މާތްވެގެންވާ ގެފުޅަށް އައިސް ޙައްޖުވުމަށް މީސްތަކުންނަށް ގޮވައިލެއްވުން

އިންސާނިއްޔަތުގެ ތާރީޚުގައި އެންމެ މަތިވެރި އަދި ފުޅާ ދާއިރާއެއްގައި އިވިގެން ދިޔަ ގޮވާލެއްވުމަކީ އިބްރާހީމްގެފާނު ޙައްޖަށް ގޮވާލެއްވި ގޮވާލުން ކަމުގައި ދެންނެވިދާނެއެވެ. މާތްﷲ ގެ އަމުރުފުޅަށް އިބްރާހީމްގެފާނު ކަޢުބާ ބިނާކުރެއްވުމަށްފަހު، އެކަލޭގެފާނަށް އަމުރުކުރެއްވީ މީސްތަކުންނަށް ޙައްޖަށް ގޮވާލެއްވުމަށެވެ. މިކަން ޤުރުއާނުގައި ބަޔާންވެގެންވަނީ މިފަދައިންނެވެ:

﴿27﴾ وَأَذِّن فِي النَّاسِ بِالْحَجِّ يَأْتُوكَ رِجَالًا وَعَلَىٰ كُلِّ ضَامِرٍ يَأْتِينَ مِن كُلِّ فَجٍّ عَمِيقٍ
އަދި ކަލޭގެފާނު މީސްތަކުންނަށް ޙައްޖަށް އައުމަށް ގޮވައިލައްވާށެވެ! އޭރުން ފައިމަގުގައްޔާއި، އަނަރޫފަ ޖަމަލު މަތީގައި، ދުރުތަންތަނުން އެއުރެން ކަލޭގެފާނުގެ އަރިހަށް އަންނާނެތެވެ.

(ސޫރަތުލް އަލްޙައްޖު: 27)

މި އާޔަތުގައި ބޭނުންކުރައްވާފައިވާ "النَّاسِ" މި ލަފުޒުން އެނގިގެންދަނީ މި ގޮވާލުމަކީ ވަކި ބަޔަކަށް ޚާއްޞަ ގޮވާލުމެއް ނޫންކަމެވެ. އެއީ މުޅި އިންސާނިއްޔަތަށް އަމާޒުކުރެވިފައިވާ ގޮވާލުމެކެވެ. އަދި މި ގޮވާލުމުގެ ނަތީޖާއަކީ ދުރު ހިސާބުތަކުން މީސްތަކުން ކަޢުބާއަށް ޒިޔާރަތްކުރާނެކަމެވެ.

މި ގޮވާލެއްވުމުގެގެ ފުޅާމިނާއި ދުރަށް ފޯރާ މިންވަރު ވަރަށް ރަނގަޅަށް ހާމަވެގެންދެއެވެ. އެއީ ހަމައެކަނި މައްކާއާއި އޭގެ ވަށައިގެންވާ ސަރަޙައްދުތަކަށް އަމާޒުކުރެވިފައިވާ ގޮވާލުމެއް ނޫނެވެ. އެއާ ޚިލާފަށް، މުޅި ދުނިޔޭގެ ހުރިހާ ކަންކޮޅުތަކަކުން މީސްތަކުން މި ގޮވާލުމަށް އިޖާބަދޭނެކަން އާޔަތުން އެނގިގެންދެއެވެ. މިއަދު ވެސް ދުނިޔޭގެ ހުރިހާ ޤައުމަކުން މި ގޮވާލުމަށް އިޖާބަދެމުންދާކަން ފާހަގަކުރެވެއެވެ.

ތަފްޞީރު ޢިލްމުވެރިން ވިދާޅުވެލައްވާ ގޮތުގައި މާތް ﷲ މި އަމުރުފުޅު ކުރެއްވުމުން އެކަމުގެ ޙައިރާންކަން އިބްރާހީމް عَلَيْهِ‭ ‬السَّلاَم  އަށް ލިބިވަޑައިގެންނެވިއެވެ. އަދި "ތިމަންކަލޭގެފާނުގެ އަޑުފުޅު ހުރިހާ މީހުންނަށް އިއްވާނެގޮތެއް އެނގިވަޑައިނުގަންނަވާ ކަމުގައި" ވިދާޅުވިއެވެ. އޭގެ ޖަވާބުގައި މާތް ﷲ އެކަލޭގެފާނަށް އެންގެވީ "ކަލޭގެފާނަށް އޮތީ މީސްތަކުންނަށް ގޮވައިލެއްވުމެވެ. އެ މީހުންނާ ހަމައަށް ފޯރުކޮށްދިނުން އެއީ ތިމަން އިލާހުގެ ކަމެކެވެ." މިފަދައިންނެވެ. ދެން އިބްރާހީމް عَلَيْهِ‭ ‬السَّلاَمُ  އެކަމަށް ގޮވައިލެއްވިއެވެ. "އޭ މީސްތަކުންނޭވެ! އަޅުކަންކުރާނޭ ގެއެއް ތިޔަބައިމީހުންނަށްޓަކައި މާތް ﷲ މި ވަނީ ލައްވައިފައެވެ. މި ގެފުޅަށް އައިސް ޙައްޖުވާށެވެ!"
މި ވާހަކަތައް ގެންނަވަމުން އިބުނު ކަޘީރު އެކަލޭގެފާނުގެ ތަފްސީރުގައި ލިޔުއްވާފައި ވެއެވެ. "އިބްރާހީމް عَلَيْهِ‭ ‬السَّلاَمُ މި ނިދާ އިއްވެވި ހިނދު ފަރުބަދަތައް ތިރިއަށް ޖެހުނެވެ. އަދި އެކަލޭގެފާނު މީސްތަކުންނަށް ޙައްޖަށް ގޮވައިލެއްވި އަޑުފުޅު މުޅި ދުނިޔޭގެ ހުރިހާ ބިތަކަށް ފޯރިއެވެ. އަދި މައިންގެ ބަނޑުގައި ގަރުވަ ގަންނާނޭހާ ބަޔަކަށާއި ބަފައިންގެ ހަށިތަކުން ނުނިކުމެ ތިބި އެންމެންނާ ހަމައަށް ވެސް މިނިދާގެ އަޑުފުޅު ފޯރިއެވެ. އަދި އެ ގޮވައިލެއްވުމުގެ އަޑުފުޅު ފޯރި ގައުގަލާއި ރަށްރަށާއި ގަސްގަހާގެހި ވެސް އިޖާބަދިނެވެ. އަދި ގެފުޅަށް ޒިޔާރަތް ކުރުމުގެ ތައުފީޤު އެބަޔަކަށް ލިޔުއްވާފައިވާ އެންމެން "لَبَّيْكَ ٱللَّهُمَّ لَبَّيْكَ" އެވެ ކިޔައި އިޖާބަދިނެވެ."

