އިސްރާއީލާ ދެކޮޅަށް ހަނގުރާމަކުރަން މިތިބީ ތައްޔާރަށް: ސީރިއާގެ ރައީސް

ސީރިއާގެ ވަގުތީ ރައީސް އަޙްމަދު އަލް-ޝަރާޢު، އިޒްރޭލަށް ހަރުކަށި އިންޒާރެއް ދެއްވައި، ގައުމުގެ އެއްބައިވަންތަކަމާއި މަދު ނަސްލެއް ކަމަށްވާ ދުރުޒް މުޖުތަމައު ރައްކާތެތިކުރައްވާނެ ކަމަށް ވަޢުދުވެވަޑައިގެންފިއެވެ. މިކަން ހާމަކުރެއްވީ، ސީރިއާގެ ދެކުނުގެ ސުވެއިދާ ޕްރޮވިންސުގައި ނުތަނަވަސްކަން ބޮޑުވެފައިވާ ދަނޑިވަޅެއްގައި، ބުރާސްފަތި ދުވަހު ޓީވީ މެދުވެރިކޮށް ދެއްވި ތަގުރީރެއްގައެވެ.
ގައުމީ ނުތަނަވަސްކަން ހައްދުފަހަނަޅާފައިވާ މި ދަނޑިވަޅުގައި ގައުމާ މުޚާތަބުކުރައްވަމުން އަލް-ޝަރާޢު ތުހުމަތުކުރެއްވީ، އިޒްރޭލުން ދަނީ ސީރިއާގެ އެތެރޭގެ ދީނީ ފިތުނަތަކުގެ ބޭނުންކޮށް، ގައުމު ބައިބައިކުރުމަށް މަސައްކަތްކުރަމުން ކަމަށެވެ. އެމަނިކުފާނު ފާހަގަކުރެއްވީ، ދިގު ހަނގުރާމަތަކެއް ތަޙައްމަލްކޮށްފައިވާ ސީރިއާގެ ރައްޔިތުން، ބޭރުގެ އެއްވެސް ފަރާތަކަށް ގައުމު އިތުރަށް ނުތަނަވަސްކުރުމުގެ ފުރުސަތު ނުދޭނެ ކަމަށެވެ.

"އަޅުގަނޑުމެންނަކީ މި ބިމުގެ ހައްގު ވާރިސުން. އަދި އަޅުގަނޑުމެން އަބަދުވެސް ތިބީ އެއްބައިވަންތަކަމާއެކު،" އެމަނިކުފާނު ވިދާޅުވިއެވެ. "އިޒްރޭލުން ދަނީ އަޅުގަނޑުމެންގެ އެއްބައިވަންތަކަން ނަގާލަން މަސައްކަތްކުރަމުން، ނަމަވެސް އަޅުގަނޑުމެން އެކަމާ ކުރިމަތިލާނަން."

މި ތަގުރީރު ދެއްވީ، ސުވެއިދާގައި ދުރުޒް މިލީޝިއާތަކާއި ބެޑޫއިން ގަބީލާތަކާ ދެމެދު ހިނގި ހަމަނުޖެހުންތަކަށް ފަހު ވެސް އެހިސާބުގަނޑުގައި އިތުރު ހަމަނުޖެހުންތައް ކުރިއަށްދަނިކޮށެވެ. މި ހަމަނުޖެހުންތައް ފެށުނީ، އެ ސަރަހައްދުގެ ވިޔަފާރިވެރިއަކު ރަހީނުކުރުމާ ގުޅިގެން ކަމަށް ރިޕޯޓްކުރެވޭއިރު، އެކަން ފުޅާވެ، 300 އަށް ވުރެ ގިނަ މީހުން މަރުވެފައިވެއެވެ.

މި ހަމަނުޖެހުންތަކަށް ރައްދުދިނުމުގެ ގޮތުން، އިޒްރޭލުން ވަނީ ދިމިޝްގުގެ ވަށައިގެންނާއި ސުވެއިދާއާ ކައިރީގައި ހުރި ސީރިއާގެ އަސްކަރީ ސައިޓުތަކަށް ވައިގެ ހަމަލާތަކެއް ދީފައެވެ. އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވިދާޅުވީ، މި ހަމަލާތައް ދިނީ ދުރުޒް މުޖުތަމައު ރައްކާތެރިކުރުމަށާއި، އެމަނިކުފާނު ވިދާޅުވި "ރެޖިމްއާ ގުޅުންހުރި މިލީޝިއާތަކަށް" އަމާޒުކޮށް ކަމަށެވެ.

ނަމަވެސް، ރައީސް އަލް-ޝަރާޢު ވަނީ އިޒްރޭލުގެ މި ބަހަނާ ދޫކޮށްލައްވައި، ދުރުޒް މުޖުތަމައު ރައްކާތެރިކުރައްވާނެ ކަމަށް ވަޢުދުވެވަޑައިގެންފައެވެ.

"އެއްވެސް ފަރާތަކަށް ދުރުޒް މުޖުތަމައު ބޭރުގެ އެޖެންޑާތަކަށް ދަމައިގަތުމުގެ ފުރުސަތު އަޅުގަނޑުމެން ނުދޭނަން،" އެމަނިކުފާނު ވިދާޅުވިއެވެ. "އެބައިމީހުން ރައްކާތެރިކުރުމަކީ ހަމައެކަނި ވާޖިބެއް ނޫން، އެއީ ގައުމީ މަސްއޫލިއްޔަތެއް."

