"ޓްރަމްޕް އަޚްމަދު" މިނަން ސީރިއާގެ ތުއްތުކުއްޖަކަށް ދިނުމުން ސަރަޙައްދީ ސަމާލުކަމަށް

ސީރިއާގެ ހޯމްސް ޕްރޮވިންސްގައި ދިރިއުޅޭ ޒައުޖަކު އެމީހުންގެ އަލަށް އުފަން ވި ފިރިހެން ދަރިފުޅަށް ޓްރަމްޕް އަޙްމަދު އަލް ސައްތޫފް މިފަދައިން ނަން ދީފިއެވެ. މިއީ އެމެރިކާގެ  ރައީސް ޑޮނަލްޑް ޓްރަމްޕްގެ ޝަރަފުގައި ދިން ނަމެކެވެ.

މި އާދަޔާ ޚިލާފު ނަން ދިނުމުގެ ފަހަތުގައިވަނީ ޓްރަމްޕް ފަހަކަށް އައިސް ސައޫދީ އަރަބިއްޔާ އާއި ގަލްފް ސަރަހައްދަށް ކުރެއްވި ދަތުރުފުޅެއްގައި ސީރިއާގެ މައްޗަށް އަޅާފައިވާ ބައެއް  ފިޔަވަޅުތައް ލުއިކޮށްދޭނެކަމަށް އިއުލާން ކުރެއްވުމެވެ.

މި ޚަބަރު ވަރަށް އަވަހަށް ސަރަހައްދުގެ އެކި މީޑިއާތަކުގަކުގައި ފެތުރި، އެކި ގޮތްގޮތަށް މީހުން އެކަމާ މެދު ވާހަކަ ދައްކަން ފެށިއެވެ. އަރަބި ދުނިޔޭގެ ބައެއް ހިސާބުތަކުގައި ސިޔާސީ ލީޑަރުންނާއި މަޝްހޫރު މީހުންގެ ނަމުގައި ކުދިންނަށް ނަން ދިނުމަކީ އާދަޔާ ޚިލާފު ކަމެއް ނޫނެވެ. އެއީ ގިނަ ފަހަރު ޝުކުރުވެރިކަން ފާޅުކުރުމުގެ ގޮތުން ނުވަތަ ރަނގަޅު މުސްތަޤުބަލަކަށް އުންމީދު ކުރާކަން ދެއްކުމުގެ ގޮތުންނެވެ.

ސީރިއާއަކީ 1979 އިން ފެށިގެން އެމެރިކާގެ އެކި ދަރަޖައިގެ ފިޔަވަޅުތަކުގެ ދަށުގައިވާ ޤައުމެކެވެ. މި ފިޔަވަޅުތައް އިތުރަށް ހަރުކަށިވެގެން ދިޔައީ 2011 ގައި ސީރިއާގެ އާންމު ހަނގުރާމަ ފެށުމާ ގުޅިގެންނެވެ. މީގެ ސަބަބުން އާންމު ރައްޔިތުން ވަނީ ބޮޑެތި ދަތިތަކާ ކުރިމަތިލާން ޖެހިފައެވެ.

ޓްރަމްޕްގެ ނަމުގައި ދަރިފުޅަށް ނަން ދިނުމުގެ ބޭނުމަކީ ޝުކުރުވެރިކަމާއި އުންމީދު ފާޅުކުރުން ކަމަށް ކުއްޖާގެ ބައްޕަ ބުނެފައިވެއެވެ. "އަޅުގަނޑުމެން ވަރަށް ގިނަ ދުވަހު ވޭން ތަހައްމަލު ކުރަން ޖެހިއްޖެ. މިއީ ފަހަރެއްގައި ކަންކަން ބަދަލުވާނެ ކަމުގެ ނިޝާނެއް ކަމަށް ވެދާނެ،" ކަމަށް އޭނާ ބުނެފައިވެއެވެ.

މި ނަން ދިނުމުގެ ސަބަބުން އެ ކުއްޖާއަށް ރަނގަޅު ނަސީބެއް ލިބޭނެތޯ ނުވަތަ ދިގު މުއްދަތަކަށް ސަމާލުކަން ލިބޭނެތޯ އަދި ނޭނގެއެވެ. ނަމަވެސް މިހާރު ވެސް ޓްރަމްޕް އަޙްމަދު އަލް ސައްތޫފްގެ ނަން ސަރަހައްދުގެ ހުރިހާ ކަންކޮޅުތަކެއްގައި މަޝްހޫރުވެއްޖެއެވެ.