ޔުމްނުއާ ސުވާލުކުރުމުގެ ފުރުޞަތު މިހާތަނަށް އަދި ނުލިބޭ، ތަހުޤީޤު ދަނީ ކުރިއަށް: ފުލުހުން

މިދިޔަ މަހުގެ 18 ވަނަ ދުވަހު ހ. މިޓާޒް ގޭގެ ފުރާޅު މައްޗަށް ވެއްޓިފައި އޮއްވާ ފެނުނު ހައްވާ ޔުމްނުއާ ސުވާލުކުރުމުގެ ފުރުޞަތު އަދި ލިބިފައި ނުވާކަމަށް ދިވެހި ފުލުހުންގެ ޚިދުމަތުން ވިދާޅުވެއްޖެއެވެ.

ފުލުހުން ވިދާޅުވީ، ހ. މިޓާޒް ގޭގެ ފުރާޅު މައްޗަށް އަންހެނަކު ވެއްޓުނު މައްސަލަ ފުލުހުންނަށް އެ ދުވަހު ރިޕޯޓުކޮށްފައިވާކަމަށެވެ. އަދި ފުލުހުން ސީންއަށް އެޓެންޑްވި ހިސާބުން ފެށިގެންވެސް އަންހެން މީހާގެ ބަހެއް ހޯދުމަކީ ތަހުގީގަށް މުހިންމު ކަމެއްގެ ގޮތުގައި ދެކިވަޑައިގަންނަވާތީ، އެ ފުރުޞަތު ހޯދުމަށް މަސައްކަތް ކުރައްވާފައިވާކަމަށް ފުލުހުން މަޢުލޫމާތުދެއެވެ. 

ނަމަވެސް، އަންހެން މީހާގެ ޞިއްޙީ ޙާލަތު ހުރި ގޮތުންނާއި، އިތުރު އެކި ސަބަބުތަކާ ހުރެ އަންހެން މީހާއާއި ސުވާލުކުރުމުގެ ފުރުޞަތު މިހާތަނަށް ލިބިފައި ނުވާކަން ފުލުހުން ވަނީ ފާހަގަކުރައްވާފައެވެ. އަދި އެކަމަށް މަގުފަހިވީހާ އަވަހަކަށް ތަހުޤީޤުން އަންހެން މީހާއާއި ސުވާލުކުރުމަށް ބޭނުންވާކަމަށް ފުލުހުން ވަނީ ވިދާޅުވެފައެވެ.

މީގެ އިތުރުން ފުލުހުން ވިދާޅުވީ، މި މައްސަލައިގެ ތަހުޤީޤު މިހާރު ވެސް ހިނގަމުންދާ ކަމަށެވެ. އެގޮތުން މި މައްސަލައާއި ގުޅިގެން ސުވާލުކުރަންޖެހޭ  ފަރާތްތަކާ ސުވާލުކޮށް، އެ ފަރާތްތަކުން ފުލުހުންނަށް ދޭ މައުލޫމާތު ކަށަވަރުކުރުމަށް ތަހުޤީޤުން ގިނަ މަސައްކަތްތަކެއް ކުރަމުންދާކަމަށް ފުލުހުން ވަނީ ވިދާޅުވެފައެވެ.