އީރާނުގެ ނިއުކްލިއަރ މަރުކަޒުތައް: ހަމަލާތަކުން އެދެވޭ ނަތީޖާއެއް ލިބުނުބާ؟

އީރާނާއި އިޒްރޭލާ ދެމެދު އެމެރިކާގެ އެހީތެރިކަމާއެކު ހަނގުރާމަ ހުއްޓާލުމަށް އެއްބަސްވުމަށް ވާސިލުވުމާއެކު، އީރާނުގެ ނިއުކްލިއަރ ފެސިލިޓީޒްތައް ފުރިހަމައަށް ނައްތާލެވިފައި ނުވާކަމަށް، އެކަމަކު ހަމައެކަނި ބާރުކަނޑުވައިލެވިފައިވާ ކަމަށް ބުނާ އިންޓެލިޖެންސް ރިޕޯޓެއް ފެންމަތިވެއްޖެއެވެ.

ޕެންޓަގަންގެ އިންޓެލިޖެންސް އޮފީސް ކަމަށްވާ ޑިފެންސް އިންޓެލިޖެންސް އޭޖެންސީ (ޑީ.އައި.އޭ) އިން ތައްޔާރުކޮށް، ސީ.އެން.އެން އަދި ނިއު ޔޯކް ޓައިމްސް އިން ރިޕޯޓުކޮށްފައިވާ މި ސިއްރު ރިޕޯޓުގައި ބުނެފައިވަނީ، އީރާނުގެ ނިއުކްލިއަރ ސައިޓުތަކަށް އެމެރިކާއިން ދިން ބޮން ހަމަލާތަކަކީ ޑޮނަލްޑް ޓްރަމްޕް ދައުވާ ކުރެއްވި ގޮތަށް "ފުނޑުފުނޑުކޮށްލާފައިވާ" ހަމަލާތަކެއް ނޫން ކަމަށާއި،އެއީ ހަމައެކަނި  މަދު މަސްކޮޅަކަށް އީރާންގެ މަސައްކަތް ފަހަތަށް ޖައްސާލުމެކެވެ.

އިންޓެލިޖެންސްގެ މި އަންދާޒާގައި އިތުރަށް ބުނެފައިވަނީ، އެމެރިކާގެ ޖެޓްތަކުން ބޮން އެޅުމުގެ ކުރިން އީރާނުން އެމީހުންގެ ނިއުކްލިއަރ ރައްކާކުރާ ތަކެތި ސަލާމަތް ކުރެވިފައިވާ ކަމަށެވެ. އަނެއްކޮޅުން، އިންޓަނޭޝަނަލް އެޓޮމިކް އެނަރޖީ އޭޖެންސީ (އައި.އޭ.އީ.އޭ) ގެ ޑިރެކްޓަރ ޖެނެރަލް ރަފައެލް ގްރޮސީ ވިދާޅުވީ، އީރާނުން 60 ޕަސެންޓަށް ޔޫރޭނިއަމް މުއްސަނދިކޮށްފައި ހުރި 400 ކިލޯގްރާމް ޔޫރޭނިއަމް ހުރި ތަނެއްގެ މައުލޫމާތެއް އެބޭފުޅުންނަށް ލިބިފައިނުވާ ކަމަށެވެ.

އީރާނުންވެސް ވަނީ ހަމަލާތަކުގެ ކުރިން އެމީހުންގެ ނިއުކްލިއަރ މުދާތައް ސަލާމަތްކުރި ކަމަށާއި، އަދި ވަރަށް އަވަހަށް އެކަމުގެ މަސައްކަތް އަލުން ފަށާނެ ކަމަށް ދައުވާކޮށްފައެވެ. އެމެރިކާގެ ރައީސް ޑޮނަލްޑް ޓްރަމްޕް ވަނީ މި ރިޕޯޓު ނެރުނު ކަމަށްޓަކައި ސީ.އެން.އެން އާއި ނިއު ޔޯކް ޓައިމްސް އަށް ވަރަށް ބޮޑަށް ފާޑުވިދާޅުވެ، އެ ރިޕޯޓަކީ ދޮގު ރިޕޯޓެއް ކަމަށް ވިދާޅުވެފައެވެ. ޓްރަމްޕް ވަނީ ޓްރޫތު ސޯޝަލްގައި ރުޅިވެރިކަން ފާޅުކުރައްވަމުން، އެއީ ތާރީޚުގައި ހިންގާފައިވާ އެންމެ ކާމިޔާބު އަސްކަރީ ހަމަލާތަކުގެ ތެރެއިން އެއް ހަމަލާއަށް ބަދުނާމު ކުރުމަށް ކުރި މަސައްކަތެއް ކަމަށް ވިދާޅުވެފައެވެ. އީރާނުގައި ހުރި ނިއުކްލިއަރ ސައިޓުތައް ފުރިހަމައަށް ނައްތާލެވިފައިވާ ކަމަށް އެމަނިކުފާނު ވަނީ ތަކުރާރުކޮށް ވިދާޅުވެފައެވެ.

