ދުނިޔޭގެ ފުރަތަމަ ކާބަން ބޭރުނުކުރާ މިސްކިތް އަބޫދާބީގައި ހުޅުވަނީ

ދުނިޔޭގައި ކާބަން ޑައިއޮކްސައިޑްގެ އެއްވެސް މިންވަރެއް ބޭރުނުކުރާ ފުރަތަމަ މިސްކިތް، މިއަންނަ އޮކްޓޯބަރު މަހު އަބޫދާބީގައި ހުޅުވުމަށް ތައްޔާރުވަމުންދާކަމަށް ޚަބަރު ލިބިއްޖެއެވެ. ނެޓް-ޒީރޯ ހަކަތައިގެ މި މިސްކިތަކީ، ތިމާވެއްޓާ ރައްޓެހި އިމާރާތްތަކުގެ ދާއިރާގައި ކުރެވޭ ތާރީޚީ މަސައްކަތެކެވެ.

މިސްކިތް ބިނާކުރެވިފައިވަނީ މަށީގެ އިތުރުން ސޯލާ ޕެނަލް ބޭނުންކޮށްގެންނެވެ. މިއީ އިނގިރޭސި ކުންފުނި "އާރަޕް" އިން ޑިޒައިންކޮށް، "މަސްދަރު ސިޓީ" އިން ބިނާކުރަމުން އަންނަ މިސްކިތެކެވެ. މި މިސްކިތަށް ބޭނުންވާ ހަކަތައިގެ 100 އިންސައްތަ އުފައްދާނީ ސޯލާ ޕެނަލް ބޭނުންކޮށްގެންނެވެ. މީގެ އިތުރުން، ފިނިކުރުމުގެ އަދި ސަރކިޔުލާ ޑިޒައިންތަކުގެ ސަބަބުން، މިސްކިތުގެ އެކި ބޭނުންތަކަށް ބޭނުންވާ ހަކަތައިގެ މިންވަރު ތިންބައިކުޅަ އެއްބައި ކުޑަކުރެވޭނެއެވެ. އަދި ފެނުގެ ބޭނުންކުރުން 50 އިންސައްތައަށް ދަށްކުރެވޭނެއެވެ.

މިސްކިތް ބިނާކުރުމުގައި ދިމާވި އެންމެ ބޮޑު ގޮންޖެހުމަކީ، ޤިބްލައަށް ސީދާކޮށް ހުރުމާއެކު ދެމެހެއްޓެނިވި ކަމުގެ  ޝަރުތުތައް ފުރިހަމަ ކުރުމެވެ. "އާރަޕް" ކުންފުނީގެ އެސޯސިއޭޓް ޑިރެކްޓަރ، ޕޯލް ސައިމަން ވިދާޅުވީ، އިރުގެ އަސަރުތަކާއި ހޫނުގެ އަސަރު އެންމެ ކުޑަކުރެވޭނެ ގޮތެއް ހޯދުމަށް މަސައްކަތްކުރެވުނު ކަމަށެވެ. މިކަން ހާސިލް ކުރުމަށް، ކުންފުނިން ވަނީ އެންގަލްކޮށްފައި ހުންނަ ދޮރުތަކާއި، ސްކައިލައިޓް، ފާރުގެ އިންސޫލޭޝަން އަދި ފިނިކުރުމުގެ މެޓީރިއަލްތައް ބޭނުންކޮށްގެން ތަފާތު ތަޖުރިބާތައްކޮށްފައެވެ.

އަބޫދާބީގެ މި މިސްކިތް ޑިޒައިން ކުރުމުގައި، ޔޫއޭއީގެ އެންމެ ދުވަސްވީ މިސްކިތް ކަމަށްވާ އަލް ބިދިޔާ މިސްކިތުން (ރަމްޑް-އާތް ކޮންސްޓްރަކްޝަން) ހިތްވަރު ލިބިގަނެފައިވެއެވެ. މިގޮތުން، ހޫނު ވަނުން ހުއްޓުވުމަށް 197 ފޫޓު ފުޅާ އަދި 23 ފޫޓު ދިގު ޤިބްލައަށް ސީދާކޮށް ހުންނަ ފާރެއް، އެ ސަރަޙައްދުގެ ވެލި ބޭނުންކޮށްގެން ބިނާކޮށްފައިވެއެވެ.

މި މިސްކިތުގައި ޖުމްލަ 1,300 މީހުންނަށް އެއްފަހަރާ ނަމާދުކުރެވޭނެއެވެ. ހޫނުމިނާއި ނުފިލާކަން ބެލެހެއްޓުމަށް ސެންސަރުތައް ބޭނުންކުރެވޭނެއެވެ. މި ސެންސަރުތަކުގެ ސަބަބުން، ހަކަތަ އެންމެ ހެޔޮ ގޮތުގައި ބޭނުންކުރުމަށްޓަކައި، ފަންކާތަކާއި އެއަރކޯންތައް ހަރަކާތްތެރިކުރާނީ ހަމައެކަނި ބޭނުންވާ ވަގުތުތަކުގައެވެ.