މި ގޮވާލުމުގެ އަސަރު އެހާ ފުޅާ ދާއިރާއެއްގައި ފެތުރިގެން ދިޔަކަމީ، ޙައްޖުގެ އަޅުކަމުގެ މަތިވެރިކަމާއި މުހިންމުކަން ދައްކުވައިދޭ ކަމެކެވެ. އިންސާނުންގެ އިތުރުން، ގައުގަލާއި ރަށްރަށާއި ގަސްގަހާގެހި ވެސް މި ގޮވާލުމަށް އިޖާބަދިން ކަމަށް ބަޔާންވެގެންވާއިރު، އޭގެ މާނައަކީ މުޅި ޚަލްޤުތަކުން މި އަޅުކަމުގެ މަތިވެރިކަން ޤަބޫލުކުރި ކަމެވެ.

މިއަދު ވެސް، ކޮންމެ އަހަރަކު ދުނިޔޭގެ އެކި ކަންކޮޅުތަކުން މިލިއަނުން ގުނާ މުސްލިމުން ޙައްޖަށް ޒިޔާރަތްކުރަމުންދާއިރު، އެއީ އިބްރާހީމްގެފާނުގެ މި ގޮވާލުމުގެ އަސަރު ދެމިގެންދާކަމުގެ ހެއްކެކެވެ. މި ގޮވާލުމަށް އިޖާބަދޭ ކޮންމެ މީހަކު "لَبَّيْكَ ٱللَّهُمَّ لَبَّيْكَ"  ކިޔައި، އެ މީހާގެ އަޑުން އިބްރާހީމްގެފާނުގެ ގޮވާލުމަށް އިޖާބަދެއެވެ.

އިބްރާހީމްގެފާނުގެ މި ގޮވާލުމަކީ އިންސާނިއްޔަތުގެ ތާރީޚުގައި އެންމެ ދިގު މުއްދަތަކަށް، އެންމެ ފުޅާ ދާއިރާއެއްގައި އަދި އެންމެ ގިނަ ބަޔަކު އިޖާބަދީފައިވާ ގޮވާލެއްވުމެވެ. މި ގޮވާލުމުގެ ސަބަބުން، ކޮންމެ އަހަރަކު ދުނިޔޭގެ އެކި ކަންކޮޅުތަކުން މުސްލިމުން އެއްތަނަކަށް އެއްވެ، އެކުވެރިކަމާއި އެއްބައިވަންތަކަމުގެ ރޫޙެއްގައި މާތް ﷲ އަށް އަޅުކަންކުރުމުގެ ފުރުޞަތު ލިބިގެންދެއެވެ. މިއީ އިސްލާމްދީނުގެ ޝިޢާރުތަކުގެ ތެރެއިން އެންމެ ފާޅުކަން ބޮޑު އެއް ޝިޢާރެވެ.

އަޅުގަނޑުމެން ކޮންމެ މުސްލިމަކަށް ވެސް ވާޖިބުވެގެންވަނީ، އުމުރުގައި އެއްފަހަރު ނަމަވެސް މި މަތިވެރި ގޮވާލުމަށް އިޖާބަދީ، ޙައްޖުގެ އަޅުކަން އަދާކުރުމަށް މަސައްކަތްކުރުމެވެ. އަދި އެކަމަށް ކުޅަދާނަވެގެންނުވާ މީހުން، އެހެން މީހުންނަށް އެހީތެރިވެދިނުމާއި، އެ މީހުންގެ ދުޢާގައި ޙައްޖަށް ދިއުމުގެ ތައުފީޤު ދެއްވުން އެދި ﷲ އަށް ދުޢާކުރުމެވެ.

މާތް ﷲ އަޅުގަނޑުމެން އެންމެންނަށް ޙައްޖުގެ އަޅުކަން އަދާކުރުމުގެ ތައުފީޤު  ދެއްވާށިއެވެ. އާމީން!