މުދަލާއި ފައިސާއިން ދުނިޔޭގެ އެއްވެސް ކަމެއް ނުފުދުނު މީހެއްގެ ވާހަަކަ

މުދަލަކީ އެއިން އެއްވެސް ފައިދާއެއް ކުރާނޭ އެއްޗެއް ނޫންކަމުގައި އަހަރެމެން ބުނި ނަމަވެސް އެކަން އަހަރެމެންނަށް ޤަބޫލުކުރެވޭ ހެންހިޔެއް ނުވެއެވެ. އަބަދުވެސް އިންސާނާއަށް ދެވެނީ މުދަލާއި ފައިސާގެ ފަހަތުންނެވެ. މުދާ އެއްކޮށް ޖަމާކޮށް އަތުގައި ގިނަ ކުރުމުގެ ދަހިވެތި ކަމުގައެވެ. ނަމަވެސް މުދަލަކީ އަހަރެމެންނަށް ފައިދާ ހުރި އެއްޗެއް ހެއްޔެވެ؟ އާދޭހެވެ! ފައިދާ ހުރި ގޮތުގައި ހޭދަކޮށްފިނަމަ އެއީ ފައިދާ ކުރަނިވި އެއްޗެކެވެ.

ނަމަވެސް މުދާ ރަނގަޅުގޮތުގައި ހޭދަނުކޮށް، އެ މުދަލުގެ މައްޗަށް ދަހިވެތިވެ ގަތުމަކީ ގެއްލުމާއި ހަލާކު ހުރި ކަމެކެވެ. ހާލުގައި ޖެހިފައިވާ މީހުންނަށް ތަނަވަސް މީހުން ހޭދަކުރަން ޖެހެއެވެ. އެކަމުގެ މައްޗަށް އިންކާރުކުރާ މުދާވެރިންގެ ނިމުން ވަރަށްވެސް ބިރުވެރިއެވެ. އާހިރުގައި އެމީހުންނަށް އޮތީ މަތިމަށްޗަށް ގެއްލުމާއި ހަލާކެވެ. 

ކީރިތި ޤުރުއާނުގެ މާތްވެގެންވާ ބަސްފުޅުތަކުގައި، އިންސާނީ ޤިސްމަތުގެ ފުރިހަމަ ކުލަތައް އަޅުގަނޑުމެންނަށް ދައްކުވައިދެއްވާފައިވެއެވެ. އީމާންކަމާއެކު މަތިވެރިވި މީހުންނާއި، ބޮޑާވެގަތުމުގެ ސަބަބުން ވެއްޓިގެންދިޔަ މީހުންގެ ވާހަކަ އަޅުގަނޑުމެންނަށް އުނގަންނައިދެއްވާފައިވެއެވެ.

ހަލާކުގެ ތެރެއަށް ވެއްޓުނު މީހުންގެ ތެރޭގައި ޤާރޫނު ހިމެނެއެވެ. އޭނާގެ ވާހަކަ ފެށެނީ މުއްސަނދިކަމާއެކު އަދި ނިމެނީ ބިން އޭނާ ދިރުވާލުމާއެކުގައެވެ. އޭނާގެ ވާހަކައަކީ ހަމައެކަނި ފައިސާއާ މުދަލާ ބެހޭ ވާހަކައެއް ނޫނެވެ ، އެއީ ފަސޭހަކަމުގެ ވަގުތުތަކުގައި ހެއްދެވިފަރާތް ހަނދާންނައްތާލާ ކޮންމެ ހިތަކަށް ލިބޭ މިސާލެކެވެ.

