ރޯންވީ ފިލްމާއި ޑްރާމާ ބަލާފައެއްނޫން، ރޯންވީ ﷲ ގެ އަޒާބުގެ އާޔަތްތައް ކިޔަވާފަ ބިރުން!

މިއަދުގެ ދުނިޔޭގައި، އަޅުގަނޑުމެން ވަނީ އެކި ބާވަތުގެ މީޑިއާތަކުން ވަށައިލެވިފައެވެ. މި މާޙައުލުގައި، އަޅުގަނޑުމެންނަށް ފެންނަނީ ފިލްމުތަކާއި، ޓީވީ ސީރީޒްތަކާއި، އަދި ހިޔާލީ ކެރެކްޓަރތަކާއި އިޙްސާސީ ގޮތުން ގުޅިފައިވާ މަންޒަރެވެ. އިންސާނުން އުފައްދާފައިވާ ލޯބީގެ ވާހަކަތަކާއި، ހިތާމަވެރި ހާދިސާތަކާއި، ޑްރަމެޓިކް ހިތްދަތިކަންތަކަށް އަޅުގަނޑުމެން ރޮއެވެ. އަދި ހަމައެހެންމެ، ދުވަހަކުވެސް ވުޖޫދުނުވާ ކެރެކްޓަރުތަކަށްޓަކައި ކަރުނަ އޮހޮރުވަމެވެ.

އެހެންނަމަވެސް، ޤުރުއާނުގެ އާޔަތްތައް ކިޔެވޭ ހިނދު - ޚާއްޞަކޮށް ނަރަކައިގެ ޢަޛާބާއި، ކާފިރުންނަށް ދެވޭ ޢުޤޫބާތާއި، ޤިޔާމަތް ދުވަހުގެ ބިރުވެރިކަމުގެ ވާހަކަ ބަޔާންކުރާ އާޔަތްތައް އިވޭއިރު - އަޅުގަނޑުމެންގެ ލޯތައް ވަނީ ހިކިފައެވެ. އަދި ގިނަ މީހުންގެ ހިތްތަކަށް އެއްވެސް އަސަރެއް ނުކުރެއެވެ. މިއީ އިޙްސާސްތައް ދެއްކުމަކީ ނުބައި ކަމެއް ކަމަށް ބުނުމެއް ނޫނެވެ. އެހެނެއްކަމަކު މިއީ ވަރަށް މުހިންމު ސުވާލެއް އުފެދޭ ކަމެކެވެ: އަޅުގަނޑުމެން މި ފަނާވަނިވި ދުނިޔެއަށްޓަކައި އެހާ ފަސޭހައިން ރޯއިރު،  އާޚިރަތުގެ އިންޒާރުތަކަށް އެއްވެސް އަސަރެއް ނުކުރަނީ ކީއްވެބާއެވެ؟

ފިލްމުތަކާއި ވާހަކަތައް ފަރުމާކުރެވިފައި ހުންނަނީ އަޅުގަނޑުމެންގެ މައްޗަށް އަސަރުކުރުވުމަށެވެ. އެތަކެތިން އަޅުގަނޑުމެންގެ އިޙްސާސްތަކަށް އަސަރުކުރުވަނީ މިއުޒިކުންނާއި، ޑައިލޮގުންނާއި، އަދި ވިޝުއަލް އިފެކްޓްސްތަކުންނެވެ. އެހެނެއްކަމަކު އޭގެ އަސަރު ކްރެޑިޓްސް ރޯލްވާހާ އަވަހަށް ކެނޑިގެން ދެއެވެ. އެއާ ޚިލާފަށް، ﷲގެ ބަސްފުޅުތަކަކީ އަބަދަށް ދެމިގެންވާ ޙަޤީޤަތްތަކެކެވެ - އަޅުގަނޑުމެން އެންމެން ދަތުރުކުރަމުންދާ މަންޒިލުގެ ޙަޤީޤަތް ބަޔާންކޮށްދޭ އާޔަތްތަކެކެވެ.

