ޓްރަމްޕަށް ހީވަނީ އަޅުގަނޑުމެންނަށް ބިރުދެއްކޭނެ ކަމަށް،އެނދުމަތީގައި މަރުވުމަށްވުރެ ޝަހީދުވުން މާ ލޮބުވެތި:އީރާންގެ ރައީސް

އީރާނުގެ ރައީސް މަސްއޫދު ޕެޒެޝްކިއަން ވަނީ އެމެރިކާގެ ރައީސް ޑޮނަލްޑް ޓްރަމްޕަށް ހަރުކަށި ޖަވާބެއް ދެއްވައިފައެވެ. މިގޮތުން ރައީސް ޕެޒެޝްކިއަން ވިދާޅުވެފައިވަނީ ޓްރަމްޕް ގަލްފު ޤައުމުތަކަށް ކުރައްވަމުންދާ ދަތުރުފުޅުގައި އީރާނަށް ބިރުދައްކަވަމުން ގެންދަވާ ކަމަށެވެ.

ބައިނަލްއަޤްވާމީ މީޑިއާތަކުން ރިޕޯޓުކޮށްފައިވާ ގޮތުގައި ރައީސް ޕެޒެޝްކިއަން ވަނީ ޓްރަމްޕްގެ ފަހުގެ ބަސްފުޅުތަކަށް ހަރުކަށި ރައްދެއް ދެއްވައިފައެވެ. "ތިޔަ ވަޑައިގެންނެވީ އަޅުގަނޑުމެންނަށް ބިރުދައްކަވަންތޯ؟ އަޅުގަނޑުމެން ބިރުދެއްކުމަކަށް ބޯނުލަނބާނަން،" ރައީސް ޕެޒެޝްކިއަން ވިދާޅުވިއެވެ. އަދި އިތުރަށް ވިދާޅުވީ، "ޓްރަމްޕަށް ހީވަނީ އޭނާގެ ބަހުން އަޅުގަނޑުމެންނަށް ބިރުދެއްކޭނެ ކަމަށް. އެކަމަކު އަޅުގަނޑުމެންނަށް އެނދުމަތީގައި މަރުވުމަށްވުރެ ޝަހީދުވުން މާ ލޮބުވެތި."

މި ހޫނު ބަހުސް އައިސްފައިވަނީ އީރާނުގެ ބެލިސްޓިކް މިސައިލް ޕްރޮގްރާމަށް އެމެރިކާއިން އައު ދަތިތަކެއް ކުރިމަތިކޮށްފައިވަނިކޮށެވެ. ޓްރަމްޕްގެ އިދާރާއިން ފަހުން ވަނީ ގިނަ ފަރުދުންނާއި ކުންފުނިތަކަކަށް، އޭގެ ތެރޭގައި ޗައިނާގެ ރައްޔިތުންނާއި ކުންފުނިތައްވެސް ހިމެނޭގޮތަށް، ދަތިތައް ކުރިމަތިކޮށްފައެވެ. މިއީ ޓެހެރާނުގެ މިސައިލް ތަރައްޤީކުރުމުގެ މަސައްކަތަށް އެހީތެރިވެދޭ ކަމަށް ތުހުމަތުކުރެވޭ ފަރާތްތަކެވެ.

މި ދަތިތަކަކީ އީރާނުގެ ތެލުގެ ސިނާއަތާއި ނިއުކްލިއަރ ޕްރޮގްރާމަށް އަމާޒުކޮށްގެން ކުރިން ކުރިމަތިކޮށްފައިވާ ދަތިތަކުގެ މައްޗަށް އިތުރުކުރެވުނު ދަތިތަކެކެވެ. ވޮޝިންގްޓަނުން ބުނާ ގޮތުގައި މި ޕްރޮގްރާމްތަކުން މުޅި ސަރަޙައްދުގެ ސުލްޙައަށް ނުރައްކާވެއެވެ.

މި ދެމެދު، ސައުދީ އަރަބިއްޔާއަށް ކުރެއްވި ދަތުރުފުޅުގައި ރައީސް ޓްރަމްޕް ވަނީ ދެ ކަމެއް ވިދާޅުވެފައެވެ. އެއީ މެދުއިރުމަތީގައި ހިނގަމުންދާ "ޕްރޮކްސީ ހަނގުރާމަތައް" ނިންމުމަށް ގޮވާލެއްވުމާއި، އީރާނުން އައު އެއްބަސްވުމަކަށް އަންނަން އިންކާރުކޮށްފިނަމަ އިތުރު އިޤްތިޞާދީ ދަތިތަކެއް ކުރިމަތިކުރުވާނެކަމުގެ އިންޒާރު ދެއްވުމެވެ. "އަހަރެން ބޭނުންވަނީ އީރާނާއެކު އެއްބަސްވުމަކަށް އާދެވޭތޯ،" ޓްރަމްޕް ވިދާޅުވިއެވެ. "އެކަމަކު އެއްބަސްވުމަކަށް ނާދެވިއްޖެނަމަ، އީރާނަށް މީގެ ކުރިއަށްވުރެ ހަރުކަށި އިޤްތިޞާދީ ދަތިތަކާ ކުރިމަތިލާންޖެހޭނެ."

މިވަގުތު ވޮޝިންގްޓަނާއި ޓެހެރާނާ ދެމެދު އޮތް ގުޅުން އޮތީ ވަރަށް ނާޒުކު ހާލަތެއްގައެވެ. މިހާތަނަށް ކުރެވުނު ޑިޕްލޮމެޓިކް މަސައްކަތްތަކުން މިސައިލް ތަރައްޤީކުރުމާއި ސަރަޙައްދީ ނުފޫޒުފަދަ މުހިންމު މައްސަލަތަކުގައި ދެފަރާތުގެ ތަފާތުތައް ކުޑަކުރެވިފައެއް ނުވެއެވެ. ރައީސް ޕެޒެޝްކިއަންގެ ބަސްފުޅުތަކުން ދޭހަވަނީ އެމެރިކާގެ އަމަލުތައް ޑިޕްލޮމަސީގެ ނަމުގައި ކުރިއަށްދާ އުދުވާނީ ޢަމަލުތަކެއްގެ ގޮތުގައި ޓެހެރާނުން ދެކޭކަމެވެ.

މި މައްސަލައާ ގުޅޭގޮތުން ބަސްބުނާ ފަރާތްތަކުން ދެކޭގޮތުގައި ޓްރަމްޕްގެ ބަސްފުޅުތަކާއި އީރާނާ ދެކޮޅަށް ގެންގުޅުއްވާ ސިޔާސަތުން މި ހާލަތު އިތުރަށް ގޯސްވެގެންދާނެއެވެ. އެހެންނަމަވެސް ކުރިއަށް އޮތް މަޝްވަރާތަކުގައި ހަޤީޤީ ކުރިއެރުމެއް ލިބިއްޖެނަމަ މި ހާލަތު ބަދަލުވުން އެކަށީގެންވެއެވެ.