އަޖިނޯމޯޓޯ އެމްއެސްޖީ: ޞިއްޙަތަށް ރައްކާތެރި އެއްޗެއްތަ ނުވަތަ ގެއްލުންދޭ އެއްޗެއްތަ؟

އަޖިނޯމޯޓޯ ކޯ، އިންކް އަކީ ޖަޕާނުގެ ކާބޯތަކެއްޗާއި ބަޔޯޓެކްނޮލޮޖީގެ ރޮނގުން މަޝްހޫރު ކުންފުންޏެކެވެ. މި ކުންފުނިން ދުނިޔެއަށް މޮނޯސޯޑިއަމް ގްލޫޓަމޭޓް (އެމްއެސްޖީ) ތަޢާރަފުކޮށްދިނީ އެ ކުންފުނީގެ އެންމެ މަޝްހޫރު އުފެއްދުމެއް ކަމުގައިވާ އަޖީ-ނޯ-މޯޓޯ މެދުވެރިކޮށް، ގާތްގަނޑަކަށް އެއް ގަރުނު ކުރިންނެވެ. 1909 ވަނަ އަހަރު ފުރަތަމަ ތައްޔާރުކުރެވުނު މި ރަހަ ފުރިހަމަކުރާ ބާވަތް އުފެއްދުމުގެ އިލްހާމު ލިބުނީ ޕްރޮފެސަރ ކިކުނާއެ އިކެޑާ އިން މޫދު ވިނަ ކެއްކި ފެނުން އުމާމީގެ ރަހަ އެކަހެރިކުރުމުންނެވެ. އޭގެ ފަހުން، އެމްއެސްޖީ ވަނީ އޭޝިއާ އާއި އެހެނިހެން ސަރަޙައްދުތަކުގައި މަޤްބޫލު އެއްޗަކަށް ވެފައެވެ. އަދި ގިނަ ބާވަތްތަކުގެ ކާނާގެ ރަހަ މީރުކުރުމަށް ބޭނުންކުރާ އެއްޗެއްގެ ގޮތުގައި މަޝްހޫރުވެފައެވެ.

އެމްއެސްޖީގައި އެކުލެވެނީ ކޯއްޗެއް؟

އެމްއެސްޖީ، ނުވަތަ މޮނޯސޯޑިއަމް ގްލޫޓަމޭޓަކީ، ގްލޫޓަމިކް އެސިޑުން އުފައްދާ އެއްޗެކެވެ. ގްލޫޓަމިކް އެސިޑަކީ ގުދުރަތީގޮތުން ވަރަށް ގިނަ ކާބޯތަކެތީގައި ހުންނަ އެމައިނޯ އެސިޑެކެވެ. މިސާލަކަށް ޓޮމާޓޯ، ޗީޒް އަދި މަޝްރޫމްގައި މިމާއްދާ ހުރެއެވެ. ވިޔަފާރީގެ ބޭނުމަށް އެމްއެސްޖީ  އާންމުކޮށް އުފައްދަނީ ގަސްގަހާގެހީގެ ބާވަތްތަކުން ހަދާ ތަކެތި ބޭނުންކޮށްގެން ފަރމެންޓޭޝަން މަރުހަލާއެއްގެ ތެރެއިންނެވެ. މިސާލަކަށް އުއްދަނޑި، ޒުވާރި ނުވަތަ ދަނޑިއަލުވި ބޭނުންކުރެވެއެވެ. މީގައި އޫރުމަހުގެ ނުވަތަ ޖަނަވާރުންގެ އެއްވެސް ބައެއް ނުހިމެނެއެވެ. އަދި އަޖިނޮމޯޓޯ ފަދަ ދުނިޔޭގެ އެންމެ ބޮޑެތި އެމްއެސްޖީ އުފައްދާ ފަރާތްތަކުން ކަށަވަރުކޮށްދީފައިވަނީ އެފަރާތްތަކުން އުފައްދާ އެމްއެސްޖީ އަކީ 100% ވެޖިޓޭރިއަން އަދި ހަލާލް ސެޓިފައިޑް އެއްޗެއްކަމެވެ. މިކަން ދުނިޔޭގެ އެކި ކަންކޮޅުތަކުގައިވާ ހަލާލް ސެޓިފިކޭޝަން ދޫކުރާ ފަރާތްތަކުން ވަނީ ޔަޤީންކޮށްދީފައެވެ.

