މައްކާ ރޫޓް އިނީޝިއޭޓިވް: ޙައްޖުވެރިންނަށް  ފަސޭހަ ކުރުމަށް ސަރުކާރުން ކުރަމުންދާ މަސައްކަތްތަކަށް ލިބުނު ބޮޑު ކުރިއެރުމެއް

މިއީ ދިވެހި ޙައްޖުވެރިންނަށް އަދި ހުރިހާ ރައްޔިތުންނަށްވެސް އުފާވެރި ޚަބަރެކެވެ. ރައީސުލްޖުމްހޫރިއްޔާގެ ޚާއްޞަ އެދިލެއްވުމަށް ސަޢޫދީ ސަރުކާރުން މައްކާ ރޫޓުގައި ރާއްޖެ ހިމެނިގެން ދިއުމަކީ ރާއްޖޭގެ ރައްޔިތުންނަށް އެތައް ލުއިފަސޭހަތަކެއް މަގުފަހިވެގެންދާނެ ކަމެކެވެ. މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދާއެކު ދިވެހި ޙައްޖުވެރިންނަށް ދެމުންދާ ޚިދުމަތްތައް ފަސޭހަ ކުރުމަށް ސަރުކާރުން ކުރަމުންދާ މަސައްކަތްތަކަށް ލިބުނު ބޮޑު ކުރިއެރުމެކެވެ. 

މި އިނީޝިއޭޓިވްގެ ސަބަބުން ޙައްޖުވެރިންނަށް ލިބިގެންދާނެ ފަސޭހަތައް ވަރަށް ގިނައެވެ. އޭގެ ތެރޭގައި ޙައްޖުވެރިންގެ ބައޯމެޓްރިކް ޑޭޓާ އެއްކުރެވި، އިލެކްޓްރޯނިކް ޙައްޖު ވިސާ ލިބޭނެގޮތް މަގުފަހިވުމާއި، ޙައްޖުވެރިންގެ ސިއްޙީ ނިޒާމާއި ރައްކާތެރިކަމުގެ ފިޔަވަޅުތައް ކަށަވަރުކުރެވުން ހިމެނެއެވެ.

ހަމައެހެންމެ ވެލާނާ އިންޓަރނޭޝަނަލް އެއަރޕޯޓުގައި ޙައްޖުވެރިންނަށް ޚާއްޞަ އިންތިޒާމުތަކެއް ހަމަޖެހިގެންދާނެއެވެ. މީގެ ތެރޭގައި ފޮށިތަކުގައި ޓެގު ޖަހައި، ޙައްޖާޖީންގެ ނަމުގައި ފޮށިތައް ރަޖިސްޓަރީ ކުރެވި، ބޯޑިންގ ޕާސް ވަގުތުން ލިބޭނެގޮތް ހަމަޖެހިގެންދިއުން ހިމެނެއެވެ. އަދި ސަޢޫދީ ޢަރަބިއްޔާއަށް އެތެރެވުމަށް ކުރަންޖެހޭ އެންމެހާ މަސައްކަތްތައް ޙައްޖުވެރިން އަމިއްލަ ޤައުމުން ފުރުމުގެ ކުރިން ނިންމާ، ޖިއްދާ އަދި މަދީނާއަށް ދިޔުމަށް ފުރާ ޓަރމިނަލްއަށް ވަގުތުން ގޮސް، މަޑުނުކޮށް ބޯޓަށް އެރޭނެ ނިޒާމެއް ޤާއިމުވެގެންދާނެއެވެ.

ސަޢޫދީ ޢަރަބިއްޔާގެ އެއަރޕޯޓުގައިވެސް ޙައްޖުވެރިންނަށް ޚާއްޞަ އިންތިޒާމުތަކެއް ހަމަޖެހިގެންދާނެއެވެ. މީގެ ތެރޭގައި ޙައްޖުވެރިންނަށް ކަނޑައަޅާފައިވާ ޓަރމިނަލްއަށް އައުމާއެކު، ޙައްޖުވެރިންނަށް ހަމަޖައްސާފައިވާ ހޮޓަލަށް ވަގުތުން ދެވޭނެ އިންތިޒާމު ހަމަޖެހުމާއި، ފޮށިތައް ޙައްޖުވެރިން  ތިބޭ ހޮޓަލަށް ސީދާ ލިބިގެންދިއުން ހިމެނެއެވެ.

