ސޯރާގައި މާޓިން ލޫތަރ ކިންގް ޖޫނިއަރގެ ވީޑިއޯ އުފެއްދުން އޯޕަންއޭއައި އިން ވަގުތީކޮށް ހުއްޓާލައިފި

އާޓިފިޝަލް އިންޓެލިޖެންސް (އޭއައި) ދާއިރާގައި މަސައްކަތްކުރާ މަޝްހޫރު ކުންފުނި އޯޕަންއޭއައި އިން، އޭގެ ވީޑިއޯ އުފައްދާ ޓޫލް "ސޯރާ"  ބޭނުންކޮށްގެން މަޝްހޫރު ތާރީޚީ ޝަޚްސިއްޔަތު، މާޓިން ލޫތަރ ކިންގް ޖޫނިއަރގެ ވީޑިއޯތައް އުފެއްދުމުގެ ގާބިލިއްޔަތު ވަގުތީކޮށް ހުއްޓާލައިފިއެވެ. މި ނިންމުން ނިންމާފައިވަނީ، ބައެއް ފަރާތްތަކުން އޭނާގެ ސޫރަ "ހުރުމަތްތެރިކަން ކުޑަވާ ގޮތަށް" ބޭނުންކޮށްފައިވާ ކަމަށް ބުނެ އާންމުންގެ ފާޑުކިޔުންތައް އަންނަން ފެށުމުންނެވެ.

އޯޕަންއޭއައި އިން ބުރާސްފަތި ދުވަހު އެކްސް ގައި ނެރުނު ބަޔާނެއްގައި ބުނެފައި ވަނީ، "ތާރީޚީ ޝަޚްސިއްޔަތުތައް ދައްކުވައިދިނުމުގައި ބަސްބުނުމުގެ މިނިވަންކަމުގެ ވަރުގަދަ މަސްލަހަތުތަކެއް ހުރި ނަމަވެސް، އޯޕަންއޭއައި ދެކޭ ގޮތުގައި އާންމު ޝަޚްސިއްޔަތުތަކާއި އެބޭފުޅުންގެ އާއިލާތަކަށް އެބޭފުޅުންގެ ސޫރަ ބޭނުންކުރާނެ ގޮތެއް ކަނޑައެޅުމުގެ ފުރިހަމަ ބާރު ލިބިފައިވާން ވާނެއެވެ." ކުންފުނިން އިތުރަށް ބުނީ، މިހާރު "ހުއްދަ ލިބިފައިވާ ފަރާތްތަކަށް ނުވަތަ ވާރުތަވެރިންނަށް ސޯރާގެ ކޭމިއޯތަކުގައި އެބޭފުޅުންގެ ސޫރަ ބޭނުންނުކުރުމަށް އެދި ހުށަހެޅިދާނެ" ކަމަށެވެ.

މި ބަދަލު އައިސްފައި މިވަނީ، ހަގީގީ އަދި ތާރީޚީ އިންސާނުން ބޭނުންކޮށްގެން ހަގީގަތާ އެއްގޮތް ވީޑިއޯތައް އޭއައި ބޭނުންކޮށްގެން އުފެއްދުމުގެ ފުރުސަތު ދޭ "ސޯރާ 2"  ހަފްތާތަކެއް ކުރިން ތައާރަފުކުރި ފަހުންނެވެ. މި ޓެކްނޮލޮޖީއަށް ފާޑުކިޔާ ފަރާތްތަކުން ބުނާ ގޮތުގައި މިއީ، މަޢުލޫމާތުތައް އާންމުވާ ޒަމާނަކަށް މަގުފަހިކޮށް، "އޭއައި ސޮލޮޕް"  އާއި ހަގީގަތާއި ދޮގު ވަކިކުރުން ދަތިކުރާ ކަމެކެވެ.

މި އޭއައި ޓޫލް ބޭނުންކުރުމާ ގުޅޭ ސުލޫކީ މައްސަލަތަކާ މެދު އޮންލައިންކޮށް ބަހުސްތައް ވަނީ ހޫނުވެފައެވެ. ބައެއް ކްރިއޭޓަރުން ވަނީ މާޓިން ލޫތަރ ކިންގް ޖޫނިއަރގެ ސޫރަ ގުޅުންހުރި ކަންކަމަށް ނޫން ގޮތްގޮތަށް ބޭނުންކޮށްފައެވެ. އަދި، ފަހަކަށް އައިސް ބައެއް ފަރާތްތަކުން ވަނީ ދުނިޔެ ދޫކޮށްފައިވާ މަޝްހޫރު އެކްޓަރ ރޮބިން ވިލިއަމްސްގެ ސޫރަ އޭއައި ވީޑިއޯތަކުގައި އަލުން އުފައްދާފައެވެ. މިކަމާ ގުޅިގެން ވިލިއަމްސްގެ ދަރިފުޅު ޒެލްޑާ ވަނީ އެކަންކަން "ނުތަނަވަސްކަން" ދޭ ކަންކަމެއް ކަމަށް ސިފަކޮށްފައެވެ.

މިކަމާ ގުޅިގެން އޯޕަންއޭއައި އިން ވަނީ "ޑރ. ބާރނިސް އޭ. ކިންގް އާއި ޖޯން ހޯޕް ބްރަޔަންޓް އާއި އޭއައި އެތިކްސް ކައުންސިލް މިކަހަލަ މަޝްވަރާތަކަށް ފުރުސަތު ހޯދައިދެއްވުމުން" ޝުކުރު އަދާކޮށްފައެވެ.