ޚަބަރު
މިހާތަނަށް ރާއްޖެއަށް އެންމެ ދިގު ދަތުރެއް ކުރި ކްރޫޒް ލައިނަރއަށް އިމިގްރޭޝަނުން ކްލިއަރެންސް ދީފި
އެމްއެސްސީ މެގްނިފިކާ ފޮޓޯ:އިމިގްރޭޝަން
މިހާތަނަށް ރާއްޖެއަށް އެންމެ ދިގު ދަތުރެއް ކުރި ކްރޫޒް ލައިނަރއަށް އިމިގްރޭޝަނުން ކްލިއަރެންސް ދީފިއެވެ. "އެމްއެސްސީ މެގްނިފިކާ" ނަމަކަށް ކިޔާ މި ކްރޫޒް ލައިނަރ ރާއްޖެ އައީ މިދިޔަ ބުރާސްފަތި ދުވަހުއެވެ.
އިމިގްރޭޝަނުން މަޢުލޫމާތު ދެއްވިގޮތުގައި މި ކްރޫޒް ލައިނަރ ރާއްޖެ އައީ މިދިޔަ މަހުގެ 27 ވަނަ ދުވަހު އޮސްޓްރޭލިއާގެ ފްރެމެންޓަލް ޕާތުން ފުރައިގެންނެވެ. ޕެސިފިކް ކަނޑު ހުރަސްކޮށް އިންޑިއާ ކަނޑަށް ކުރި މި ދަތުރަކީ، އިމިގްރޭޝަނުން ކްލިއަރެންސް ދިން އެންމެ ދިގު ސީޕޯޓު ދަތުރު ކަމަށް އެ އިދާރާއިން ވަނީ ހާމަކޮށްފައެވެ.
Seaport Division's En-Route Clearance Service for MSC Magnifica: Departed from Fremantle-Perth, Australia on 27th Mar 2025 and arrived in Malé, Maldives on 3rd April 2025. With 1,866 passengers and 952 crew members, this marks the longest trip for Seaport en-route clearance,… pic.twitter.com/y7oMtNSIja
— Maldives Immigration (@ImmigrationMV) April 6, 2025
އެމްއެސްސީ މެގްނިފިކާގައި ދަތުރުކުރި 2،818 ފަތުރުވެރިންނަށް އިމިގްރޭޝަނުން ވަނީ ކްލިއަރެންސް ދީފައެވެ. މީގެ ތެރޭގައި ހިމެނެނީ 1،866 ފަސިންޖަރުންނާއި 952 ކްރޫ މެންބަރުންނެވެ.
ރާއްޖެއަކީ ކްރޫޒް ލައިންތަކުގެ މެދުގައި އަބަދުވެސް މަޤްބޫލު މަންޒިލެއްގެ ގޮތުގައި ފާހަގަކުރެވެއެވެ. ކޮންމެ އަހަރަކުވެސް ރާއްޖެއަށް ގިނަ އަދަދެއްގެ ކްރޫޒް ލައިނަރުތައް ޒިޔާރަތްކުރެއެވެ. އެމްއެސްސީ މެގްއެސްސީ މެގްނިފިކާއަކީ މިއަހަރު ރާއްޖެއަށް އައި 8 ވަނަ ކްރޫޒް ލައިނަރެވެ.
ކްރޫޒް ލައިންތަކުގެ މެދުގައި ރާއްޖޭގެ މަޤްބޫލުކަން އިތުރުވަމުންދާއިރު، ސަރުކާރުން މަސައްކަތް ކުރައްވަނީ ރާއްޖޭގެ ތިން ސަރަހައްދެއްގައި ކްރޫޒް ލައިނަރުތަކަށް ޚާއްޞަ ޖެޓީތަކެއް ތަރައްޤީކުރުމަށެވެ. މި ދާއިރާއިން ގިނަ މަސައްކަތްތަކެއް ކުރައްވަމުން ގެންދަވާކަމަށް ސަރުކާރުން ވަނީ ހާމަކުރައްވާފައެވެ.
ރާއްޖެއަށް އަންނަ ފަތުރުވެރިންގެ އަދަދަށްވެސް ބޮޑު ކުރިއެރުމެއް ލިބިފައިވާއިރު، މިއަހަރުގެ މިހާތަނަށް 660،000 އަށްވުރެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ. ސަރުކާރުން މިއަހަރަށް އަމާޒު ހިފާފައިވަނީ ރާއްޖެއަށް 2.3 މިލިއަން ފަތުރުވެރިން ގެނައުމަށެވެ.
