ސިކުނޑިއާއި ބަނޑުގެ މުޢާމަލާތްކުރުމުގެ ނިޒާމަށް އަސަރުކުރާ ގޮތް ސައިންސްވެރިން ހޯދައިފި

އިންސާނުންގެ ސިކުނޑިއާއި ބަނޑު މުޢާމަލާތްކުރާ ގޮތާއި ބެހޭގޮތުން އަލުން ވިސްނާލަންޖެހޭފަދަ ބޮޑު ހޯދުމެއް ސައިންސްވެރިން ހޯދައިފިއެވެ. އެމެރިކާގެ ޑިއުކް ޔުނިވަރސިޓީ ސްކޫލް އޮފް މެޑިސިންގެ ދިރާސާ ޓީމަކުން ވަނީ ބަނޑުގައި ދިރިއުޅޭ މައިކްރޯބްތަކުން ފޮނުވާ ސިގުނަލްތަކަށް ސިކުނޑިއަށް ވަގުތުން ރިއެކްޓްކުރެވޭ އައު ބަޔޮލޮޖިކަލް ނިޒާމެއް ހޯދައިފައެވެ.

މިނިޒާމަށް އެޓީމުން ދީފައިވާ ނަމަކީ 'ނިއުރޯބަޔޯޓިކްސް ސެންސް' އެވެ. މިނިޒާމު ހުންނަނީ ގޮހޮރުގައި ހުންނަ 'ނިއުރޯޕޮޑް' ކިޔާ ޚާއްސަ ސެލްތަކެއްގެ ތެރޭގައެވެ. ދިރާސާއިން ދައްކާ ގޮތުގައި، މި ސެލްތަކަށް ވަކި ޕްރޮޓީނެއް ދެނެގަނެވުމާއެކު، ވަގުތުން ސިކުނޑިއަށް މެސެޖްތައް ފޮނުވާލަނީއެވެ. މިކަމުގެ ސަބަބުން ކާހިތްވުން ކުޑަކޮށްދިނުމަށް އެހީތެރިވެދެއެވެ. ނަމަވެސް ދިރާސާކުރާ ފަރާތްތަކުން ޤަބޫލުކުރަނީ މިއީ ހަމައެކަނި ފެށުމެއް ކަމުގައެވެ.

މިކަމުގައި މުހިންމު ރޯލެއް އަދާކުރާ އެއްޗަކީ ބަނޑުގެ ބެކްޓީރިއާގެ ފަހަތުގައިވާ (ފްލެޖެލާ) ކަމަށްވާ ގޮހޮރުގައި ހުންނަ 'ފްލެޖެލިން' ކިޔާ ޕްރޮޓީނެކެވެ. ކެއުމުން ބައެއް ބެކްޓީރިއާއިން ފްލެޖެލިން ދޫކުރެއެވެ. ނިއުރޯޕޮޑް ސެލްތަކުން މިޕްރޮޓީން ދެނެގަނެ، 'ޓީ.އެލް.އާރް5' (TLR5) ރިސެޕްޓަރެއްގެ އެހީގައި، ބަނޑާއި ސިކުނޑި ގުޅުވައިދޭ ނާރުގެ މަގުތަކުން ސިގުނަލްތައް ފޮނުވައެވެ. މިސިގުނަލްތަކުން ސިކުނޑިއަށް ބުނެދެނީ ކާހިތްވުން ކުޑަކުރުމަށެވެ. މިއީ ބަނޑުގެ މައިކްރޯބްތަކުން ކެއުމުގެ އާދަތަކަށް ސީދާ އަސަރުކުރާ ކަން ހާމަވެގެންދާ ކަމެކެވެ.

މިކަން ހޯދުމަށް ދިރާސާކުރާ ފަރާތްތަކުން ވަނީ ބަޔަކު ކާންނުދީ ރޭގަނޑު ހައިބަނޑާ ބައިތިއްބުމަށްފަހު،  ގޮހޮރަށް މަދު މިންވަރެއްގެ ފްލެޖެލިން ފޯރުވާފައެވެ. އޭގެފަހުން  ކާނާ ދިނުމުން،  އާންމުކޮށް ކާވަރަށްވުރެ މަދުން ކާފައިވެއެވެ. ނަމަވެސް، ޓީ.އެލް.އާރް5 ރިސެޕްޓަރ ނެތުމުން ކެއުމުގެ އާދަތަކަށް އެއްވެސް ބަދަލެއް ނާދެއެވެ.  އާންމުކޮށް ކައި ނޫނީ އޭގެއިތުރަށްވެސް ކައި، ބަރުދަން އިތުރުވެފައިވެއެވެ. މިކަމުން ކަށަވަރުކޮށްދެނީ "ކެއުން ހުއްޓާލުމުގެ" މެސެޖް ފްލެޖެލިންއިން ސިކުނޑިއަށް ފޯރުކޮށްދިނުމަށް ޓީ.އެލް.އާރް5 އަށް ބޭނުންވާކަމެވެ. މި ދިރާސާއިން ދައްކާ ގޮތުގައި، ޓީ.އެލް.އާރް5 ނެތްނަމަ، ބައެއް ބަނޑުގެ މައިކްރޯބްތަކުން ފޮނުވާ ކެއުމުން ފުދުނު ކަމުގެ ސިގުނަލްތައް ސިކުނޑިއަށް ނުލިބެއެވެ.

ދިރާސާކުރާ ފަރާތްތަކުން ބުނާ ގޮތުގައި، 'ނިއުރޯބަޔޯޓިކްސް ސެންސް' އަކީ ބަނޑުން މައިކްރޯބްތައް ދެނެގަންނަ ގޮތްތަކާއި، ކެއުމުގެ އާދަތަކުން ފެށިގެން މޫޑަށް އަސަރުކުރާ ގޮތްތަކާއި، އަދި ސިކުނޑިން މައިކްރޯބްތަކުގެ ހަރަކާތްތައް ކޮންޓްރޯލްކުރާ ގޮތްތައް ބެލުމަށް ވަރަށް ވަރުގަދަ ވަސީލަތެއްގެ ގޮތުގައި ޚިދުމަތްކުރާނެއެވެ. މުސްތަޤްބަލުގައި، ދިރާސާކުރާ ފަރާތްތަކުން ބޭނުންވަނީ ތަފާތު ކެއުމުގެ އާދަތަކުން ބަނޑުގެ މައިކްރޯބްތަކަށް އަސަރުކުރާ ގޮތާއި، އެބަދަލުތަކުން ސިކުނޑިއާއި ބަނޑުގެ މުޢާމަލާތްކުރުމުގެ ނިޒާމަށް އަސަރުކުރާ ގޮތް ދެނެގަތުމަށެވެ.