ދިވެހި ޙައްޖުވެރިންނަށް މައްކާ ރޫޓު އިނީޝިއޭޓިވް އިފްތިތާޙްކުރުމަށް ބޭއްވި ޚާއްސަ ރަސްމިއްޔާތު ޝަރަފުވެރިކޮށްދެއްވައި މިއިނީޝިއޭޓިވް އިފްތިތާޙް ކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދެކަނބަލުންނެވެ. މިހަފްލާގައި މައްކާ ރޫޓް އިނިޝިއޭޓިވް ކޮމިޓީގެ ޗެއަރމަން އަދި ސައޫދީގެ ދާޚިލީ ވަޒީރުގެ އެޑްވައިޒަރު ލެފްޓިނެންޓް ޖެނެރަލް ސުލައިމާން ބިން އަބްދުލްއަޒީޒު އަލްޔަޙްޔާ ވަނީ ބައިވެރިވެވަޑައިގެންފައެވެ.  އަދި މި ރަސްމިއްޔާތުގައި ފުރަތަމަ ގްރޫޕުގެ ޙައްޖުވެރިންނަށް ޕާސްޕޯޓު ހަވާލުކުރެވި، އެ ބޭފުޅުންނާ ބައްދަލުކޮށް އަލްވަދާޢު ވިދާޅުވެފައިވެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މި ރަސްމިއްޔާތުގައި ވިދާޅުވީ ރައްޖޭގައި މައްކާ ރޫޓް އިނީޝިއޭޓިވް އިފްތިތާހު ކުރެވުމަކީ ތާރީޚީ ކަމެއް ކަމަށެވެ. އަދި މި ޚިދުމަތުގެ ސަބަބުން ދިވެހި ޙައްޖާޖީންނަށް ގިނަ ލުއިތަކެއް ލިބިގެންދާނެ ކަމަށާއި މި ޚިދުމަތާއެކު ޙައްޖުގެ އަޅުކަމަށް ސައުދީއަށް ކުރާ ދަތުރުތަކަށް އިންގިލާބީ ބަދަލެއް އަންނާނެ ކަމަށް އެމަނިކުފާނު ވިދާޅުވިއެވެ.

ރައީސް އިތުރަށް ވިދާޅުވީ ސައުދީއަރަބިއްޔާއިން މައްކާ ރޫޓް އިނީޝިއޭޓިވްފައި ރާއްޖެ ހިމެނުމަކީ ދެ ޤައުމުގެ ދެމެދުގައި އޮތް ގާތް އަޚުވަންތަ ގުޅުން ދައްކުވައިދޭ ކަމެއް ކަމަށެވެ. އަދި މިއީ އިސްލާމް ދީނާއި އިސްލާމީ އުންމަތަށް ޚިދުމަތް ކުރުމުގައި ސައުދިއަރަބިއްޔާއިން ކުރައްވާ މަސައްކަތް ފެނިގެންދާ ކަމެއް ކަމަށްވެސް އެމަނިކުފާނު ވިދާޅުވިއެވެ.

ރައީސުލްޖުމުޙޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން ދިވެހި ޙައްޖުވެރިންގެ ކަންކަން ފަސޭޙަ ކުރުމަށް ސަރުކާރުގެ ކަމާބެހޭ ހުރިހާ އިދާރާތަކެއް ގުޅިގެން ޙައްޖުވެރިންގެ ކަންކަން ފަސޭހަކުރުމަށް ގިނަ މަސައްކަތްތަކެއް ކުރަމުންދާކަމަށާއި މިކަންކަމުގެ ހެޔޮ ނަތީޖާވެސް ފެންނަމުންދާކަމަށް އިސްލާމީކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވެސްވަނީ ފާހަގަކުރައްވާފައެވެ.

ވަޒީރު ވިދާޅުވީ، މާތް ﷲގެ އިރާދަފުޅާއެކު ދިވެހި ޙައްޖުވެރިންނަށް މިއަހަރު ވަރަށް ގިނަ ފަސޭހަތަކެއް ލިބިގެންދާނެކަމަށާއި ސަޢުދީ ޢަރަބިއްޔާގެ ސަރުކާރުން ކުރިއަށް ގެންދާ މައްކާ ރޫޓު އިނީޝިއޭޓިވްގައި ދިވެހިރާއްޖެ ހިމެނެއްވުމަށް ނިންމެވިކަމީ ދިވެހިރާއްޖޭގެ ޙައްޖުގެ ތާރީޚުގެ ތެރެއަށް އަންނަ އެންމެ ފަސޭހަ ކަންތައްތަކަށް ވެގެންދާނެކަމަށެވެ.

