ހުޅަނގު އައްސޭރީގައި އިސްރާއީލްގެ ވަޒަންވެރިން ގެތަކާއި އުޅަނދުތަކުގައި ރޯކޮށް ބޮޑެތި ގެއްލުންތަކެއް ދީފި

އިސްރާއީލުން ހިފާފައިވާ ފަލަސްތީނުގެ ހުޅަނގު އައްސޭރީގެ އެކި ސަރަހައްދުތަކަށް އިސްރާއީލުގެ ހަރުކަށި ވަޒަންވެރިން ވަދެގަނެ، އާންމުންގެ ގެދޮރާއި އުޅަނދުތަކުގައި ރޯކޮށް ބޮޑެތި ގެއްލުންތަކެއް ދީފިއެވެ. މި ހަމަލާތަކުގައި ފަލަސްތީނުގެ ބައެއް ރައްޔިތުން ޒަޚަމްވެފައިވާ ކަމަށް ރިޕޯޓުތައް ބުނެއެވެ.

ފަލަސްތީނުގެ ރަސްމީ ނިއުސް އެޖެންސީ 'ވާފާ' އިން ރިޕޯޓުކޮށްފައިވާ ގޮތުގައި، ހޮނިހިރު ދުވަހުގެ ރޭ އިސްރާއީލުގެ ވަޒަންވެރިން ވަނީ ޖެނިންގެ ދެކުނުން އޮންނަ އަލް-ފަންދަގުމިއްޔާ އަދި ސީލަތު އަލް-ދަހްރު އަވަށަށް ވަދެގަނެފައެވެ. އަލް-ފަންދަގުމިއްޔާގައި ވަޒަންވެރިން ވަނީ ގެތަކާއި އުޅަނދުތަކުގައި ރޯކޮށް، ގިނަ އަދަދެއްގެ ގޭގޭގެ ކުޑަދޮރުތައް ތަޅާލާފައެވެ. މި ހަމަލާތަކާ ދެކޮޅަށް ފަލަސްތީނު ރައްޔިތުން ނުކުމެ އަލިފާން ނިއްވުމަށް މަސައްކަތް ކޮށްފައިވެއެވެ.

ސީލަތު އަލް-ދަހްރުގައި ވަޒަންވެރިން ވަނީ އާންމުންގެ ގެތަކަށް އަމާޒުކޮށް ހަމަލާދީ، އެތަނުން އެކަކަށް ޖިސްމާނީ އަނިޔާކޮށް ޒަޚަމްކޮށްލާފައެވެ. އަލްޖަޒީރާއިން ކަށަވަރުކޮށްފައިވާ ވީޑިއޯ ފޫޓޭޖްތަކުން ފެންނަ ގޮތުގައި، އެ އަވަށުގެ ގެތަކުގެ އެތެރޭގައި ބޮޑެތި އަލިފާންގަނޑުތައް ރޯވެފައި ހުއްޓެވެ.

ހެބްރޮންގެ ދެކުނުން އޮންނަ މަސާފަރު ޔައްތާ ސަރަހައްދަށް ވެސް ވަޒަންވެރިން ވަނީ އިސްރާއީލް ސިފައިންގެ ހިމާޔަތުގައި ވަދެގަނެފައެވެ. މި ހަމަލާގައި ފަލަސްތީނުގެ ދެ މީހަކު ޒަޚަމްވެފައިވާއިރު، ތިން މީހަކު ވަނީ ހައްޔަރުކޮށްފައެވެ. މީގެ އިތުރުން ނާބްލަސްގެ ދެކުނުން އޮންނަ ގަރްޔޫތު އަދި ޖަލޫދު އަވަށަށް ވެސް ހަމަލާދީ، ޖަލޫދުގައި ހުރި ފޯ-ވީލް ޑްރައިވް އުޅަނދެއް އެއްކޮށް އަންދާލާފައިވެއެވެ.

ރާމަﷲ އާއި ބެތުލެހެމްގެ މަގުތަކުގައި ވެސް ވަޒަންވެރިން ވަނީ ފަލަސްތީނުގެ އުޅަނދުތަކަށް އަމާޒުކޮށް އުދުވާނީ އަމަލުތައް ހިންގާފައެވެ. ސަލްފިޓްގެ ހުޅަނގުން އޮންނަ ހާރިސް އަވަށުގެ މައި މަގުގައި ވަޒަންވެރިން އެއްވެ، ދަތުރުކުރި އުޅަނދުތަކަށް އަމާޒުކޮށް އޮއްގަލުން ހަމަލާދީފައިވެއެވެ.

އިސްރާއީލުން ގާޒާގައި ހިންގަމުންދާ ގަތުލުއާންމާ ގުޅިގެން ހުޅަނގު އައްސޭރީގައި ވަޒަންވެރިން ހިންގާ ހަމަލާތައް ވަނީ ވަރަށް ބޮޑަށް އިތުރުވެފައެވެ. އދ. ގެ ތަފާސްހިސާބުތަކަށް ބަލާއިރު، 2023 ވަނަ އަހަރުގެ އޮކްޓޫބަރު މަހުން ފެށިގެން މިހާތަނަށް 1,000 އަށްވުރެ ގިނަ ފަލަސްތީނު މީހުން ވަނީ އިސްރާއީލް ސިފައިންނާއި ވަޒަންވެރިންގެ ހަމަލާތަކުގައި ޝަހީދުވެފައެވެ.

އިންސާނީ ހައްގުތަކަށް މަސައްކަތްކުރާ ޖަމާއަތްތަކުން ބުނާ ގޮތުގައި، އިސްރާއީލުގެ ކަމާބެހޭ ފަރާތްތަކުން ވަނީ ވަޒަންވެރިންނަށް އެއްވެސް ބިރެއް ނެތި މިފަދަ ހަމަލާތައް ދިނުމުގެ ފުރުސަތު ފަހިކޮށްދީފައެވެ. އިސްރާއީލުގެ ޖަމާއަތެއް ކަމަށްވާ 'ބީޓްސެލެމް' އިން ތުހުމަތުކުރާ ގޮތުގައި، ސަރުކާރުން ވަޒަންވެރިންގެ މި އަމަލުތަކަށް އެހީތެރިވަނީ ފަލަސްތީނުގެ ބިންތައް ފޭރިގަތުމުގެ ސްޓްރެޓެޖީއެއްގެ ދަށުންނެވެ.