އެމެރިކާގެ ހަމަލާތަކަށްފަހު ގަލްފް އޮފް ހޯމުޒް ބަންދުކުރާނެ ކަމަށް އީރާނުން އިންޒާރު ދީފި

އީރާނުގެ ނިއުކްލިއަރ ސައިޓުތަކަށް އެމެރިކާއިން ދާދި ފަހުން ދިން ވައިގެ ހަމަލާތަކަށްފަހު، ދުނިޔޭގެ ހަކަތަ ފޯރުކޮށްދިނުމުގެ ސިލްސިލާގައި މުހިންމު ދައުރެއް އަދާކުރާ ގަލްފް އޮފް ހޯމުޒް ބަންދުކޮށްލާނެ ކަމަށް އީރާނުން ވަރުގަދަ އިންޒާރެއް ދީފިއެވެ. މިކަމުގެ ސަބަބުން ދުނިޔޭގެ ތެލުގެ ބާޒާރަށް ނޭދެވޭ އަސަރުތަކެއް ކުރިމަތިވެ، ތެލުގެ އަގުތައް ވަނީ އުފުލިފައެވެ.

އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރ.ޖީ.ސީ.) ނޭވީގެ ވެރިޔާ، ބްރިގޭޑިއަރ ޖެނެރަލް އަލީރެޒާ ތަންގްސިރީ، ގައުމީ ޓީވީން ދެއްވި ތަގުރީރެއްގައި ވިދާޅުވީ، އީރާނުގެ ސިޔާދަތަށް ގޮންޖެހުންތައް ކުރިމަތިވަމުން ދާނަމަ، ގަޑިއިރުތަކެއްގެ ތެރޭގައި މި ސްޓްރެޓީޖިކް ކަނޑު މަގު ބަންދުކޮށްލުމަށް އީރާނުން ފުރިހަމައަށް ތައްޔާރުވެފައިވާ ކަމަށެވެ.

ޖެނެރަލް ތަންގްސިރީ ވިދާޅުވީ، "އީރާނުގެ ސަރަޙައްދީ އެއްބައިވަންތަކަމާ ޚިލާފުވާ ކޮންމެ ކަމަކަށް އީރާނުން ވަރުގަދަ ރައްދެއް ދޭނެ، އަނިޔާވެރިކަމުގެ ހަރަކާތްތައް ދެމިހުރެއްޖެނަމަ، ހޯމުޒް  މުޅިން ބަންދުކުރެވޭނެއެވެ. މިއީ އިންޒާރެއް ނޫނެވެ – މިއީ އަޅުގަނޑުމެންގެ ގައުމުގެ ސަލާމަތްތެރިކަން ރައްކާތެރިކުރުމުގެ ކަށަވަރުކުރުން."

ގަލްފް އޮފް ހޯމުޒް އަކީ ޕާޝިއަން ގަލްފާއި ގަލްފް އޮފް އޯމާން އާ ދެމެދުގައިވާ ހަނި ކަނޑުގެ މަގެކެވެ. މިއީ ދުނިޔޭގެ ތެލާއި ގޭހުގެ ވިޔަފާރީގެ މުހިންމު މަގެކެވެ. މި ކަނޑުއޮޅީގެ ފުޅާމިނުގައި 21 ނޯޓިކަލް މޭލާއި 52 ނޯޓިކަލް މޭލާ ދެމެދު ހުރި ނަމަވެސް، ދުނިޔޭގެ އެންމެހައި ތެލުގެ ގާތްގަނޑަކަށް 20 އިންސައްތަ ، ދުނިޔޭގެ ލިކުއިފައިޑް ނެޗުރަލް ގޭސް (އެލް.އެން.ޖީ.) ގެ ގާތްގަނޑަކަށް ތިންބައިކުޅަ އެއްބައި ދަތުރުކުރަނީ މި މަގުންނެވެ. މި ސަރަހައްދަށް އަންނަ ކޮންމެ ހީނަރުކަމަކުން ދުނިޔޭގެ ބާޒާރުތަކަށް ނޭދެވޭ އަސަރުތަކެއް ކޮށްފާނެއެވެ.

