ޣައްޒާގައި ހާލުގައި ޖެހިފައިވާ މީހުން ތިބި ފޭލިގެއަކަށް އިޒްރޭލުން ދިން ހަމަލާއެއްގައި ޕެރާމެޑިކަކު ޝަހީދުކޮށްލައިފި

ޣައްޒާގެ ދެކުނުގައި ހާލުގައި ޖެހިފައިވާ މީހުން ދިރިއުޅެމުންދިޔަ ފޭލިގެއަކަށް އިޒްރޭލުން ދިން ފުރަތަމަ ހަމަލާއަށްފަހު، އަނިޔާވި މީހުންނަށް އެހީތެރިވުމަށް ދިޔަ ފަލަސްތީނުގެ ޕެރާމެޑިކަކު އިޒްރޭލުގެ ދެވަނަ ހަމަލާއެއްގައި ޝަހީދުކޮށްލައިފިއެވެ.

 ބުދަ ދުވަހުގެ މެންދަމުން ފެށިގެން އިޒްރޭލުން ދެމުންދާ ވަރުގަދަ ހަމަލާތަކުގައި މިހާތަނަށް 20 އަށްވުރެ ގިނަ މީހުން ވަނީ ޝަހީދުވެފައެވެ.

ފަލަސްތީނު ރެޑް ކްރެސެންޓުން ހާމަކޮށްފައިވާ ގޮތުގައި، ޝަހީދުވެފައިވަނީ އެ ޖަމިއްޔާގެ ޕެރާމެޑިކެއް ކަމަށްވާ ހުސައިން އަލް-ސާމިރީއެވެ. އޭނާ ޝަހީދުވީ ޚާން ޔޫނިސްގެ ހުޅަނގުން އަލް-މަވާސީ ސަރަހައްދުގައި އަނިޔާވި މީހުން އުފުލުމުގެ މަސައްކަތުގައި އުޅެނިކޮށް، އިޒްރޭލު ސިފައިން ދެވަނަ މިސައިލަކުން އެ ފޭލިގެއަށް ހަމަލާދިނުމުގެ ސަބަބުންނެވެ. މި ދެ ހަމަލާގައި އިތުރު މީހަކު ޝަހީދުވެ، 12 މީހުންނަށް އެކިވަރުގެ އަނިޔާ ލިބިފައިވެއެވެ.

މެންދަމުން ފެށިގެން ޣައްޒާއަށް ހުއްޓުމެއްނެތި ދެމުންދާ ހަމަލާތަކުގައި ޝަހީދުވި 20 މީހުންގެ ތެރޭގައި ކުޑަކުދިންނާއި، އަންހެނުންނާއި އަދި އުމުރުން ދުވަސްވީ މީހުން ހިމެނެއެވެ. މަސްދަރުތަކުން ރިޕޯޓްކުރާ ގޮތުގައި ފާއިތުވި ގަޑިއިރުތަކުގައި އިޒްރޭލުގެ އަސްކަރީ ހަރަކާތްތައް މުޅި ޣައްޒާގައި ވަނީ ވަރަށް ބޮޑަށް އިތުރުކޮށްފައެވެ. ޚާއްޞަކޮށް ޚާން ޔޫނިސް އާއި ޣައްޒާ ސިޓީގެ މަތިން އިޒްރޭލުގެ ޑްރޯންތައް ދަނީ މެދުނުކެނޑި އޮޕަރޭޓް ކުރަމުންނެވެ.

މި ހަމަލާތައް ދީފައިވަނީ އޮކްޓޯބަރު މަހު އިއުލާނުކުރި "ސުލްހައިގެ އެއްބަސްވުމަށް" ފަހު އެންމެ ގިނަ އަދަދަކަށް މީހުން ޝަހީދުވި ދުވަސްތަކަށް ފަހުގައެވެ. އިޒްރޭލުން ވަނީ މިހާތަނަށް 1200 އަށްވުރެ ގިނަ ފަހަރު ސުލްހައިގެ އެއްބަސްވުމާ ޚިލާފުވެ، އެތައް ސަތޭކަ އާންމުންނެއް ޝަހީދުކޮށް، ޣައްޒާއަށް ބޭނުންވާ އިންސާނީ އެހީ ފޯރުކޮށްދިނުމަށް ހުރަސްއަޅާފައެވެ.

A sorrowful faramedic to paramedic Hussein Al-Samiri of the Palestine Red Crescent, who was killed while on duty this afternoon after Israeli forces bombed a tent with a second missile while he was responding to a first strike in Al-Mawasi, west of Khan Younis. pic.twitter.com/WZwqLPThaV

— Quds News Network (@QudsNen) February 4, 2026

މީގެ އިތުރުން، ހޯމަ ދުވަހު މަދު ބަޔަކަށް ދަތުރުކުރެވޭ ގޮތަށް ހުޅުވާލި ރަފަހް ބޯޑަރު ހުރަސްކޮށް، ބަލިމީހުންނާއި އަނިޔާވެފައިވާ މީހުން ބޭރަށް ފޮނުވުމަށް ހަމަޖެހިފައި އޮތް އޮތުންވެސް އިޒްރޭލުން ބުދަ ދުވަހު ވަނީ ކެންސަލްކޮށްފައެވެ. މިއީ ޣައްޒާގެ ސިއްހީ ނިޒާމަށް ކުރިމަތިވެފައިވާ ބޮޑު ގޮންޖެހުމެއް ކަމަށް މަސްދަރުތަކުން ފާހަގަކުރެއެވެ.