ނަމަވެސް ނިއުކްލިއަރ ރައްކާކުރާ ތަކެތި އަދިވެސް ހުރި ކަމަށް ދައުވާކުރީ ހަމައެކަނި މި އިންޓެލިޖެންސް ރިޕޯޓު އެކަންޏެއް ނޫނެވެ. އެމެރިކާގެ ކޮންގްރެސް މެންބަރު، ޑިމޮކްރެޓް ބްރެޑް ޝަރްމަން ވަނީ ބީ.ބީ.ސީ އަށް ދެއްވި ބަސްދީގަތުމެއްގައި އީރާނުގެ ނިއުކްލިއަރ ރައްކާކުރާ ތަކެތި އަދިވެސް އެބަހުރި ކަމަށާއި، އެއީ ނިއުކްލިއަރ ހަތިޔާރުގެ ނުވަ ހަތިޔާރު ހަދަން ފުދޭވަރަށް ހުރި ތަކެތި ކަމަށް ވިދާޅުވެފައެވެ.

މިއީ ވަރަށް މުހިންމު އިތުރު ދައުވާއެކެވެ. މިހުރިހާ ކަމެއް ތެދުނަމަ، އެމެރިކާއާއި އިޒްރޭލަށް އެމީހުންގެ މަޤްސަދުތައް ހާސިލްކުރެވިފައި ނުވަނީއެވެ. އަދި އެމީހުންގެ ދައުވާތަކުގައި ހަޤީޤަތެއް ނެތީއެވެ. ނަމަވެސް ކުރީގެ ޕެންޓަގަންގެ އޮފިޝަލެއް ވަނީ މިކަން ވަރަށް ސާފުކޮށްދީފައެވެ. އީރާނުން ނިއުކްލިއަރ ހަތިޔާރު ހޯދާފާނެ ހިސާބަކަށް ނުދާކަން ކަށަވަރު ކުރުމަށްޓަކައި އިތުރު ހަމަލާތައް ދިނުމުގެ ފުރުސަތު އެބައޮތް ކަމަށެވެ.

އީރާނަށް އެމީހުންގެ ސެންޓްރިފިއުޖްތައް ސަލާމަތް ކުރެވުނީބާވައެވެ؟ އެމީހުންގެ ނިއުކްލިއަރ ޕްރޮގްރާމް އަދިވެސް ހިންގޭ ހާލަތުގައި އެބައޮތްބާވައެވެ؟ މިކަންކަމުގެ ފޮޓޯ ވަގުތާއެކު އިތުރަށް ސާފުވާނެއެވެ. ނަމަވެސް މިވަގުތު، އެމެރިކާގެ މެދުއިރުމަތީގެ މަންދޫބު ސްޓީވް ވިޓްކޮފް ވިދާޅުވި ގޮތުގައި، އީރާނާއެކު ކުރެވޭ މަޝްވަރާތައް ވަރަށް އުއްމީދުވެރި ކަމަށާއި، ދިގު މުއްދަތުގެ އެއްބަސްވުމަކަށް ވާސިލްވުމަށް ވޮޝިންގޓަން އުއްމީދު ކުރާ ކަމަށެވެ. އީރާނާއި އިޒްރޭލާ ދެމެދު ހިނގި 12 ދުވަހުގެ ހަނގުރާމައިގެ ސަބަބުން ލިބުނު ފައިދާތަކާއި ގެއްލުންތަކުގެ މައްޗަށް އަންނަ މަދު ހަފްތާތަކުން އިތުރު މައުލޫމާތުތައް ހާމަވާނެއެވެ.