ގާނާގައި ހެލިކޮޕްޓަރެއް ވެއްޓި، ދިފާޢީ ވަޒީރާއި ތިމާވެއްޓާއި ބެހޭ ވަޒީރު ހިމެނޭހެން 8 މީހުން މަރުވެއްޖެ

ބުދަ ދުވަހު ގާނާގައި ސިފައިންގެ ހެލިކޮޕްޓަރެއް ވެއްޓި، އެ ގައުމުގެ ދިފާޢީ ވަޒީރާއި ތިމާވެއްޓާއިބެހޭ ވަޒީރު ހިމެނޭހެން ޖުމްލަ 8 މީހުން މަރުވެއްޖެ ކަމަށް އެ ގައުމުގެ ސަރުކާރުން ބުނެފިއެވެ. މިއީ ފާއިތުވި ދިހަ އަހަރަށްވުރެ ގިނަ ދުވަހުގެ ތެރޭގައި ގާނާގައި ހިނގި އެންމެ ހިތާމަވެރި ވައިގެ ހާދިސާތަކުގެ ތެރެއިން އެއް ހާދިސާއެވެ.

ގާނާގެ ސިފައިން ބުނި ގޮތުގައި، މި ހެލިކޮޕްޓަރު ބުދަ ދުވަހުގެ ހެނދުނު ވަނީ އެ ގައުމުގެ ވެރިރަށް އެކްރާ އިން ފުރައިފައެވެ. އާޝާންޓީ ސަރަހައްދުގެ އޮބުއާސީގައި ހުންނަ ރަންކޮނުމުގެ ސަރަހައްދަށް ދަތުރުކުރުމަށް ހެލިކޮޕްޓަރު ދަތުރުކުރަމުން ދަނިކޮށް، ރާޑަރ އިން ގެއްލިފައިވަނީ ހުޅަނގު އުތުރަށް ދަތުރުކުރަނިކޮށެވެ. ހެލިކޮޕްޓަރުގެ ބައިތައް ފަހުން ފެނިފައިވަނީ އާޝާންޓީގެ އަދަންސީ ސަރަހައްދުންނެވެ.

މި ހާދިސާ ހިނގަން މެދުވެރިވި ސަބަބު އަދި ނޭނގެއެވެ. އަދި ސިފައިން މިހާރު ދަނީ މި ހާދިސާގެ ތަހުގީގު ހިންގަމުންނެވެ. މި ހާދިސާގައި މަރުވި 8 މީހުންގެ ތެރޭގައި ދިފާޢީ ވަޒީރު އެޑްވަޑް އޯމާނޭ ބޯއާމާ އާއި ތިމާވެށި ވަޒީރު އިބްރާހިމް މުރުތަލާ މުޙައްމަދު ހިމެނެއެވެ. މީގެ އިތުރުން ވެރިކަންކުރާ ނޭޝަނަލް ޑިމޮކްރެޓިކް ކޮންގްރެސް ޕާޓީގެ ނައިބު ރައީސް ސެމުއެލް ސަރޕޯންގް އާއި ގައުމީ ސަލާމަތީ ކައުންސިލްގެ އިސް އޮފިޝަލެއް ކަމަށްވާ މުނީރު މުޙައްމަދު، އަދި ހެލިކޮޕްޓަރުގެ ހަތަރު ފަޅުވެރިންވެސް މި ހާދިސާގައި މަރުވެފައިވެއެވެ.

މި ހާދިސާއަކީ "ގައުމީ ހިތާމައެއް" ކަމަށް ގާނާ ސަރުކާރުން ސިފަކޮށްފައިވާއިރު، މަރުވި ދިފާޢީ ވަޒީރު ބޯއާމާގެ ގޭކައިރިއަށާއި، ވެރިކަންކުރާ ޕާޓީގެ މައި އިދާރާ ކައިރިއަށް ގިނަ އަދަދެއްގެ މީހުން އެއްވެ ހިތާމަފާޅުކޮށްފައިވެއެވެ.

ގާނާގެ ދައުލަތުގެ މީޑިއާ ރިޕޯޓުތައް ބުނާ ގޮތުގައި،  ވެއްޓުނު ހެލިކޮޕްޓަރަކީ އާއްމުކޮށް ދަތުރުފަތުރަށާއި، ބަލި މީހުން އުފުލުމަށް ބޭނުންކުރާ ޒެޑް-9 (Z-9) ހެލިކޮޕްޓަރެކެވެ. ހާދިސާ ހިނގި ތަނުގެ އޮންލައިން ވީޑިއޯއިން ދައްކާ ގޮތުގައި، ގަސްތަކުގެ ތެރެއަށް ހެލިކޮޕްޓަރު ވެއްޓި އަލިފާން ރޯވެފައި ހުއްޓައި، މީހުން އެ ސަރަހައްދަށް އެއްވެ އެހީތެރިކަން ފޯރުކޮށްދޭން މަސައްކަތްކުރާ މަންޒަރު ފެނެއެވެ.

މީގެ ކުރިން ވެސް ގާނާގައި ވައިގެ ހާދިސާތައް ހިނގާފައިވެއެވެ. 2014 ވަނަ އަހަރުގެ މެއި މަހު ގާނާގެ އައްސޭރިފަށުން ސާރވިސް ހެލިކޮޕްޓަރެއް ވެއްޓި 3 މީހުން މަރުވެފައިވެއެވެ. އަދި 2012 ވަނަ އަހަރު ވެރިރަށް އެކްރާގައި މުދާ އުފުލާ ބޯޓެއް ރަންވޭ އިން ބޭރުވެ، ބަހަކާ ޖެހި 10 މީހުން މަރުވެފައިވެއެވެ.

މިފަހަރުގެ ހާދިސާގައި ހެލިކޮޕްޓަރުގައި ތިބި އެންމެން މަރުވި ކަމަށް އެ ގައުމުގެ ކަމާބެހޭ ފަރާތްތަކުން ވަނީ ކަށަވަރުކޮށްދީފައެވެ.