ޕާކިސްތާނު ސިފައިން އަފްޣާނިސްތާނުގެ ބޯޑަރު ކައިރީގައި ހިންގި ދެ އޮޕަރޭޝަނެއްގައި 23 ހަނގުރާމަވެރިން މަރާލައިފި

ޕާކިސްތާނާއި އަވަށްޓެރި އަފްޣާނިސްތާން އަދި އިންޑިއާއާ ދެމެދު ހިޔާލު ތަފާތުވުންތައް ބޮޑުވެފައިވާ ދަނޑިވަޅެއްގައި، އަފްޣާނިސްތާނުގެ ބޯޑަރު ކައިރީގައި ހިންގި ދެ ރެއިޑެއްގައި ޕާކިސްތާނުގެ ސަލާމަތީ ބާރުތަކުން 23 ހަނގުރާމަވެރިން މަރާލައިފިއެވެ.

މި އޮޕަރޭޝަންތަކަކީ މި ސަރަޙައްދުގައި ހަމަނުޖެހުންތައް އިތުރުވަމުންދާ ދަނޑިވަޅެއްގައި ހިންގި އޮޕަރޭޝަންތަކެއްކަން ފާހަގަކޮށްލަން ޖެހެއެވެ.

ސިފައިންގެ ބަޔާނެއްގައި ބުނެފައިވާ ގޮތުގައި، ބުދަ ދުވަހު ޚައިބަރު ޕަޚްތޫންޚްވާ ޕްރޮވިންސްގެ ކުރުމް ޑިސްޓްރިކްޓްގައި ވަނީ "ޓާގެޓް ކުރެވިފައިވާ އޮޕަރޭޝަނެއް" ހިންގާފައެވެ. މި ބަޔާނުގައި ހަނގުރާމަވެރިންނަށް އިޝާރާތްކޮށްފައިވަނީ "ޚަވާރިޖް" ގެ ނަމުންނެވެ. މިއީ ޕާކިސްތާނުގެ ޠާލިބާން (ޓީޓީޕީ) ވެސް ހިމެނޭ ގޮތަށް، ޕާކިސްތާނުގައި މަނާކުރެވިފައިވާ ޖަމާޢަތްތަކަށް ސިފައިން ބޭނުންކުރާ ލަފުޒެކެވެ. މި ރެއިޑްއާ ގުޅިގެން ހިނގި ހަމަނުޖެހުންތަކުގައި 12 މީހުން މަރުވިއެވެ. ނަމަވެސް ޕާކިސްތާނުގެ ސިފައިންގެ އެއްވެސް މީހަކަށް ގެއްލުމެއް ލިބުނުކަމުގެ ރިޕޯޓެއް ލިބިފައެއް ނުވެއެވެ.

އޭގެ ފަހުން، ސިފައިން ވަނީ ހަމަ އެ ސަރަހައްދުގައި ހުރި އެހެން ތަނެއް ރެއިޑްކޮށް، އިތުރު 11 މީހުން މަރާލާފައެވެ. މި ހަފްތާ ތެރޭގައި މި ސަރަހައްދުގައި ހިންގި އޮޕަރޭޝަންތަކުގައި މަރާލެވުނު މީހުންގެ ޖުމްލަ އަދަދު 30 އަށް ވުރެ މަތިވެފައިވާކަމަށް ސިފައިން ވަނީ ރިޕޯޓްކޮށްފައެވެ. މި އޮޕަރޭޝަންތައް ހިންގާފައިވަނީ، ނޮވެމްބަރު 11 ގައި އިސްލާމްއާބާދުގައި ޖާނުންފިދާވެގެން ދިން ބޮމުގެ ހަމަލާއެއްގައި 12 މީހުން މަރުވެ 30 މީހުން ޒަޚަމްވެފައިވުމާ ގުޅިގެންނެވެ.

މި ހަމަލާގެ ތުހުމަތު ހެކި ހުށަހެޅުމެއް ނެތި އިންޑިއާގެ މައްޗަށް ވަޒީރު ޝެހްބާޒް ޝަރީފް ތުހުމަތު ކުރައްވާފައިވާއިރު، ޕާކިސްތާނުގެ ދިފާޢީ ވަޒީރު ޚަވާޖާ އާސިފް ވަނީ އަފްޣާނިސްތާނަށް ވެސް ތުހުމަތުކޮށްފައެވެ. މިދިޔަ ހަފްތާގައި ޕާކިސްތާނުން ވަނީ މި ހަމަލާގައި ބައިވެރިވިކަމަށް ތުހުމަތުކުރެވޭ އަފްޣާނިސްތާނުގެ ހަތަރު މީހަކު ހައްޔަރުކޮށްފައެވެ.

ޕާކިސްތާނުން ދުވަސްވީއްސުރެ ތުހުމަތުކުރަމުން އަންނަނީ ހަނގުރާމަވެރި ޖަމާޢަތްތަކަށް އިންޑިއާ އާއި އަފްޣާނިސްތާނުން އެހީތެރިކަން ފޯރުކޮށްދޭ ކަމަށެވެ. ނަމަވެސް އިންޑިއާ އާއި އަފްޣާނިސްތާނުން މި ތުހުމަތުތައް ދޮގުކުރެއެވެ. އަފްޣާނިސްތާނުން ވަނީ ޕާކިސްތާނުގެ ސިފައިންގެ ހަމަލާތަކަކީ އެ ޤައުމުގެ މިނިވަންކަމަށް އަރައިގަތުން ކަމަށް ބުނެފައެވެ. 2021 ވަނަ އަހަރު އެމެރިކާ އަފްޣާނިސްތާނުން ފޭބުމަށްފަހު ތާލިބާނުން އެ ގައުމުގެ ވެރިކަން ހޯދުމާއެކު، ޕާކިސްތާނު ތާލިބާނަށް ވަނީ އިތުރު ހިތްވަރު ލިބިފައެވެ.

މިފަހުން ޕާކިސްތާނު ތާލިބާން (ޕާކިސްތާނުގެ ސަރުކާރު ބަދަލުކުރުމަށް ބޭނުންވާ ޖަމާއަތް) އިން ވަނީ ހަމަލާތައް އިތުރުކޮށްފައެވެ. އިސްލާމްއާބާދުގައި ހުންނަ މަޝްވަރާ ކުރާ މަރުކަޒެއް ކަމަށްވާ ޕާކިސްތާން އިންސްޓިޓިއުޓް ފޯ ކޮންފްލިކްޓް އެންޑް ސެކިއުރިޓީ ސްޓަޑީޒްގެ ރިޕޯޓްތައް ބުނާ ގޮތުގައި، މި ޖަމާއަތުގެ ހަމަލާތައް ވަނީ މިދިޔަ ދިހަ އަހަރަށްވުރެ މިއޮގަސްޓް މަހު އިތުރުކޮށްފައެވެ. 2024 ވަނަ އަހަރު ރެކޯޑްކުރެވުނު ހާދިސާތަކުގެ އަދަދު ވަނީ 856 އަށް އަރާފައިވެއެވެ. މިއީ 2023 ވަނަ އަހަރުގެ 645 އާ އަޅާބަލާއިރު ބޮޑުތަނުން އިތުރުވުމެކެވެ.