އިނގިރޭސި ބޮޑުވަޒީރު އެމެރިކާއިން އީރާނަށް ދިން ހަމަލާތަކަށް ތާއީދުކުރައްވައިފި

އިނގިރޭސިވިލާތުގެ ބޮޑުވަޒީރު ސަރ ކީއަރ ސްޓާރމަރ، އީރާނަށް  އަމާޒުކޮށް  އެމެރިކާ ދިން ވައިގެ ހަމަލާތަކަށް ތާއީދުކުރައްވައިފިއެވެ. އެމަނިކުފާނު ވިދާޅުވީ މި އަސްކަރީ ހަރަކާތްތަކުގެ ސަބަބުން ތެހެރާނުގެ ނިއުކްލިއަރ މަޤްޞަދުތަކުގެ ސަބަބުން ކުރިމަތިވެފައިވާ ނުރައްކާ ކުޑަވެފައިވާ ކަމަށެވެ.

ބޮޑުވަޒީރު ސްޓާރމަރ މިކަން ހާމަކުރައްވާފައިވަނީ އޭނާގެ ރަސްމީ އެކްސް އެކައުންޓްގައި ކުރެއްވި ޕޯސްޓެއްގައެވެ. އެމަނިކުފާނު ވަނީ ނިއުކްލިއަރ ހަތިޔާރު ނުފެތުރުމަށް އިނގިރޭސިވިލާތުން ދަމަހައްޓޭ ސާބިތު މަޤާމުގެ މައްޗަށް ބާރުއަޅުއްވާފައެވެ. "އީރާނަށް ނިއުކްލިއަރ ހަތިޔާރު އުފެއްދުމުގެ ފުރުސަތު ދީގެން ނުވާނެ،" ސްޓާރމަރ ވިދާޅުވިއެވެ. އޭނާ އިތުރަށް ވިދާޅުވީ މެދުއިރުމަތީގެ ހާލަތު ގޯސްވަމުންދާ މި ދަނޑިވަޅުގައި ސަރަހައްދީ ހަމަޖެހުން ދެމެހެއްޓުމަކީ އިނގިރޭސިވިލާތުގެ އެންމެ އިސް އެއް އަސާސް ކަމަށެވެ.
ސުލްޙަވެރި މަޝްވަރާތަކަށް ގޮވާލުންއެމެރިކާގެ އިސްނެގުމުގެ ދަށުން ދެވުނު މި ހަމަލާތަކަށް ތާއީދުކުރައްވަމުން ވެސް، ބޮޑުވަޒީރު ސްޓާރމަރ ވަނީ އީރާނަށް ސުލްޙަވެރި މަޝްވަރާތަކަށް އަނބުރާ އައުމަށް ހިތްވަރުދެއްވާފައެވެ. އެމަނިކުފާނު ފާހަގަކުރެއްވީ ސުލްޙަވެރި ހައްލަކުން ނޫނީ ސަރަހައްދަށް އިތުރު ހަމަޖެހުން ނުގެނެވޭނެ ކަމަށެވެ.

"މެދުއިރުމަތީގެ ހާލަތު އަދިވެސް ވަރަށް ނާޒުކު،" އޭނާ ވިދާޅުވިއެވެ. "ޑިޕްލޮމެޓިކް އަދި ސުލްހަވެރި ގޮތެއް ހޯދުމަށް އީރާނަށް މަޝްވަރާ މޭޒަށް އެނބުރި އައުމަށް އަޅުގަނޑުމެން ގޮވާލަން."

އީރާނުން ދަޢުވާކުރަނީ ނިއުކްލިއަރ ޕްރޮގްރާމަކީ ސުލްޙަވެރިކަމެއް ކަމަށާއި ހަމަލާތަކާއި ދެކެވޭ ވާހަކަތަކާއެކުވެސް، އީރާނުން ވަނީ ނިއުކްލިއަރ ހަތިޔާރު އުފެއްދުމުގެ އެއްވެސް ނިޔަތެއް ނެތްކަމަށް ތަކުރާރުކޮށް ދަޢުވާކޮށްފައެވެ. އީރާނުގެ އޮފިޝަލުން މެދުނުކެނޑި ބުނަމުންދަނީ އެ ޤައުމުގެ ނިއުކްލިއަރ ޕްރޮގްރާމް ފަރުމާކުރެވިފައިވަނީ ހަމައެކަނި ސިވިލް އަދި ސުލްހަވެރި މަޤްޞަދުތަކަށް ކަމަށެވެ. އެގޮތުން ހަކަތަ އުފެއްދުމާއި، މެޑިކަލް ދިރާސާތައް ހިމެނެއެވެ.

އީރާނުގެ ތަރުޖަމާނުން ބުނާގޮތުގައި، އެ ޤައުމުން ވަނީ ބައިނަލްއަޤްވާމީ އެއްބަސްވުންތަކަށް ތަބާވެފައި ކަމަށާއި، އެ ޤައުމުގެ ނިއުކްލިއަރ ސައިޓްތައް އައި.އޭ.އީ.އޭ (އިންޓަނޭޝަނަލް އެޓޮމިކް އެނަރޖީ އޭޖެންސީ) ގެ ބެލެހެއްޓުން ދަށުގައި ދެމިއޮތް ކަމަށެވެ.
އިންޓަނޭޝަނަލް އެޓޮމިކް އެނަރޖީ އޭޖެންސީ (އައި.އޭ.އީ.އޭ) އިން ވަނީ އީރާނުން ނިއުކްލިއަރ ހަތިޔާރު އުފައްދާކަމުގެ އެއްވެސް ހެއްކެއް ނުފެންނަ ކަމަށް ކަށަވަރުކޮށްދީފައެވެ. އެންމެ ފަހުގެ ބަޔާންތަކާއި ބަލާ އިންސްޕެކްޝަންތަކަށް ފަހު، އައި.އޭ.އީ.އޭ އިން ބުނީ އީރާނުގެ ހަރަކާތްތައް ބައިނަލްއަޤްވާމީ ނިއުކްލިއަރ އެއްބަސްވުންތަކުގެ ދަށުން ސުލްޙަވެރި ބޭނުންތަކުގެ ތެރޭގައި ހިމެނޭ ކަމަށެވެ.