އީރާނާއި ސަޢޫދީ ޢަރަބިއްޔާ، އިރާގު، ޔުނައިޓެޑް ޢަރަބް އެމިރޭޓްސް އަދި ގަތަރު ފަދަ ހަކަތަ ބޭރުކުރާ ގައުމުތައް މި ކަނޑުއޮޅިއަށް ބަރޯސާވެފައިވަނީ، މުހިންމު ހަކަތަ ވަސީލަތްތައް މައިގަނޑު ގޮތެއްގައި އޭޝިއާގެ ބާޒާރުތަކަށް ކަމަށްވާ ޗައިނާ، އިންޑިއާ، ޖަޕާން، ދެކުނު ކޮރެއާ، އަދި ސިންގަޕޫރު ފަދަ ގައުމުތަކަށް ފޮނުވުމަށެވެ. މި ގައުމުތަކުން އެކުލެވޭ ބާޒާރަކީ މި ބާވަތުގެ ތަކެތީގެ ތިންބައިކުޅަ ދެބައި ނުވަތަ އެއަށްވުރެ ގިނަ ބޭނުންކުރާ ބާޒާރެކެވެ.

އީރާނުން މިކަން އިޢުލާން ކުރުމާއެކު، ދުނިޔޭގެ ހަކަތަ ބާޒާރުތަކުން ވަގުތުން ރައްދު ދީފައިވެއެވެ. އޭޝިއާގެ ވިޔަފާރީގެ ކުރީކޮޅު ބްރެންޓް ކްރޫޑްގެ އަގު 6 އިންސައްތައަށްވުރެ އިތުރަށް އުފުލުނުއިރު، ވެސްޓް ޓެކްސަސް އިންޓަރމީޑިއޭޓް (ޑަބްލިއު.ޓީ.އައި.) ކްރޫޑްގެ އަގުވެސް ވަނީ އުފުލިފައެވެ. ބާޒާރުގެ ތަހުލީލުކުރާ ފަރާތްތަކުން މި ކުރިއެރުންތައް ގުޅުވައިލަނީ ދިގުދެމިގެންދާނެ ސަޕްލައި ޗެއިންގެ ދަތިތަކާއި ސަރަހައްދީ ހަމަނުޖެހުންތަކުގެ ބިރުވެރިކަން އިތުރުވުމާ އެވެ.

ލަންޑަންގައި ހުންނަ އިނގިރޭސިވިލާތުގެ އިންސްޓިޓިއުޓް އޮފް ސްޓްރެޓީޖިކް ސްޓަޑީޒްގެ  ހަކަތަ ތަހުލީލުކުރާ ފަރާތެއް ކަމަށްވާ ޑރ. ނޫރާ ހަދާދު ވިދާޅުވީ، "އީރާނުން ކަނޑުއޮޅި ބަންދުކުރުމަށް ކުރިއަށް ގޮސްފިނަމަ، ދުނިޔޭގެ އެކި ކަންކޮޅުތަކަށް ވަރަށް ބޮޑު އަސަރެއް ފޯރައިފާނެ. ދުނިޔެއަށް ހަކަތަ އަގުތައް ތާރީޚީ ގޮތެއްގައި އުފުލި، ތެލުގެ އަގު ބެރަލަކަށް 100 ޑޮލަރަށްވުރެ މައްޗަށް ދިއުމުގެ ފުރުސަތު އެބައޮތް. މިއީ ދެން ހަމައެކަނި ސަރަހައްދީ ހަމަނުޖެހުމެއް ނޫން – މިއީ ބައިނަލްއަޤްވާމީ މައްސަލައަކަށް ވެދާނެ ކަމެކެވެ."
ތެލުގެ އަގުތަކުގެ އިތުރުން، އެކްސްޕާޓުން އިންޒާރުދެނީ މިފަދަ ކަނޑުއޮޅިއެއް ބަންދުކުރުމުގެ ސަބަބުން ދިމާވެދާނެ ނޭދެވޭ އަސަރުތަކުގެ ތެރޭގައި ޝިޕިން އިންޝުއަރެންސްގެ ޚަރަދުތަކާއި، ދުނިޔޭގެ އިންފްލޭޝަން، އަދި ބޮޑެތި ބާރުތަކުގެ މެދުގައިވާ ޑިޕްލޮމެޓިކް ހަމަނުޖެހުންތައް އިތުރުވުން ހިމެނޭ ކަމަށެވެ.