ﷲ އެކަލާނގެއާ ދުރުވެގަންނަ މީހުންނަށް ތައްޔާރުކުރެވިފައިވާ ޢަޛާބުގެ ވާހަކަ ބަޔާންކޮށްދެއްވާއިރު، އެއީ ހިޔާލީ ވާހަކައެއް ނޫނެވެ. އެއީ ފިލްމެއްވެސް ނޫނެވެ. އެއީ މުޅި ޢާލަމްތައް ހެއްދެވި ފަރާތުން އެ ފަރާތުގެ މަޚްލޫޤުންނަށް ދެއްވާ ސީދާ އިންޒާރެކެވެ. ވަގުތު ފާއިތުވެ  ދިއުމުގެ ކުރިން ލޯހުޅުވައި ، ހޭލައި، ވިސްނައި، އެ ފަރާތަށް ރުޖޫޢަވުމަށް ގޮވާލައްވާ ރަޙްމަތްތެރި ގޮވާލެއްވުމެކެވެ.

ރަސޫލާ ﷺ ގެ ޙަދީޘްފުޅުތަކުން އަޅުގަނޑުމެންނަށް އެނގެނީ، އެކަލޭގެފާނު ޤުރުއާން ކިޔަވާ އަޑުއެއްސެވުމުން ކީރިތިކުރައްވާކަމެވެ. އެއީ އަޅުގަނޑުމެންގެ ހިތްތައް މަޑުކޮށްދޭ، އަދި އީމާންކަން އިތުރުކޮށްދޭ އިޙްސާސެކެވެ.
އެހެންވީމާ، ދެން ފަހަރަކު ތިބާ ފިލްމެއްބަލާފަ ނުވަތަ  ވަގުތީ އަދި ހިޔާލީ އެއްޗެއްގެ ސަބަބުން ކަރުނަ އަންނަ ކަމަށް ވާނަމަ، ތިބާގެ އަމިއްލަ ނަފްސާ ސުވާލުކޮށްލާށެވެ: "އެންމެ ފަހުން ޤުރުއާނުގެ ސަބަބުން ތިމަން ރޮއިފައިވަނީ ކޮން އިރަކުން ހެއްޔެވެ؟ ﷲ ނަރަކައިގެ ޢަޛާބު ބަޔާންކުރައްވާ އަޑުއިވުމުން އެންމެ ފަހުން ތިމަންގެ ހިތް ތެޅުނީ ކޮން އިރަކުން ހެއްޔެވެ؟ އާޚިރަތުގެ ޙަޤީޤަތް އެންމެ ފަހުން ތިމަންގެ މައްޗަށް އަސަރުކުރީ ކޮން އިރަކުން ހެއްޔެވެ؟"

ކަންކަމާއި ފުންކޮށް އިޙްސާސްކުރުމަކީ މައްސަލައެއް ނޫނެވެ. އެހެނެއްކަމަކު ތިބާގެ އެންމެ ފުން އިޙްސާސްތައް ތިބާގެ އީމާންކަމަށް ޓަކައި ރައްކާކުރާށެވެ. ތިބާގެ ހިތަށް އަސަރުކުރުވަނީ ޙަޤީޤަތުގައި މުހިންމު ކަންތައްތަކުންނެވެ. ﷲ އަޅުގަނޑުމެންގެ ހިތްތައް މަޑުކޮށްދެއްވައި، އެކަލާނގެއަށް ޓަކައި ބިރުވެތިވެ، ލޯބިވެ، އަދި އިޙްތިރާމުކޮށް ރޯ މީހުންގެ ތެރެއިން އަޅުގަނޑުމެން ލައްވާށިއެވެ. އަޅުގަނޑުމެންގެ ކަރުނަ ޤަބޫލުނުކުރެވޭނެ ދުވަހެއް އައުމުގެ ކުރިންނެވެ.

މި ދުނިޔޭގެ ވަގުތީ އުފާވެރިކަމާއި ހިތާމަތަކަށް އަޅުގަނޑުމެން ދޭ އަހައްމިއްޔަތުކަން، އަޅުގަނޑުމެންގެ އަބަދީ މަންޒިލަށް ދޭންޖެހެއެވެ. އަޅުގަނޑުމެންގެ ހިތްތައް ﷲގެ ޒިކުރުން އާލާކޮށް، އެކަލާނގެ ކަލާމްފުޅުން ފޮނިކަން ލިބިގަނެ، އާޚިރަތުގެ ޙަޤީޤަތަށް ހޭލުންތެރިވާން މަސައްކަތްކުރަމާ ހިނގާށެވެ. އޭރުން އަޅުގަނޑުމެންނަށް ދެމިހުންނަނިވި ސަވާބާއި ނަސީބު ލިބިގެންދާނެއެވެ.