ދެން މިނޮކްސިޑިލް ހޯދާނެ ކަމެއްނެތް، ބޮލަށް ރޯޒްމޭރީ ފަތް އަޅާ!

ޔޫރަޕްގެ ގިނަ ކެއްކުންތަކުގައި ހިމަނާ ރޯޒްމޭރީ ފަތަކީ ޒަމާނުއްސުރެ އިސްތަށިގަނޑު ރީތިކުރުމަށް ބޭނުންކުރަމުން އަންނަ ފަތެކެވެ. ރޯޒްމޭރީ ފަތްތަކުގައި އެކުލެވޭ ގުދުރަތީ މާއްދާތަކަކީ އިސްތަށިގަނޑަށް ވަރަށް ބޮޑެތި ފައިދާތަކެއް ކޮށްދޭ އެއްޗެކެވެ. ޚާއްޞަކޮށް އިސްތަށި ފޭބުމުގެ މައްސަލަތަކަށް ރޯޒްމޭރީ ފަތަކީ ވަރަށް ރަނގަޅު ޙައްލެކެވެ.

ރޯޒްމޭރީ ފަތުގައި އެކުލެވޭ މުހިންމު މާއްދާތައް

ރޯޒްމޭރީ ފަތުގައި އެކުލެވޭ އެންޓީ-އޮކްސިޑެންޓްތަކާއި، ކާނިކް އެސިޑްގެ ސަބަބުން އިސްތަށީގެ ފޮލިކަލްތައް ހަރުދަނާވެއެވެ. މީގެ އިތުރުން، މި ފަތުގައި އެކުލެވޭ އެންޓi-އިންފްލެމެޓަރީ އަދި އެންޓި-މައިކްރޯބިއަލް ސިފަތަކުގެ ސަބަބުން ބޮލުން ހަންފޮޅުމުގެ މައްސަލަތައްވެސް ޙައްލުވެއެވެ.

ދިރާސާތަކުން ދައްކާގޮތުގައި ރޯޒްމޭރީ ފަތުން ތައްޔާރުކުރެވޭ ތެޔޮ ބޭނުންކުރުމުން، މިނޮކްސިޑިލްއަށްވުރެ ފުރިހަމައަށް ބޮލުގެ ތަލަކަން ނައްތާލެވެ އެވެ. މިނޮކްސިޑިލްއަކީ އިސްތަށިގަނޑު ވަރުގަދަކުރުމަށް ބޭނުންކުރާ ކެމިކަލް ބޭހެކެވެ. އެއާއި ޚިލާފަށް، ރޯޒްމޭރީ ފަތަކީ ގުދުރަތީ އެއްޗެކަށްވެފައި ސައިޑް އިފެކްޓް ކުޑަ އެއްޗެއްވެސް މެއެެވެ. 

ރޯޒްމޭރީ ފަތް ބޭނުންކުރެވިދާނެ ގޮތްތައް

2 މޭޒުމަތީ ސަމްސާ ޒައިތޫނި ތެޔޮ ނުވަތަ ކާށި ތެޔޮ ތެރެއަށް ރޯޒްމޭރީ ފަތް އެޅުމަށްފަހު ތެޔޮފޮދު ހޫނުކޮށްލާށެވެ. ނުވަތަ 4 މޭޒުމަތީ ސަމްސާ ރޯޒްމޭރީ ތެޔޮފޮދެއް މި ތެޔޮތަކުގެ ތެރެއަށް އަޅާލެވިދާނެއެވެ. 30 މިނެޓް ވަންދެން ނުވަތަ އޯވާނައިޓްވަންދެން ބެހެއްޓުމަށްފަހު ބޯ ދޮވެލުމުން އިސްތަށިގަނޑުގައި ރީތި އޮފްކަމެއް ހުންނާނެއެވެ.  
ރޯޒްމޭރީ ފަތް ގަވާއިދުން ބޭނުންކުރަން ފެށުމުން، ގާތްގަނޑަކަށް 6-8 ހަފްތާގެ ތެރޭގައި އިސްތަށިގަނޑަށް އަންނަ ބަދަލުތައް ފާހަގަކުރެވޭނެއެވެ. މީގެ ތެރޭގައި އިސްތަށި ބޯވެ، އިސްތަށީގެ ވިދުން އިތުރުވެ، އިސްތަށި ފައިބާ މިންވަރު މަދުވުން ހިމެނެއެވެ.

ރޯޒްމޭރީ ފަތް ބޭނުންކުރުމުގައި ބައެއް ކަންކަމަށް ސަމާލުވާން ޖެހެއެވެ. އެގޮތުން، ފުރަތަމަ ފަހަރު ބޭނުންކުރާއިރު ބޮލުގެ ކުޑަ ބައެއްގައި ޓެސްޓްކޮށްލުމަށްފަހު، އެލަރޖީއެއް ނުވާކަން ޔަގީންކުރަންވާނެއެވެ. އަދި މާބަނޑު އަންހެނުންނާއި ކުޑަކުދިން ބޭނުންކުރާނަމަ، ޑޮކްޓަރެއްގެ ލަފާ ހޯދުން މުޙިންމެވެ.