން ވެސް ވަނީ ވާޓްސިލާ އާ އެކު އޮތް 10 އަހަރުގެ ކާމިޔާބު ގުޅުމުގެ އަގު ވަޒަންކޮށް، ވާޓްސިލާއަށް ހަނދާނީ ފިލައެއް އަރުވާފައެވެ.

The Quality, Environmental, Health & Safety (QEHS) Session, held in collaboration with our esteemed partner Wärtsilä, marked a key milestone in our enduring partnership built on a shared commitment to innovation, sustainability, and operational excellence.

As part of the… pic.twitter.com/G4EqJipDbK

— STELCO (@STELCOMALDIVES) May 21, 2025

ސްޓެލްކޯގެ ފެސިލިޓީތަކުގައި މިހާރުވެސް ޖުމްލަ 86 މެގަވޮޓްގެ ކެޕޭސިޓީގެ 14 ވާޓްސިލާ އިންޖީނު ހިންގަމުން ގެންދެއެވެ. މި އިންޖީނުތަކަކީ ރާއްޖޭގެ ހަކަތައިގެ ވިއުގަ ހަރުދަނާކޮށް، ރާއްޖޭގެ ތަރައްގީއަށް މުހިންމު ދައުރެއް އަދާކުރާ އިންޖީނުތަކެކެވެ.
ސްޓެލްކޯ އާއި ވާޓްސިލާ އާ ދެމެދު އޮންނަ ގުޅުން ފެށިފައިވަނީ 1990 ގައި ސްޓެލްކޯއިން މާލޭގެ ޕަވަރ ސްޓޭޝަނަށް ވާޓްސިލާގެ ފުރަތަމަ އިންޖީނުތައް ގަތުމާ އެކުގައެވެ. އޭގެ ފަހުން މި ގުޅުން ވަނީ އިތުރަށް ފުޅާވެފައެވެ. މިހާރު ރާއްޖޭގައި ވާޓްސިލާއިން ފޯރުކޮށްދީފައިވާ ޖުމްލަ ކަރަންޓު އުފެއްދުމުގެ ޤާބިލުކަން ގާތްގަނޑަކަށް 100 މެގަވޮޓަށް އަރައެވެ.