އެމްއެސްޖީ ރައްކާތެރިތަ؟

އެމްއެސްޖީގެ ރައްކާތެރިކަމާ ގުޅޭގޮތުން ދިގު މުއްދަތެއްގެ ތެރޭގައި ޚިޔާލު ތަފާތުވުންތަކެއް އުފެދިފައިވީ ނަމަވެސް، ގިނަ ސައިންޓިފިކް ދިރާސާތަކާއި ކާބޯތަކެތީގެ ރައްކާތެރިކަމާބެހޭ އޮތޯރިޓީތަކުން މިހާރު ނިންމާފައިވަނީ އެމްއެސްޖީ އަކީ ރައްކާތެރި އެއްޗެއްކަމަށެވެ. ޔޫ.އެސް. ފުޑް އެންޑް ޑްރަގް އެޑްމިނިސްޓްރޭޝަން (އެފްޑީއޭ)، ދުނިޔޭގެ ޞިއްޙަތު ޖަމްޢިއްޔާ (ޑަބްލިޔުއެޗްއޯ)، އަދި ޔޫރަޕިއަން ފުޑް ސޭފްޓީ އޮތޯރިޓީ (އީއެފްއެސްއޭ) ފަދަ މުއައްސަސާތަކުން އެމްއެސްޖީގެ ރައްކާތެރިކަން ފުޅާ ދާއިރާއެއްގައި ދިރާސާކޮށް، އާންމު ކާނާގެ މިންވަރުތަކުގައި ބޭނުންކުރުމަށް ރައްކާތެރި އެއްޗެއްކަމަށް ނިންމާފައިވެއެވެ.
އެމްއެސްޖީގެ ފައިދާތަކުގެ ތެރޭގައި:

ރަހަ އިތުރުކުރުމާއެކު ޖުމުލަ ސޯޑިއަމްގެ މިންވަރު މަދުކުރެވުން: އެމްއެސްޖީ ގައި މޭޒުމަތީ ލޮނުގައި ހުންނަ ވަރަށްވުރެ ތިންބައިކުޅަ ދެބައި މަދުން ސޯޑިއަމް އެކުލެވޭތީ، ލޭގެ ޕްރެޝަރ މަތިވުމާއި ހިތުގެ ޞިއްޙަތާމެދު ކަންބޮޑުވާ މީހުންނަށް މުހިންމު

ކާބޯތަކެތި އުފެއްދުމުގައި ސޯޑިއަމްގެ މިންވަރު މަދުކުރުން: ދިރާސާތަކުން ދައްކާގޮތުގައި އެމްއެސްޖީ ބޭނުންކޮށްގެން ރަހައަށް އުނިކަމެއް ނުގެނެސް ސޯޑިއަމްގެ މިންވަރު %25 އިން %40 އަށް މަދުކުރެވިދާނެއެވެ.

އެހެންނަމަވެސް، ބައެއް މީހުންނަށް އެމްއެސްޖީ އާ ދޭތެރޭ ޙައްސާސްކަން ހުރެދާނެކަން ފާހަގަކުރެވެއެވެ:

ގާތްގަނޑަކަށް %1 އިން %2  މީހުންނަށް ގިނަ މިންވަރަކަށް އެމްއެސްޖީ ބޭނުންކުރުމުން ކުޑަ މިންވަރެއްގެ ޙައްސާސްކަން (މިސާލަކަށް ބޮލުގައި ރިއްސުން، މޫނު ރަތްވުން، ނުވަތަ ހޮޑުލުން) ދިމާވެދާނެއެވެ.

ނަމަވެސް، ކްލިނިކަލް ދިރާސާތަކުން ދައްކާގޮތުގައި އާންމު ކެއުމެއްގެ ބައެއްގެ ގޮތުގައި އެމްއެސްޖީ ބޭނުންކުރުމާއި މި އަލާމާތްތަކާ ދެމެދު ދާއިމީ ގުޅުމެއް ނެތެވެ.

އަޖިނޯމޯޓޯ އިން "ކްނޯ އެމްއެސްޖީ" ފަދަ ކެމްޕޭންތައް މެދުވެރިކޮށް، ޝެފުންނާއި، ނިއުޓްރިޝަނިސްޓުންނާއި، އަދި ސައިންޓިސްޓުންނާއެކު މަސައްކަތްކޮށް، ހެއްކާ އެއްގޮތްވާ މަޢުލޫމާތު ފެތުރުމަށާއި އެމްއެސްޖީ އާ ދެކޮޅަށް އޮތް ނޭދެވޭ ވިސްނުން ނައްތާލުމަށް މަސައްކަތްކުރެއެވެ.

ސައިންޓިފިކް އަދި މެޑިކަލް ދާއިރާގެ ގިނަ ބައެއްގެ އިއްތިފާޤަކީ އެމްއެސްޖީ އަކީ ރައްކާތެރި، ބޭނުންތެރި، އަދި ފައިދާހުރި ރަހަ މީރުކުރާ އެއްޗެއް ކަމެވެ. އެއީ ހަމަހަމަ ކާނާގެ ބައެއްގެ ގޮތުގައި އެކަށީގެންވާ މިންވަރަކަށް ބޭނުންކުރާނަމައެވެ.