އަލް-ޝަރާޢު ވަނީ ސީރިއާގެ ސުލްހައަށް ބުރަވުމުގެ އަޒުމު ފާހަގަކުރައްވާފައެވެ. ނަމަވެސް، ބޭނުންވެއްޖެނަމަ ގައުމު ދިފާއުކުރުމަށް ތައްޔާރުކަމުގެ އިންޒާރެއް އެމަނިކުފާނު ދެއްވިއެވެ. "އަޅުގަނޑުމެން ހަނގުރާމައަކަށް ބިރެއް ނުގަނެއެވެ،" އެމަނިކުފާނު ވިދާޅުވިއެވެ. "އަޅުގަނޑުމެން ސުލްހަ މަސްލަހަތު ހިފެހެއްޓުމުގެ މަގު އިޚްތިޔާރުކުރީ އަޅުގަނޑުމެން ބަލިކަށިވެގެންނެއް ނޫން، އަޅުގަނޑުމެންގެ ރައްޔިތުންނަށްޓަކައެވެ. ހަނގުރާމައެއް ފެށުމަކީ ފަސޭހަ ކަމެއް، ނަމަވެސް އޭގެ ނަތީޖާ ކޮންޓްރޯލްކުރުމަކީ ފަސޭހަ ކަމެއް ނޫން."

ރައީސް ފާހަގަކުރެއްވީ، ސުވެއިދާގެ ހާލަތު ކޮންޓްރޯލްކުރުމަށް ސީރިއާގެ ސިފައިން އަވަސް ފިޔަވަޅުތައް އަޅާފައިވާ ކަމަށެވެ. އެމަނިކުފާނު ވިދާޅުވީ، އަސްކަރީ އޮޕަރޭޝަންތައް "ގާނޫނާ ޚިލާފު ގްރޫޕުތަކާ" ދެކޮޅަށް ނިންމާލެވިފައިވާ ކަމަށާއި، ދުރުޒްގެ ދަނޑުވެރި ރައްޔިތުންނާ އެކު ކުރެވުނު މަޝްވަރާތަކަށް ފަހު ސަރަހައްދުން ސިފައިން ފޭބުމުގެ މަސައްކަތް ފަށާފައިވާ ކަމަށެވެ.

ސީރިއާގެ ރަސްމީ ނިއުސް އެޖެންސީ ސަނާ އިން ރިޕޯޓްކުރާ ގޮތުގައި، މިކަން އަންނަނީ ސަރުކާރާއި ދުރުޒްގެ ބޮޑުންނާ ދެމެދު ސުލްހަ އަނބުރާ ގެނެސް، އިތުރު ލޭއޮހޮރުވުން ހުއްޓުވުމަށް އެއްބަސްވެފައިވާ އެއްބަސްވުމެއްގެ ތެރެއިންނެވެ.

އަލް-ޝަރާޢު އިތުރަށް ތުހުމަތުކުރެއްވީ، މިދިޔަ ޑިސެމްބަރު މަހު އަސަދު ސަރުކާރު ވެއްޓުނު ފަހުން އިޒްރޭލުން ދަނީ ސީރިއާ ނުތަނަވަސްކުރުމަށް މަސައްކަތްކުރަމުން ކަމަށެވެ. އެމަނިކުފާނު އިންޒާރުދެއްވީ، ބޭރުގެ ބާރުތަކުގެ ހަނގުރާމައިގެ މައިދާނަކަށް ސީރިއާ ވެގެން ދިޔުމުގެ ފުރުސަތު ދިމިޝްގުން ނުދޭނެ ކަމަށެވެ.

މިދަނޑިވަޅުގައި، މި ބޮޑުވެފައިވާ ހަމަނުޖެހުން ހައްލުކުރުމަށް ބައިނަލްއަގްވާމީ މަސައްކަތްތައް ދަނީ ކުރިއަށެވެ. އެމެރިކާގެ ޚާރިޖީ ވަޒީރު މާކޯ ރޫބިއޯ ބުދަ ދުވަހު އިއުލާންކުރެއްވީ، ވޮޝިންގޓަން އާއި ސަރަހައްދީ އެކުވެރިން ގުޅިގެން ހާލަތު މަޑުޖައްސާލުމުގެ ޕްލޭނަކަށް އެއްބަސްވެފައިވާ ކަމަށެވެ. އަދި އަވަހަށް ހަނގުރާމަ ހުއްޓާލުމުގެ އެއްބަސްވުމެއް ގާއިމުވާނެ ކަމަށް އުންމީދުކުރައްވާ ކަމަށް ވެސް އެމަނިކުފާނު ވިދާޅުވިއެވެ.

ސީރިއާގެ ޚާރިޖީ ވުޒާރާއިން ވަނީ އެމެރިކާގެ މެދުވެރިކަމަށް މަރުހަބާ ކިޔާފައެވެ. އެމެރިކާގެ މި މަސައްކަތަކީ ސީރިއާގެ ސިޔާދަތާއި ސަރަހައްދީ އެއްބައިވަންތަކަން ދެމެހެއްޓުމަށް ކުރާ ބިނާކުރަނިވި މަސައްކަތެއް ކަމަށް ސިފަކޮށްފައިވެއެވެ.
ހާލަތު އަދިވެސް ހަމަޖެހުމެއް ނެތް ނަމަވެސް، ސީރިއާގެ ލީޑަރުން ދަނީ ގައުމީ ފެންވަރުގައި ބާރު ދައްކައި، ބޭރުގެ ބާރުތަކަށް މި މެސެޖު ދެމުންނެވެ: އެތެރޭގެ ކަންކަމަށް ބޭރުގެ އެއްވެސް ފަރާތަކުން ނުފޫޒު ފޯރުވުމާއި ނުތަނަވަސްކަން އުފެއްދުމަށް ފުރުސަތެއް ނުދޭނެއެވެ.