ޤާރޫނަކީ ޙައްޤު ނޭނގޭ މީހެއް ނޫނެވެ. އޭނާއަކީ ސަލާމްލެއްވި މޫސާ ޢަލައިހިއްސަލާމްގެ ޤައުމުގެ މީހެކެވެ. ނަބީބޭކަލުންނާއި މުޢުޖިޒާތްތަކުން ޝަރަފުވެރިވެފައިވާ އުއްމަތެކެވެ. ނަމަވެސް ޤާރޫނު ހޮވީ ސީދާވެގެންވާ މަގެއް ނޫނެވެ. އޭނާ ހޮވީ ބޮޑާކަމުގެ މަގެވެ. ﷲ އޭނާއަށް ހިތަށްވެސް ނުގެނެވޭފަދަ މުއްސަނދިކަމެއް ދެއްވިއެވެ. އޭނާގެ ޚަޒާނާތައް އެހާ ގިނައެވެ. އޭނާގެ ގުދަންތަކުގެ ތަޅުދަނޑިތައް އުފުލުމަށްވެސް ވަރުގަދަ ފިރިހެނުންނަށް ބުރައެއްކަމުގައި ވިއެވެ.

﴿76﴾ ۞ إِنَّ قَارُونَ كَانَ مِن قَوْمِ مُوسَىٰ فَبَغَىٰ عَلَيْهِمْ ۖ وَآتَيْنَاهُ مِنَ الْكُنُوزِ مَا إِنَّ مَفَاتِحَهُ لَتَنُوءُ بِالْعُصْبَةِ أُولِي الْقُوَّةِ إِذْ قَالَ لَهُ قَوْمُهُ لَا تَفْرَحْ ۖ إِنَّ اللَّهَ لَا يُحِبُّ الْفَرِحِينَ
ހަމަކަށަވަރުން، ޤާރޫނަކީ، މޫސާގެފާނުގެ ޤައުމުގެމީހުންގެ ތެރެއިންވީ މީހެކެވެ. ފަހެ، އޭނާ އެއުރެންގެ މައްޗަށް ބޮޑާވެގަތެވެ. އަދި ތިމަންރަސްކަލާނގެ އޭނާއަށް ގިނަވެގެންވާ (މުދާތަކުގެ) ޚަޒާނާތައް ދެއްވީމެވެ. ހަމަކަށަވަރުން، ވަރުގަދަ ޖަމާޢަތެއްގެ މީހުންނަށް، އެ ޚަޒާނާތަކުގެ ތަޅުދަނޑިތައް އުފުލުންވަނީ ބުރަވެފައެވެ. އޭނާގެ ޤައުމުގެމީހުން އޭނާއަށް ބުނިހިނދެވެ. (ކިބުރުވެރިވުމުގެގޮތުން) އުފާ ނުކުރާށެވެ! ހަމަކަށަވަރުން، ބޮޑާވުމުގެގޮތުން އުފާކުރާ މީހުންދެކެ ﷲ ލޯބިވެވޮޑިގެނެއް ނުވެތެވެ.

[ސޫރަތުލް އަލްޤަޞަޞް، 28:76]

ޞާލިޙު މީހުން އޭނާއަށް ނަސޭހަތްތެރިވެ، "ބޮޑާނުވާށެވެ. ހަމަކަށަވަރުން، ﷲ ބޮޑާވާ މީހުން ލޯބިވެވޮޑިނުގަންނަވައެވެ. ﷲ ތިބާއަށް ދެއްވާފައިވާ ތަކެތި އާޚިރަތް ހޯދުމަށް ބޭނުންކުރާށެވެ،" މިފަދައިން ބުނި ހިނދު، ޤާރޫނު ޖަވާބުދިނީ ބޮޑާކަމާއެކުގައެވެ:

