އިސްރާއީލުން އަލްއަޤްޞާ މިސްކިތް ބަންދުކޮށް، ފަލަސްޠީނު ރައްޔިތުން ވަނުން މަނާކޮށްފި

އިސްރާއީލުން އިޙްތިލާލުކޮށްފައިވާ ގުދުސްގައި ހުންނަ އަލްއަޤްޞާ މިސްކިތް ބަންދުކޮށްފައި އޮންނަތާ މިއަދަށް ނުވަ ދުވަސް ވެފައިވާއިރު، ރަމަޟާން މަހުގެ މި ދުވަސްވަރު ފަލަސްޠީނުގެ މުސްލިމުން އެ މިސްކިތަށް ވަނުން މަނާކޮށްފިއެވެ.

 އިސްރާއީލުން މި ފިޔަވަޅު އަޅާފައިވަނީ އީރާނަށް ދިން ހަމަލާތަކާ ގުޅިގެން ކަމަށް ބުނެއެވެ.

ފަލަސްޠީނުގެ ގުދުސް ގަވަރުނަރޭޓުން ރިޕޯޓްކޮށްފައިވާ ގޮތުގައި، އިސްރާއީލުގެ ސަލާމަތީ ބާރުތަކުން ވަނީ ކުއްލި ނުރައްކަލުގެ ހާލަތު އިއުލާނުކޮށް، އަޅުކަންކުރާ މީހުން މިސްކިތަށް ވަނުން ހުއްޓުވާފައެވެ. މިސްކިތުގެ ދޮރުތަކާއި ގުދުސްގެ ބޯދާ ސިޓީގެ އެކި ސަރަހައްދުތަކުގައި އިސްރާއީލު ސިފައިން ވަނީ ވަރުގަދައަށް ފޯރިމަރަން ފަށާފައެވެ.

މިސްކިތް ބަންދުކުރުމާ ގުޅޭގޮތުން ގުދުސްގެ ކުރީގެ ގްރޭންޑް މުފްތީ އަދި އަލްއަޤްޞާގެ އިމާމް ޝައިޚް އިކްރިމާ ސަބްރީ ވިދާޅުވީ، މިއީ އެއްވެސް އިންސާފެއް ނެތް ނިންމުމެއް ކަމަށެވެ. "މިއީ އަޅުކަން ކުރުމުގެ މިނިވަންކަމާ ޚިލާފު ކަމެއް. މީގެން ދޭހަވަނީ އިސްރާއީލުން މިސްކިތުގެ މައްޗަށް ބާރު ފޯރުވައި، އިސްލާމީ ވަޤުފްގެ ބާރުތައް އަތުލަން އުޅޭކަން"، ޝައިޚް ސަބްރީ ވިދާޅުވިއެވެ.

އިސްލާމީ ވަޤުފްގެ ޑެޕިއުޓީ ހެޑް މުޞްޠަފާ އަބޫ ސްވޭ ވިދާޅުވީ، ރަމަޟާން މަހު އަލްއަޤްޞާގައި އަޅުކަން ކުރަން ބޭނުންވާ މުސްލިމުންގެ ހިތްތައް މި ނިންމުމުގެ ސަބަބުން ކުދިކުދިވެފައިވާ ކަމަށެވެ. އޭނާ އިތުރަށް ވިދާޅުވީ، ސަލާމަތީ ކަންކަމަށް ބަލާނަމަ މިސްކިތުގެ އަޑީގައި އެތައް ހާސް ބަޔަކަށް ތިބެވޭނެ ހޯލްތައް ހުންނާނެ ކަމަށާއި، މި ހަނގުރާމަ އަވަހަށް ނިމި ސަރަހައްދަށް ސުލްހަ އައުމަށް އެދިވަޑައިގަންނަވާ ކަމަށެވެ.

އިސްރާއީލުގެ މި ހަރުކަށި ފިޔަވަޅުތަކުގެ ސަބަބުން ގުދުސްގެ ބޯދާ ސިޓީގެ މަގުތައް ވަނީ ފަޅުވެފައެވެ. އާންމުކޮށް ރަމަޟާން މަހުގެ ރޭގަނޑުތަކުގައި މީހުން ގިނަވާ ބާޒާރުތަކުގެ ވިޔަފާރިވެރިން ބުނާ ގޮތުގައި، އިސްރާއީލުން ޗެކްޕޮއިންޓްތައް ގިނަކޮށް ފާސްކުރުންތައް ވަރުގަދަކުރުމުގެ ސަބަބުން ވިޔަފާރިތަކަށް ވަނީ ވަރަށް ބޮޑަށް އަސަރުކޮށްފައެވެ.

ފަލަސްޠީނު ރައްޔިތުންނަށް އަލްއަޤްޞާ މިސްކިތަކީ ވަރަށް މުހިންމު ބިނާއެކެވެ. ޚާއްޞަކޮށް ރަމަޟާން މަހުގެ ރޭއަޅުކަމާއި ތަރާވީޙް ނަމާދަށް އެތައް ހާސް ބަޔަކު އެ މިސްކިތަށް ޖަމާވެއެވެ. ނަމަވެސް އިސްރާއީލުގެ މި ފިޔަވަޅުތަކާއެކު މިއަހަރުގެ ރަމަޟާން މަހުގެ ރޫޙަށް ވަނީ ބޮޑު ހިޔަންޏެއް އެޅިފައެވެ.