 ވަޒީރު ވިދާޅުވީ، މައްކާ ރޫޓު އިނީޝިއޭޓިވްގެ ފަސޭހަކަން ޙައްޖުވެރިންނަށް އިޙްސާސް ވެގެންދާނީ ޖިއްދާ އެއާޕޯޓުންކަމަށާއި ޙައްޖުވެރިންނަށް ޖިއްދާ އެއާޕޯޓުން ސަޢުދީ ސަރުކާރުގެ އިސްތިޤުބާލު ކުރައްވާނެކަމަށާއި، އިމިގްރޭޝަންގެ ކަންކަމަށް އަދި ފޮށިތައް ނެގުމަށްވެސް ޙައްޖުވެރިން އެއާޕޯޓުގައި މަޑުކުރަން ނުޖެހި ވަގުތުން ހޮޓަލަށް ދެވޭނެކަމަށް ވަޒީރު ވިދާޅުވިއެވެ.

2024 ވަނަ އަހަރު 2 މިލިއަނަށްވުރެ ގިނަ ޙައްޖުވެރިން ޙައްޖުވެފައިވާއިރު، އޭގެ ތެރެއިން 40 އިންސައްތައަށްވުރެ ގިނަ ޙައްޖުވެރިން ވަނީ މައްކާ ރޫޓް އިނީޝިއޭޓިވްގެ ދަށުން ޙައްޖުވެފައެވެ. ދިވެހިރާއްޖެ ހިމެނުމާއެކު މި އިނީޝިއޭޓިވްގައި ބައިވެރިވާ ޤައުމުތަކުގެ އަދަދު 8 އަށް އިތުރުވެގެންދާނެއެވެ. ދިވެހިރާއްޖެއިން މި އަހަރު  1,200 އަށްވުރެ ގިނަ ދިވެހިންނަށް ޙައްޖުގެ ކޯޓާ ލިބިފައިވާއިރު، އަންނަ އަހަރުތަކުގައި މި އަދަދު އިތުރުވެގެންދާނެކަމަށް ބެލެވެއެވެ.

މައްކާ ރޫޓް އިނީޝިއޭޓިވްގެ ސަބަބުން މިހާތަނަށް ދުނިޔޭގެ އެކި ކަންކޮޅުތަކުން 500,000 އަށްވުރެ ގިނަ ޙައްޖުވެރިންނަށް ފަސޭހަ އަދި އަވަސް ޚިދުމަތްތަކެއް ލިބިފައިވެއެވެ. މި އިނީޝިއޭޓިވްގެ ސަބަބުން ޙައްޖުވެރިންގެ ދަތުރުފަތުރުގެ ތަޖުރިބާ ވަރަށް ބޮޑަށް ރަނގަޅުވެގެން ގޮސްފައިވެއެވެ.

މައްކާ ރޫޓް އިނީޝިއޭޓިވްގައި ދިވެހިރާއްޖެ ބައިވެރިވުމަކީ ހަމައެކަނި ދީނީ ކަންކަމުގައި ލިބޭ ފަސޭހައެއް ނޫނެވެ. މިއީ ދިވެހިރާއްޖެއާއި ސަޢޫދީ ޢަރަބިއްޔާއާ ދެމެދު އޮންނަ ގުޅުން އިތުރަށް ބަދަހިވެގެންދާނެ ކަމެކެވެ. ފާއިތުވި އަހަރުތަކުގައި ސަޢޫދީ ޢަރަބިއްޔާއިން ދިވެހިރާއްޖޭގެ ތަރައްޤީއަށާއި، އުމްރާނީ ތަރައްޤީއަށާއި، ސަޤާފީ ކަންކަމަށް ވަރަށް ބޮޑެތި އެހީތެރިކަން ފޯރުކޮށްދީފައިވެއެވެ.

މި އިނީޝިއޭޓިވްގެ ސަބަބުން ދެ ޤައުމުގެ ދެމެދުގައި ފަތުރުވެރިކަމާއި، ތަޢުލީމީ ދާއިރާއާއި، ދީނީ ކަންކަމުގައި އިތުރު ތަރައްޤީއާއި ކުރިއެރުން ލިބިގެންދާނެއެވެ. އަދި މިކަމުގެ ސަބަބުން ދިވެހިރާއްޖެއަކީ އިސްލާމީ ގުޅުންތައް ބަދަހިކުރުމުގައި މުހިންމު ދައުރެއް އަދާކުރާ ޤައުމެއްގެ ގޮތުގައި ފާހަގަކުރެވި، އެހެން މުސްލިމު ޤައުމުތަކާއެކު އެއް ސަފެއްގައި ހިމެނިގެންދާނެއެވެ.

