ނޭޕާލްގައި ފެންބޮޑުވުމާ ބިންގަނޑު ކަނޑައިގެން ދިޔުމުގެ ސަބަބުން 47 މީހުން މަރުވެއްޖެ

ނޭޕާލްގައި ވެހެމުންދާ ބޯ ވާރެއާއި ގުޅިގެން ކުރިމަތިވެފައިވާ ބިންގަނޑު ކަނޑައިގެން ދިޔުމާއި ފެންބޮޑުވުމުގެ ސަބަބުން މަދުވެގެން 47 މީހުން މަރުވެއްޖެއެވެ.

މިވިއްސާރައާއި ގުޅިގެން މަގުތައް ބަންދުވެ، ގިނަ އަދަދެއްގެ ފާލަންތައް ވަނީ ބޮޑުވެފައިވާ ފެންގަޑާއެކު އޮޔާ ގޮއްސައެވެ. 

ނޭޕާލެގް ޕޮލިސް ފޯސްގެ ތަރުޖަމާނު ކަލިދާސް ދައުބޯޖީ ވިދާޅުވި ގޮތުގައި އިންޑިއާއާއި ސަރަހައްދީ ގޮތުން ގުޅިފައިވާ އިލަމް ޑިސްޓްރިކްޓްގައި ހިނގި ވަކިވަކި ލޭންޑްސްލައިޑްތަކުގައި 35 މީހުން ވަނީ މަރުވެފައެވެ. މީގެ އިތުރުން ހުކުރު ދުވަހުން ފެށިގެން ފެންބޮޑުވުމުގެ ސަބަބުން 9 މީހުން ވަނީ ގެއްލިފައެވެ. އަދި އެހެން ސަރަހައްދުތަކުގައި ވިދުވަރުގެ ސަބަބުން 3 މީހުން ވަނީ މަރުވެފައެވެ.

ނޭޕާލްގެ ސަރުކާރުން މި ކާރިސާއާއި ކުރިމަތިލުމަށްޓަކައި ހޯމަ އަދި އަންގާރަ ދުވަސް ވަނީ ސަރުކާރު ބަންދު ދުވަސްތަކެއްގެ ގޮތުގައި ހަމަޖައްސާފައެވެ. ނަމަވެސް އިމަޖެންސީ ޚިދުމަތްތަކާއި ކާރިސާއާއި ކުރިމަތިލާ ޓީމުތައް މި ބަންދުން އިސްތިސްނާ ވާނެއެވެ. ސަރުކާރުގެ ތަރުޖަމާނު ރާމެޝްވަރު ދަންގަލް ވިދާޅުވި ގޮތުގައި މި ފިޔަވަޅު އަޅާފައިވަނީ އިތުރަށް ބޯ ވިއްސާރަވެދާނެ ކަމަށް ލަފާކުރެވޭތީއެވެ.

މި ކާރިސާގެ ސަބަބުން ކަތުމަންޑޫއަށް ދަތުރުކުރެވޭ ހުރިހާ މައިގަނޑު މަގުތަކެއް ވަނީ ބަންދުވެފައެވެ. ކަތުމަންޑޫއާއި ޗައިނާގެ ބޯޑަރާއި ގުޅުވައިދޭ އަރަނިކޯ ހައިވޭ ވަނީ ގިނަ ތަންތަނުން ހަލާކުވެފައެވެ. އަދި އިރުމަތީ ސަރަހައްދުތަކާއި ގުޅުވައިދޭ ބީޕީ ހައިވޭ ވަނީ ވެއްޓިފައިވާ ތަކެތީގެ ދަށުގައެވެ. ވައިގެ ދަތުރުފަތުރުގެ އޮތޯރިޓީން ވަނީ ހޮނިހިރު ދުވަހު އެތެރޭގެ ދަތުރުތައް ވަގުތީގޮތުން ހުއްޓާލާފައެވެ.

މި ކާރިސާ ދިމާވެފައިވަނީ ނޭޕާލްގެ އެންމެ މުހިންމު ދީނީ ފެސްޓިވަލް ކަމުގައިވާ ދަޝައިން ފާހަގަކުރުމަށްފަހު ސަތޭކަ ހާސް އަދަދެއްގެ މީހުން އެނބުރި އަންނަމުންދާ ދަނޑިވަޅެއްގައެވެ. ޚާއްސަކޮށް ކޮންސާން އުފެދިފައިވަނީ އިރުމަތީ އުތުރު ނޭޕާލްގައި އޮންނަ ކޯޝި ކޯރުގެ ފެންވަރު އާދަޔާ ޚިލާފަށް މައްޗަށް ގޮސްފައިވާތީއެވެ. މި ކޯރުގެ ސަބަބުން އިންޑިއާގެ ބިހާރު ސްޓޭޓްގައި މޫސުމީ ވިއްސާރައިގެ ތެރޭގައި ފެންބޮޑުވުމުގެ ކާރިސާތައް ކުރިމަތިވެއެވެ.