ޔޫރަޕްގެ އަސްކަރިއްޔާތަކަކީ 'ޓެރަރިސްޓް ޖަމާއަތްތަކެއް' ކަމަށް އީރާނުން ކަނޑައަޅައިފި

އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އަކީ ޓެރަރިސްޓް ޖަމާއަތެއްގެ ގޮތުގައި ޔޫރަޕިއަން ޔޫނިއަން (އީޔޫ) އިން ކަނޑައެޅުމާ ގުޅިގެން، އޭގެ ބަދަލުހިފުމެއްގެ ގޮތުން ޔޫރަޕްގެ ގައުމުތަކުގެ އަސްކަރިއްޔާތަކަކީ ޓެރަރިސްޓް ޖަމާއަތްތަކެއް ކަމަށް އީރާނުން މިއަދު އިއުލާނުކޮށްފިއެވެ.

އީރާނުގެ މަޖިލީހުގެ ރައީސް މުހައްމަދު ބާގިރު ގާލީބާފް އާދީއްތަ ދުވަހު ވިދާޅުވީ، މި ނިންމުމަކީ އައި.އާރު.ޖީ.ސީ އާ ދެކޮޅަށް އަޅާ ފިޔަވަޅުތަކާ ބެހޭ ގާނޫނުގެ 7 ވަނަ މާއްދާގެ ދަށުން ނިންމި ނިންމުމެއް ކަމަށެވެ. "ޔޫރަޕުން މިވަނީ އަމިއްލަ ފަޔަށް ބަޑިޖަހާފައި. އެމެރިކާއަށް ކަނުކޮށް ކިޔަމަންވުމުގެ ސަބަބުން އެމީހުން މި ނިންމީ އަމިއްލަ ރައްޔިތުންގެ މަސްލަހަތާ ދެކޮޅަށް،" ގާލީބާފް ވިދާޅުވިއެވެ.

އީޔޫގެ ފޮރިން ޕޮލިސީ ޗީފް ކާޖާ ކާލަސް ބުރާސްފަތި ދުވަހު ވިދާޅުވީ އައި.އާރު.ޖީ.ސީ އަކީ ޓެރަރިސްޓް ޖަމާއަތެއްގެ ގޮތުގައި ކަނޑައެޅީ އީރާނުގައި ކުރިއަށްދާ މުޒާހަރާތައް ހުއްޓުވުމަށް އެ ގައުމުގެ ސަރުކާރުން ބޭނުންކުރާ ހަރުކަށި އުސޫލުތަކަށް ރައްދު ދިނުމުގެ ގޮތުން ކަމަށެވެ. "އަމިއްލަ ރައްޔިތުންގެ އެތައް ހާސް ބަޔަކު މަރާލާ ކޮންމެ ސަރުކާރަކީ އަމިއްލަ ހަލާކަށް މަސައްކަތްކުރާ ބައެއް،" ކަމަށް އޭނާ ސޯޝަލް މީޑިއާގައި ވިދާޅުވިއެވެ.

އީރާނުގައި މިދިޔަ ޑިސެމްބަރު 28 އިން ފެށިގެން ކުރިއަށްދާ މުޒާހަރާތަކުގައި މިހާތަނަށް 6,713 މީހުން މަރުވެފައިވާ ކަމަށް ހިއުމަން ރައިޓްސް އެކްޓިވިސްޓްސް ނިއުސް އެޖެންސީން ބުނާއިރު، އީރާނުގެ ރަސްމީ އިދާރާތަކުން ބުނަނީ މަރުވި މީހުންގެ އަދަދަކީ 3,117 ކަމަށެވެ. މީގެ ތެރޭގައި ސަލާމަތީ ބާރުތަކުގެ މީހުންވެސް ހިމެނެއެވެ.

މި ނުތަނަވަސްކަމުގެ ތެރޭގައި އީރާނުގެ ރޫހާނީ ލީޑަރު އަޔާތުالله އަލީ ޚާމަނާއީ ވިދާޅުވީ، އެމެރިކާއިން އީރާނަށް ހަމަލާއެއް ދީފިނަމަ އެއީ މުޅި ސަރަހައްދީ ހަނގުރާމައަކަށް ބަދަލުވާނެ ކަމަށެވެ. "އަހަރެމެންނަކީ އިސްވެ ހަމަލާދޭނެ ބައެއް ނޫން، އެކަމަކު އީރާނަށް ހަމަލާދޭ ކޮންމެ ފަރާތަކަށް ވަރުގަދަ ރައްދެއް ދޭނަން،" ޚާމަނާއީ ވިދާޅުވިއެވެ.

މި ހަމަނުޖެހުންތަކާ ގުޅިގެން އީރާނުން ވަނީ ސްޓްރެއިޓް އޮފް ހޯމޫޒް ސަރަހައްދުގައި އަސްކަރީ ތަމްރީނުތަކެއް ފެށުމަށް ނިންމާފައެވެ. މިއީ ދުނިޔޭގެ ތެލުގެ ވިޔަފާރީގެ ފަސްބައިކުޅަ އެއްބައި ހިނގާ މުހިންމު ކަނޑުގެ ސަރަހައްދެކެވެ.