އަހަރުގެ ފުރަތަމަ 10 މަހު މުދަލު ޒަކާތުގެ ގޮތުގައި ލިބުނު އަދަދު އިތުރުވެއްޖެ

މިއަހަރުގެ ފުރަތަމަ 10 މަސްދުވަހުގެ ތެރޭގައި މުދަލު ޒަކާތުގެ ގޮތުގައި ދައުލަތަށް ލިބުނު އާމްދަނީ، ކުރީ އަހަރުގެ އެ މުއްދަތާ އަޅާބަލާއިރު 23 އިންސައްތަ އިތުރުވެފައިވާކަން މޯލްޑިވްސް އިންލެންޑް ރެވެނިއު އޮޓޯރިޓީ (މީރާ) ގެ ހިސާބުތަކުން ދައްކައިފިއެވެ.

މީރާއިން އާންމުކޮށްފައިވާ އޮކްޓޫބަރު މަހުގެ ނިޔަލަށް ހުރި މާލީ ރިޕޯޓުގައިވާ ގޮތުން، މިއަހަރުގެ ފުރަތަމަ 10 މަހު މުދަލު ޒަކާތުގެ ގޮތުގައި 114.9 މިލިއަން ރުފިޔާ ވަނީ ބަލައިގެންފައެވެ. މިދިޔަ އަހަރުގެ އެ މުއްދަތުގައި މުދަލު ޒަކާތުގެ ގޮތުގައި ލިބިފައިވަނީ 93.4 މިލިއަން ރުފިޔާއެވެ. އެހެންނަމަވެސް، ވަކިން އޮކްޓޫބަރު މަހަށް ބަލާއިރު މިދިޔަ އަހަރުގެ އޮކްޓޫބަރު މަހު ލިބުނު 5.5 މިލިއަން ރުފިޔާއާ އަޅާބަލާއިރު، މިއަހަރުގެ އޮކްޓޫބަރު މަހު ލިބިފައިވަނީ 5.2 މިލިއަން ރުފިޔާއެވެ.

މޯލްޑިވްސް ޒަކާތު ހައުސްއިން ނެރެފައިވާ މިއަހަރުގެ ތިންވަނަ ކުއާޓަރުގެ ތަފާސްހިސާބުތަކަށް ބަލާއިރު، އެ ކުއާޓަރުގައި އެކަނިވެސް މުދަލު ޒަކާތުގެ ގޮތުގައި 29.86 މިލިއަން ރުފިޔާ ވަނީ ލިބިފައެވެ. މިއީ 2025 ވަނަ އަހަރުގެ ތިންވަނަ ކުއާޓަރާ އަޅާބަލާއިރު 13.9 އިންސައްތައިގެ ކުރިއެރުމެކެވެ.

ޒަކާތު ހައުސްގެ ސްޓްރެޓެޖިކް އަމާޒަކީ 2028 ވަނަ އަހަރުގެ މެދާ ހަމައަށްދާއިރު މުދަލު ޒަކާތުގެ ގޮތުގައި ލިބޭ އަދަދު ބޮޑުތަނުން އިތުރުކުރުމެވެ. މި އަމާޒަށް ވާސިލުވުމަށްޓަކައި އަހަރަކު ލިބޭ ޖުމްލަ ޒަކާތުގެ 25 އިންސައްތައަކީ ކުންފުނިތަކާއި ބޮޑެތި ވިޔަފާރިތަކުން ދައްކާ މުދަލު ޒަކާތް ކަމުގައި ހެދުމަށް އެ އިދާރާއިން އަންނަނީ ޚާއްޞަ މަސައްކަތްތަކެއް ކުރަމުންނެވެ. މީގެއިތުރުން، މުދަލު ޒަކާތުގެ ގޮތުގައި ލިބޭ އަދަދު ކޮންމެ އަހަރަކު 10 އިންސައްތަ އިތުރުކުރުމަކީވެސް ޒަކާތު ހައުސްގެ މުހިންމު ލަނޑުދަނޑިއެކެވެ.

މުދަލު ޒަކާތަކީ ތިމާގެ މިލްކިއްޔާތުގައި ހުރި މުދަލުގެ އަގު ވަކި މިންވަރެއްގައި ހުރެ، އަހަރު ހަމަވުމުން އޭގެ 2.5 އިންސައްތަ ނެރުން ދީނީގޮތުން ވާޖިބުވާ އަޅުކަމެކެވެ. ރާއްޖޭގައި މިވަގުތު މުދަލު ޒަކާތް ވާޖިބުވާ ނިސާބުގެ ގޮތުގައި ކަނޑައަޅާފައިވަނީ 19،266.10 ރުފިޔާއެވެ.