އިންޑިޔާ އާއި ޕާކިސްތާނުގެ މެދުގައި ހަނގުރާމަ ހުއްޓާލުމަށް އެއްބަސްވެއްޖެ

އިންޑިޔާގެ މިނިސްޓްރީ އޮފް އެކްސްޓާނަލް އެފެއާޒް (އެމްއީއޭ) އިން ވަނީ އިންޑިޔާ އާއި ޕާކިސްތާނުގެ މެދުގައި ވަގުތުން ހަނގުރާމަ ހުއްޓާލުމަށް އެއްބަސްވެފައިވާ ކަމަށް ރަސްމީކޮށް ކަށަވަރުކޮށްދީފައެވެ. މިއީ ދެ ގައުމުގެ އިސް ފަންތީގެ އަސްކަރީ ބައްދަލުވުމަކަށްފަހު ނިންމާފައިވާ ނިންމުމެކެވެ.

އިންޑިޔާގެ އެކްސްޓަރނަލް އެފެއާޒްއާ  ބެހޭ މިނިސްޓްރީން ހާމަކުރި ގޮތުގައި މިއަދު ހަވީރު 4:30 ގައި ފެށުނު މި ހަނގުރާމަ ހުއްޓާލުމުގެ އެއްބަސްވުމުގައި އެއްގަމާއި، ކަނޑާއި، ވައިގެ ހަރަކާތްތަކާއި، އަދި ދެ ގައުމުގެ ބޯޑަރުތަކުގައި ހިންގާ ހުރިހާ އަސްކަރީ ހަރަކާތްތައް ހިމެނެއެވެ.

އިންޑިޔާގެޔާގެ އެމްއީއޭގެ ތަރުޖަމާނެއް ވިދާޅުވި ގޮތުގައި މިކަން ވަނީ ޕާކިސްތާނުގެ ޑިރެކްޓަރ ޖެނެރަލް އޮފް މިލިޓަރީ އޮޕަރޭޝަންސް (ޑީޖީއެމްއޯ) އާއި އޭނާގެ އިންޑިޔާގެ ނަޒީރާ ދެމެދު ކުރެވުނު ފޯނު މުޢާމަލާތަކަށް ފަހުގައެވެ. މި މުޢާމަލާތުގައި ދެފަރާތުން ވެސް ވަނީ ގައުމުތަކުގެ މެދުގައި އޮތް ހަމަނުޖެހުން ކުޑަކޮށް، އިތުރު އަނިޔާވެރިކަން ހުއްޓުވުމަށް ބޭނުންވާ ކަމަށް ބުނެފައެވެ.

"ދެ ގައުމުން ވެސް މި ހަނގުރާމަ ހުއްޓާލުމުގެ އެއްބަސްވުމަށް ފުރިހަމައަށް ޢަމަލުކުރާނެ، އަދި އެއްވެސް ފަރާތަކުން އަނެއް ފަރާތަކަށް ހަމަލާއެއް ނުދޭނެ،" އިންޑިޔާގެ ތަރުޖަމާނު ވިދާޅުވިއެވެ.

މީގެ އިތުރުން، އިންޑިޔާ އާއި ޕާކިސްތާނުގެ މެދުގައި ދެމެހެއްޓެނިވި ސުލްްހައެއް ގާއިމުކުރުމަށްޓަކައި މާދަމާ ވަކި ވަކި ތަނެއްގައި ރަސްމީ މަޝްވަރާތަކެއް ބޭއްވުމަށް ހަމަޖެހިފައިވާ ކަމަށް ވެސް އެ ތަރުޖަމާނު ހާމަކުރެއްވިއެވެ. އަދި މޭ 12 ގައި އިތުރު ޑީޖީއެމްއޯ ފެންވަރުގެ މަޝްވަރާއެއް ބޭއްވުމަށް ރޭވިފައިވާ ކަމަށާއި، މި މަޝްވަރާގައި ކުރިއަށް އޮތް ދުވަސްތަކުގައި އަޅަންޖެހޭ ފިޔަވަޅުތަކާއި އިތުބާރު އުފެއްދުމުގެ ފިޔަވަޅުތަކާ ބެހޭގޮތުން މަޝްވަރާކުރެވޭނެ ކަމަށް ވެސް އޭނާ ވިދާޅުވިއެވެ.

މި ހަނގުރާމަ ހުއްޓާލުމުގެ އެއްބަސްވުމަކީ ފާއިތުވި ދުވަސްތަކުގައި އިތުރުވަމުން އައި ހަމަނުޖެހުންތަކާއި އަސްކަރީ ހަރަކާތްތަކަށް ފަހު އައިސްފައިވާ އެއްބަސްވުމެކެވެ.