ޣައްޒާ ބެލެހެއްޓުމަށް އެމެރިކާގެ ތާއީދާއެކު އުފެއްދި ފަލަސްތީނުގެ ކޮމިޓީގެ މަސައްކަތްތައް ހާމަކޮށްފި

އެމެރިކާގެ ތާއީދާއެކު އެކުލަވާލާފައިވާ ހަނގުރާމަ ހުއްޓާލުމުގެ ރޭވުމުގެ ދަށުން، ޣައްޒާގެ ކުރިމަގުގެ އިދާރީ ކަންކަން ބެލެހެއްޓުމަށް ހަވާލުކޮށްފައިވާ ފަލަސްތީނުގެ ކޮމިޓީން އެ ކޮމިޓީގެ މައިގަނޑު މަގްސަދުތަކާއި އިސްކަންދޭނެ ކަންކަން ހިމެނޭ ބަޔާނެއް ނެރެފިއެވެ.

ނޭޝަނަލް ކޮމިޓީ ފޯ ޣައްޒާ މެނޭޖްމަންޓް (އެން.ޖީ.އޭ.ސީ) ގެ ޖެނެރަލް ކޮމިޝަނަރު އަލީ ޝާތު ވިދާޅުވީ، މި ޓެކްނޮކްރެޓިކް ބޮޑީގެ އަމާޒަކީ ޣައްޒާގެ އަސާސީ ހިދުމަތްތައް އަލުން އިއާދަކޮށް، ސުލްހައަށް ލޯބިކުރާ މުޖުތަމައެއް ބިނާކުރުން ކަމަށެވެ. އެމެރިކާގެ ރައީސް ޑޮނަލްޑް ޖޭ ޓްރަމްޕް އިސްކޮށް ހުންނަވާ "ބޯޑް އޮފް ޕީސް" ގެ އިރުޝާދުގެ ދަށުން މަސައްކަތްކުރާ މި ކޮމިޓީން ޣައްޒާގެ އިންފްރާސްޓްރަކްޗަރާއި ރޫހާނީ ދުޅަހެޔޮކަން އަލުން ބިނާކުރާނެ ކަމަށް އޭނާ ވިދާޅުވިއެވެ.

ޓްރަމްޕްގެ ސުލްހައިގެ ރޭވުމާއި އދ. ގެ ގަރާރު
އެން.ޖީ.އޭ.ސީ އަކީ ރައީސް ޓްރަމްޕްގެ 20 ނުކުތާގެ ސުލްހައިގެ ރޭވުމުގެ ދަށުން އުފައްދާފައިވާ، އަދި އދ. ގެ ސަލާމަތީ މަޖިލީހުގެ ގަރާރު 2803 ގެ ދަށުން ހުއްދަ ދީފައިވާ އިދާރާއެކެވެ. ވައިޓް ހައުސްއިން ހާމަކޮށްފައިވާ ގޮތުގައި، މި ކޮމިޓީން ބަލަހައްޓާނީ ޣައްޒާ އާރާދުކުރުމާއި ހަމަޖެހުން ގާއިމުކުރުމުގެ ދުވަހުން ދުވަހަށް ކުރަންޖެހޭ މަސައްކަތްތަކެވެ. އަދި މިއީ ދިގުމުއްދަތަކަށް އަމިއްލައަށް ހިންގޭނެ ފަދަ ވެރިކަމުގެ ނިޒާމެއްގެ ބިންގާ އެޅުން ކަމަށްވެސް ބުނެފައިވެއެވެ.

ކުރިމަތިވެފައިވާ ގޮންޖެހުންތަކާއި ކަންބޮޑުވުންތައް
މި ކޮމިޓީއަށް ބޮޑެތި ގޮންޖެހުންތަކެއް ވަނީ ކުރިމަތިވެފައެވެ. އިޒްރޭލުން ދެ އަހަރަށްވުރެ ގިނަ ދުވަހު ހިންގި ހަނގުރާމައިގެ ސަބަބުން ޣައްޒާ ވަނީ މުޅިން ސުންނާފަތިވެފައެވެ. މީގެ އިތުރުން، މި އިދާރާއަށް އޮންނާނެ މިނިވަންކަމާ މެދު ފަލަސްތީނުގެ ރައްޔިތުންގެ މެދުގައި ވަނީ ޝައްކުތައް އުފެދިފައެވެ. މި ކަންބޮޑުވުންތައް އިތުރުވަނީ ބޯޑް އޮފް ޕީސްގައި އިޒްރޭލަށް ތާއީދުކުރާ ފަރާތްތައް ތިބުމާއި، ފަލަސްތީނު މީހުންގެ ބައިވެރިވުން މަދުވުމުގެ ސަބަބުންނެވެ.

ފަލަސްތީނު އޮތޯރިޓީގެ ކުރީގެ ޑެޕިއުޓީ މިނިސްޓަރު ޝާތު ވިދާޅުވީ، ކޮމިޓީގެ އެންމެ އިސް އަމާޒަކީ ޣައްޒާގެ ސަލާމަތީ ކަންކަން ކޮންޓްރޯލް ކުރުމާއި، ކަރަންޓާއި، ފެނާއި، ސިއްހީ ހިދުމަތް އަދި ތައުލީމު ފަދަ އަސާސީ ހިދުމަތްތައް އިއާދަކުރުން ކަމަށެވެ. އަދި މި މަސައްކަތްތައް ކުރިއަށްދާނީ ނަޒާހަތްތެރިކަމާއި ދެފުށް ފެންނަ ގޮތެއްގައި ކަމަށްވެސް އޭނާ ވިދާޅުވިއެވެ.

ހަނގުރާމަ ހުއްޓާލުމުގެ އެއްބަސްވުމެއް އޮތް ނަމަވެސް، އިޒްރޭލުން ދަނީ ޣައްޒާއަށް އެހީ ވައްދާ މިންވަރު ހިފަހައްޓަމުންނެވެ. 2023 އޮކްޓޯބަރު 7 އިން ފެށިގެން މިހާތަނަށް އިޒްރޭލުގެ ހަމަލާތަކުގައި 71,548 އަށްވުރެ ގިނަ ފަލަސްތީނު މީހުން ވަނީ ޝަހީދުވެފައެވެ. ރިޕޯޓްތައް ބުނާގޮތުގައި ރައީސް ޓްރަމްޕް މި ބޯޑު ބޭނުންކުރައްވަނީ އދ. ފަދަ ބައިނަލްއަގުވާމީ އިދާރާތައް ބައިޕާސްކޮށް، އަމިއްލަ ނިޒާމެއްގެ ތެރެއިން ކަންކަން ނިންމުމަށެވެ.