ބަލައި ފާސްކުރި އިރު ފިރިހެން ފުލުހުން ގެނެސް ބަލާފާސްކުރާނެ ކަމުގެ އިންޒާރުދިން: ފަލަސްތީިނުގެ އަންހެން ގައިދީއެއް

އިޒްރާއީލުގެ ސިފައިން މިމަހުގެ ކުރީކޮޅު ހައްޔަރުކޮށް، މިނިވަންކުރި ފަލަސްތީނުގެ ނޫސްވެރިއެއް ކަމަށްވާ އިނާސް ޚްލާވީ، އޭނާ ހައްޔަރުކޮށްފައި ހުރި މުއްދަތުގައި އިޒްރާއީލުގެ ސިފައިންގެ ފަރާތުން ލާއިންސާނީ އަނިޔާތަކާއި ފުރައްސާރައާ ކުރިމަތިލާންޖެހުނު ކަމަށް ބުނެފިއެވެ.

 ސޯޝަލް މީޑިއާގައި ކުރި ޕޯސްޓްތަކަކާ ގުޅިގެން 11 ދުވަހު ބަންދުގައި ބެހެއްޓުމަށްފަހު އިނާސް މިނިވަންކޮށްފައިވަނީ ޖެނުއަރީ 15 ވަނަ ދުވަހުއެވެ.

ހިފާފައިވާ ހިބްރޫން ކައިރީގައި އޮންނަ އިދުނާ އަވަށުގައި ދިރިއުޅޭ އިނާސް ކިޔައިދިން ގޮތުގައި، އިޒްރާއީލުގެ އަސްކަރީ ޔުނިޓަކުން ދެ ދޮރު ހަލާކުކޮށްލައި، ވަރަށް އަނިޔާވެރިކޮށް އޭނާގެ ގެއަށް ވަދެގަތީ ރޭގަނޑުގެ ވަގުތެއްގައެވެ. "އަހަރެމެން ތިބީ ނިދާފައި، ކުއްލިއަކަށް ހޭލެވުނީ އެއްޗެހި ތަޅާ އަޑަށާއި ހަޅޭއްލަވާ އަޑަށް،" އޭނާ އަލްޖަޒީރާއަށް ކިޔައިދިނެވެ. ސިފައިން އޭނާގެ ފޯނު އަތުލުމަށްފަހު، އަސްކަރީ އުޅަނދެއްގެ ތެރޭގައި ތަޅައި އަނިޔާކޮށް، ބަދުބަސްތައް ބުނި ކަމަށްވެސް އޭނާ ބުންޏެވެ.

އިނާސްގެ މައްޗަށް ކުރި މައިގަނޑު ތުހުމަތަކީ ފަލަސްތީނުގެ ނޫސްވެރިން ކަމަށްވާ އަނަސް އަލް-ޝަރީފާއި އިސްމާއީލް އަލް-ޣޫލް މަރާލުމާ ގުޅޭގޮތުން ފޭސްބުކްގައި ޕޯސްޓްތަކެއް ކުރުމެވެ. އިޒްރާއީލުގެ ކޯޓުން އެ ޕޯސްޓްތަކަކީ ހިތްވަރުދިނުމުގެ އަމަލެއް ނޫން ކަމަށް ނިންމި ނަމަވެސް، އޭނާ ބަންދުގައި ބެހެއްޓީ ވަރަށް ދަތި ހާލަތެއްގައެވެ. "އަހަރެންގެ މަސައްކަތަކީ ފަލަސްތީނުގެ ހަގީގަތް ހާމަކުރުން، ނަމަވެސް އިޒްރާއީލުގެ ކުރިމަތީގައި އެއީ އަބަދުވެސް ހިތްވަރުދިނުން،" އޭނާ ބުންޏެވެ.

ހައްޔަރުކޮށްފައި ހުރި މުއްދަތުގައި ކުރިމަތިވި އެންމެ ދަށު ދަރަޖައިގެ ކަމެއްގެ ގޮތުގައި އިނާސް ފާހަގަކުރީ، އޭނާގެ ނުރުހުމުގައި އޮރިޔާންކޮށް ބަލާފާސްކުރުމެވެ. އޭނާ އެކަމަށް އިންކާރު ކުރުމުން، އަންހެން ސިފައިންގެ މީހާ ހަޅޭއްލަވައި، ފިރިހެން ސިފައިންގެ މީހަކު ގެނެސްގެން އެކަން ކުރާނެ ކަމުގެ އިންޒާރު ދިން ކަމަށް އޭނާ ބުންޏެވެ. "އެ ވަގުތު އަހަންނަށް އިހުސާސް ކުރެވުނީ އަހަރެންގެ ކަރާމާތް މުޅިން ގެއްލިއްޖެ ކަމަށް،" އޭނާ ކިޔައިދިނެވެ.

ޖަލުގެ ހާލަތާ ގުޅޭގޮތުން އިނާސް ބުނީ، ދެ ދުވަސް ވަންދެން ކުޑަ ގޮޅިއެއްގައި ބަންދުކޮށްފައި ހުރިއިރު އެއް ދުވަހު ކާންވެސް ނުދޭ ކަމަށެވެ. އަދި ދާމޫން ޖަލަށް ބަދަލުކުރުމަށްފަހު، އޭނާގެ އަމިއްލަ އަންނައުނު އަތުލައި، އެތެރެއިން ލާ އަންނައުނާ ނުލައި ހަމައެކަނި ދެ ޕިޖާމާ ދިން ކަމަށް އޭނާ ބުންޏެވެ. މީގެ އިތުރުން ފެންވަރާ ގަޑީގައި ގަސްދުގައި ހޫނުފެން ކަނޑާލުމާއި، ގޮޅިތަކުގެ ދޮރުތަކުގެ ދަށުގައި ތޫނު ދަގަނޑު ހުންނަ ކަމަށްވެސް އޭނާ ފާހަގަކުރިއެވެ.

މި ތަޖުރިބާއަށްފަހު އިނާސް ބުނީ، މިނިވަންކަމަކީ ކިހާ އަގުބޮޑު އެއްޗެއްކަން އޭނާއަށް މިހާރު އިހުސާސްވާ ކަމަށެވެ. އަދި އެއްވެސް ދައުވާއަކާ ނުލައި އަހަރުތަކެއް ވަންދެން ޖަލުގައި ތިބޭ ފަލަސްތީނުގެ އަންހެން ކަނބަލުންގެ ހާލަތާމެދު އޭނާ ކަންބޮޑުވުން ފާޅުކުރިއެވެ.

އިޒްރާއީލުގެ ކަމާބެހޭ ފަރާތްތަކުން 6،000 ޝެކެލް (ގާތްގަނޑަކަށް 1،910 ޑޮލަރު) ގެ ކަފާލާތެއްގެ ދަށުން ޚަލާވީ މިނިވަންކޮށްފައިވާއިރު، އަންނަ މަހުގެ ކުރީކޮޅު އަލުން ކޯޓަށް ހާޒިރުވުމަށް އޭނާއަށް ވަނީ އަމުރުކޮށްފައެވެ.