ޖަޕާނާއި ރަޝިޔާއަށް ސުނާމީއަރައިފި، އެމެރިކާއަށް ނުރައްކަލުގެ އިންޒާރު

ފަހުގެ 15 އަހަރު ތެރޭގައި އައި އެންމެ ބާރުގަދަ ބިންހެލުންތަކުގެ ތެރޭގައި ހިމެނޭ 8.7 މެގްނިޓިއުޑްގެ ބާރުގަދަ ބިންހެލުމަކާ ގުޅިގެން ރަޝިޔާ، ޖަޕާން އަދި އެމެރިކާއަށް ވަނީ ސުނާމީގެ ނުރައްކަލުގެ އިންޒާރު ނެރެފައެވެ. މި ބިންހެލުމުގެ ސަބަބުން މިއަދު ހެނދުނު ރަޝިޔާ އަދި ޖަޕާނުގެ އަވަށްތަކަށް ވަނީ ސުނާމީ އަރައިފައެވެ.

މިއަދުގެ ބިންހެލުމަކީ 2011 ވަނަ އަހަރުގެ ފަހުން ދުނިޔޭގައި އައި އެންމެ ބާރުގަދަ ބިންހެލުމުގެ ގޮތުގައި ފާހަގަކުރެވޭ ބިންހެލުމެވެ. މި ބިންހެލުމަށްފަހު ޖަޕާނުގެ ދެ މިލިއަނާ ގާތްކުރާ އަދަދެއްގެ މީހުން ވަނީ އެކި ސަރަހައްދުތަކުން ބަދަލުކޮށްފައެވެ. ޖަޕާނުގެ އިރުމަތީ  ސިޓީތަކާއި އެމެރިކާގެ ހުޅަނގު ސިޓީތަކަށް ވެސް ސުނާމީގެ އިންޒާރު ނެރެފައިވެއެވެ. މިހާރު ވެސް ރަޝިޔާގެ ކުރުލް އައިލެންޑްސްގެ ބައެއް ސަރަހައްދުތަކަށާއި ޖަޕާނުގެ ބޮޑު އުތުރުގެ ހޮކައިޑޯ އަށް ސުނާމީގެ ރާޅުތައް ވަނީ އަރައިފައެވެ.

ސުނާމީގެ ސަބަބުން ނާސަރީއަކަށް ގެއްލުންތަކެއް ލިބިފައިވީ ނަމަވެސް މީހުންނަށް ބޮޑެތި އަނިޔާތަކެއް ލިބިފައިވާކަމަށް ރިޕޯޓްކޮށްފައެއް ނުވެއެވެ. ރަޝިޔާގެ ކުރުލް އައިލެންޑްސްގެ ސެވަރޯ-ކުރުލްސްކް ބަނދަރަށް ވަނީ ސުނާމީގެ ސަބަބުން ފެންބޮޑުވެ ގެއްލުންތަކެއް ލިބިފައެވެ. ހަވާއީއަށް ކުރާ ގިނަ ދަތުރުތައް ވަނީ މެދުކަނޑާލާފައެވެ.

ހަވާއީގެ ސިޓީތަކުގައި ގިނަ އަދަދެއްގެ ރައްޔިތުން ވަނީ ސުނާމީގެ ބިރުވެރިކަމާ ގުޅިގެން އެމީހުންގެ ގެދޮރުދޫކުރުމަށް  އިލްތިމާސްކޮށް، ރައްކާތެރި ހިސާބުތަކަށް ބަދަލުވެފައެވެ. އެމެރިކާގައި، ސެން ފްރެންސިސްކޯ ފަދަ އެހެން ސަރަހައްދުތަކަށް ވެސް މި ކަމުގެ ސަބަބުން ކަންބޮޑުވުން ފާޅުކޮށްފައިވެއެވެ.

އޮފިޝަލުން އިލްތިމާސްކުރައްވާފައި ވަނީ ކަނޑުމަތީ މަސައްކަތްކުރާ ފަރާތްތަކުން މިއަދު އެފަދަ މަސައްކަތްތަކުން ދުރުހެލިވުމަށެވެ. މީގެ އިތުރުން ފަތުރުވެރިން، ސަރުކާރުގެ ކަމާބެހޭ ފަރާތްތަކުން އިތުރު އިންޒާރެއް ދެއްވަންދެން، ކަނޑުގެ އައްސޭރިފަށުގެ ސަރަހައްދުތަކަށް ދިޔުން ހުއްޓާލުމަށް ވަނީ އިލްތިމާސްކުރައްވާފައެވެ.