ސޫރިޔާގެ ސަރުކާރަށް ފުރަތަމަ ފަހަރަށް ބޮޑެތި ބަދަލުތަކެއް ގެނެސްފި

ސޫރިޔާގެ އިންތިގާލީ ރައީސް އަހުމަދު އަލް-ޝަރާ، އެގައުމުގެ ސަރުކާރުގެ މުހިންމު މަގާމުތަކަށް ބޮޑެތި ބަދަލުތަކެއް ގެންނަވައިފިއެވެ.

މިއީ 2024 ވަނަ އަހަރުގެ ޑިސެމްބަރު މަހު ބައްޝާރުލް އަސަދުގެ ވެރިކަން ވެއްޓުނު ފަހުން ސަރުކާރަށް މިފަދަ ބަދަލުތަކެއް ގެނައި ފުރަތަމަ ފަހަރެވެ. ދައުލަތުގެ މީޑިއާ އެޖެންސީ (ސާނާ) އިން ރިޕޯޓްކޮށްފައިވާ ގޮތުގައި، މި ބަދަލުތަކުގެ ތެރޭގައި ރައީސްގެ އޮފީހުގެ އިސްވެރިޔާގެ މަގާމުގައި ހުންނެވި ރައީސްގެ ކޮއްކޮ މާހިރު މަގާމުން ވަކިކުރުން ހިމެނެއެވެ.

ރައީސް އަލް-ޝަރާ ވަނީ ރިޔާސީ ގަރާރެއްގެ ދަށުން، ރައީސް އޮފީހުގެ ސެކްރެޓަރީ ޖެނެރަލްގެ މަގާމަށް ހޮމްސްގެ ކުރީގެ ގަވަރުނަރު އަބްދުލް ރަހްމާން ބަދުރުއްދީން އަލް-އާމާ އައްޔަންކުރައްވާފައެވެ. މީގެ ކުރިން މި މަގާމުގައި ހުންނެވި ރައީސްގެ ކޮއްކޮ މާހިރު އައްޔަންކުރުމާ ގުޅިގެން، އާއިލީ ނުފޫޒު ފަތުރާކަމުގެ ތުހުމަތުތައް ސަރުކާރަށް ވަނީ އަމާޒުވެފައެވެ. މީގެ އިތުރުން، އިންފޮމޭޝަން މިނިސްޓަރުގެ މަގާމަށް ޚާލިދު ޒައުރޫރު އައްޔަންކުރައްވާފައިވާއިރު، އެގްރިކަލްޗަރ މިނިސްޓަރުގެ މަގާމަށް އައްޔަންކުރެއްވީ ބާސިލް ސުވައިދާންއެވެ.

ސަރުކާރުގެ ވަޒީރުންގެ އިތުރުން، ހޮމްސް، ގުނައިތުރާ އަދި ތެލުގެ މުއްސަނދިކަން ލިބިފައިވާ ދީރު އަޒް-ޒޫރު ޕްރޮވިންސްގެ ގަވަރުނަރުން ވެސް ވަނީ ބަދަލުކޮށްފައެވެ.

މި ބަދަލުތައް ގެނެސްފައި މިވަނީ، ސަރުކާރުގެ އިސް މަގާމުތަކަށް ރައީސްގެ ގާތް ރަހުމަތްތެރިން އައްޔަންކުރައްވާފައިވާ ކަމަށް ބުނެ އާންމުންގެ ފާޑުކިޔުންތައް އަމާޒުވެފައިވާ ދަނޑިވަޅެއްގައެވެ. އަދި ގައުމުގެ އިގްތިސާދީ ހާލަތު ގޯސްވުމާއި، ހިންގުމުގެ ނިޒާމު ބަލިކަށިވުމުގެ ސަބަބުން ފަހަކަށް އައިސް މުޒާހަރާތަކާއި ސޯޝަލް މީޑިއާ ކެމްޕޭންތައް ވެސް ވަނީ އިތުރުވެފައެވެ.

ސަރުކާރަށް ގެނައި ބަދަލުތަކުގެ އިތުރުން، އަސަދުގެ ދައުރުގައި ހިނގާފައިވާ އިންސާނިއްޔަތާ ހިލާފު އަމަލުތަކަށް އިންސާފު ހޯދައިދިނުމުގެ މަސައްކަތް ވެސް ސަރުކާރުން ވަނީ ފަށާފައެވެ. އެގޮތުން، 2011 ވަނަ އަހަރުގެ މުޒާހަރާތަކާ ދެކޮޅަށް އަނިޔާވެރި އަމަލުތައް ހިންގި ކަމަށް ތުހުމަތުކުރެވޭ އާތިފް ނަޖީބުގެ ޝަރީއަތް މިދިޔަ މަހު ވަނީ ދިމިޝްގުގައި ފަށާފައެވެ. އޭނާއަކީ ބައްޝާރުލް އަސަދުގެ ދެބެންގެ ދެދަރި ކޮއްކޮއެކެވެ.

މި މައްސަލައިގައި ކުރީގެ ރައީސް ބައްޝާރުލް އަސަދާއި އޭނާގެ ކޮއްކޮ މާހިރުގެ މައްޗަށް ވެސް ވަނީ ޣައިރު ހާޒިރުގައި ދައުވާ އުފުލާފައެވެ. އެ ބޭފުޅުންގެ މައްޗަށް ކުރެވޭ ތުހުމަތުތަކުގެ ތެރޭގައި މީހުން މެރުމާއި، އަނިޔާކުރުމާއި، ފޭރުމުގެ އިތުރުން މަސްތުވާތަކެތީގެ ވިޔަފާރިކުރުން ހިމެނެއެވެ. ސޫރިޔާގައި 14 އަހަރަށް ދެމިގެންދިޔަ ދާޚިލީ ހަނގުރާމައިގައި ގާތްގަނޑަކަށް ބައި މިލިއަން މީހުން ވަނީ މަރުވެފައެވެ.