މައްކާ ރޫޓް އިނީޝިއޭޓިވްގައި ދިވެހިރާއްޖެ ބައިވެރިވުމަކީ ދިވެހި ޙައްޖުވެރިންނަށް ލިބުނު ވަރަށް ބޮޑު ކުރިއެރުމެކެވެ. މިކަމުގެ ސަބަބުން ޙައްޖުވެރިންގެ ދަތުރުފަތުރު ފަސޭހަވެ، ޙައްޖުގެ އަޅުކަން އަދާކުރުމަށް އިތުރު ހިތްވަރެއް ލިބިގެންދާނެއެވެ. އަދި ދިވެހިރާއްޖެއާއި ސަޢޫދީ ޢަރަބިއްޔާއާ ދެމެދު އޮންނަ ގުޅުން އިތުރަށް ބަދަހިވެ، އެކި ދާއިރާތަކުން އިތުރު ކުރިއެރުންތަކެއް ލިބިގެންދާނެއެވެ.

މި އިނީޝިއޭޓިވްގެ ސަބަބުން ދިވެހި ޙައްޖުވެރިންނަށް ލިބޭ ފަސޭހަތަކުގެ ތެރޭގައި ޕާސްޕޯޓު ޗެކްކުރުމާއި، ވިސާ ހެދުމާއި، ކަސްޓަމްސް ޗެކްކުރުން ފަދަ ކަންކަން ދިވެހިރާއްޖޭގައި ނިންމާލެވި، ސަޢޫދީ ޢަރަބިއްޔާއަށް ދިޔުމުން ސީދާ ހޮޓަލަށް ދެވޭނެ އިންތިޒާމު ހަމަޖެހިގެންދިއުން ހިމެނެއެވެ. މިއީ ޙައްޖުވެރިންނަށް ވަރަށް ބޮޑު ލުޔެއް ލިބިގެންދާނެ ކަމެކެވެ.

އަދި މީގެ އިތުރުން، މި އިނީޝިއޭޓިވްގެ ސަބަބުން ޙައްޖުވެރިންގެ ސިއްޙީ ރައްކާތެރިކަމަށް އިތުރު ސަމާލުކަމެއް ދެވި، ބޭނުންވާ ވެކްސިންތައް ދިވެހިރާއްޖޭގައި ދެވި، ސިއްޙީ ފަރުވާއަށް ބޭނުންވާ މަޢުލޫމާތު ކުރިއާލާ ހިއްސާކުރެވޭނެއެވެ. މިއީ ޙައްޖުވެރިންގެ ރައްކާތެރިކަމަށް އިތުރު ކަށަވަރުކަމެއް ލިބިގެންދާނެ ކަމެކެވެ.

މައްކާ ރޫޓް އިނީޝިއޭޓިވްގައި ދިވެހިރާއްޖެ ބައިވެރިވުމަކީ މިއީ ދިގު މުއްދަތަކަށް ދެމިގެންދާނެ، އަދި އަހަރުން އަހަރަށް އިތުރަށް ތަރައްޤީވެގެންދާނެ ނިޒާމެކެވެ. އެހެންކަމުން، ކުރިއަށް އޮތް ތަނުގައި ދިވެހި ޙައްޖުވެރިންނަށް އިތުރު ފަސޭހަތަކާއި ޚިދުމަތްތައް ލިބިގެންދާނެކަމީ ޝައްކެއް އޮތް ކަމެއް ނޫނެވެ.

މައްކާ ރޫޓް އިނީޝިއޭޓިވްގައި ދިވެހިރާއްޖެ ބައިވެރިވުމަކީ ދިވެހި ޙައްޖުވެރިންނަށް ލިބުނު ވަރަށް ބޮޑު ކުރިއެރުމެކެވެ. މިކަމުގެ ސަބަބުން ޙައްޖުގެ އަޅުކަން އަދާކުރުމަށް އިތުރު ފަސޭހަތަކެއް ލިބި، ދަތުރުފަތުރުގެ ތަޖުރިބާ ފުރިހަމަވެގެންދާނެއެވެ. އަދި ދިވެހިރާއްޖެއާއި ސަޢޫދީ ޢަރަބިއްޔާއާ ދެމެދު އޮންނަ ގުޅުން އިތުރަށް ބަދަހިވެ، އިސްލާމީ އުއްމަތުގެ އެއްބައިވަންތަކަން އިތުރުވެގެންދާނެއެވެ. މިއީ ހަމައެކަނި ޙައްޖުވެރިންނަށް ލިބޭ ފައިދާއެއް ނޫނެވެ. މިއީ މުޅި ޤައުމަށް ލިބޭ ކުރިއެރުމެކެވެ.