﴿78﴾ قَالَ إِنَّمَا أُوتِيتُهُ عَلَىٰ عِلْمٍ عِندِي ۚ أَوَلَمْ يَعْلَمْ أَنَّ اللَّهَ قَدْ أَهْلَكَ مِن قَبْلِهِ مِنَ الْقُرُونِ مَنْ هُوَ أَشَدُّ مِنْهُ قُوَّةً وَأَكْثَرُ جَمْعًا ۚ وَلَا يُسْأَلُ عَن ذُنُوبِهِمُ الْمُجْرِمُونَ
އޭނާ ބުންޏެވެ. ތިމަންނާއަށް އެ މުދާ ލިބުނުކަން ކަށަވަރީ، ތިމަންގެ ކިބައިގައިވާ ޢިލްމުވެރިކަމަކުންނެވެ. ހަމަކަށަވަރުން، އޭނާގެ ކުރިން އިސްވެދިޔަ ޖީލުތަކުން އޭނާޔަށްވުރެ މާވަރުގަދަ އަދި މުދާ ގިނަމީހުން ﷲ ހަލާކުކުރެއްވިކަން އޭނާޔަށް ނޭނގެނީހެއްޔެވެ؟ އަދި ކުށްވެރިންނަކަށް، އެއުރެންގެ ފާފަތަކާމެދު ސުއާލެއް ނުކުރައްވާނެތެވެ. (އެބަހީ: އެއުރެންނާ ސުއާލު ކުރެއްވުމުގެ ބޭނުމެއްނެތެވެ. ﷲ ހުރިހާކަމެއް ދެނެވޮޑިގެންވެތެވެ.)
[ސޫރަތުލް އަލްޤަޞަޞް، 28:78]

އޭނާ ދެކުނީ އޭނާއަކީ އޭނާގެ ޤިސްމަތުގެ ވެރިޔާކަމުގައެވެ. އޭނާ އޭނާގެ އަމިއްލަ ވިސްނުމާއި މަސައްކަތަށް ކްރެޑިޓް ދިނެވެ. އޭނާއަށް ހުރިހާ އެއްޗެއް ދެއްވި ފަރާތް ހަނދާންނައްތާލައިފިއެވެ.

ޤާރޫނު އެއްދުވަހަކު އޭނާގެ މުއްސަނދިކަން ފުރިހަމައަށް ދައްކާލަން ނުކުތެވެ. ހިތުގައި ފަސާދަ އުފެދިފައިވާ މީހުން އޭނާއާމެދު ޙައިރާންވިއެވެ. އެމީހުން އޭނާއަށް ޙަސަދަވެރިވިއެވެ. އެހިނދު އިލާހީ އަދަބު އައެވެ. އޭނާގެ ފައިދަށުން ބިން ހުޅުވިގެންދިޔައެވެ.

﴿81﴾ فَخَسَفْنَا بِهِ وَبِدَارِهِ الْأَرْضَ فَمَا كَانَ لَهُ مِن فِئَةٍ يَنصُرُونَهُ مِن دُونِ اللَّهِ وَمَا كَانَ مِنَ الْمُنتَصِرِينَ
ފަހެ، ތިމަންރަސްކަލާނގެ އޭނާއާއި، އޭނާގެ (ޚަޒާނާތަކާއި) ގެއާއެކުގައި، ބިންގަނޑު ގަންބަވައިގެންނެވީމެވެ. ފަހެ، ﷲއާ ދެކޮޅަށް އޭނާޔަށް ނަޞްރު ދޭނޭ އެއްވެސްބަޔެއް ނުވިއެވެ. އަދި ނަޞްރު ލިބޭނޭ މީހުންގެ ތެރެއިންވެސް އޭނާ ނުވިއެވެ.
[ސޫރަތުލް އަލްޤަޞަޞް، 28:81]

އެއްފަހަރު އެހާ އަގުހުރި މީހެއްގެ ގޮތުގައި ބެލެވުނު މީހާ ބިމުގެ ތެރެއަށް ގެއްލިގެންދިޔައެވެ. މިއީ ދުނިޔަވީ ބާރު އެހާ އަވަހަށް ނެތިގެންދާނެކަމުގެ ނިޝާނެކެވެ.

މިދުނިޔޭގައި ޤާރޫނަށް ލިބުނު ނަތީޖާއަކީ ބިރުވެރި ކަމެކެވެ. އެހެނަސް އާޚިރަތުގައި އޭނާ ކުރާނެ ހިތާމައަކީ މާ ބޮޑު ހިތާމައެކެވެ.ކުރިމަތިލާނެ ބިރަކީ މާބޮޑު ބިރެކެވެ.

މުދަލުން ހެޔޮޮތުގައި ހޭދަނުކޮށް އެމުދަލުގެ މައްޗަށް ދަހިވެތިވެ ބޮޑާވާމީހެއްގެ ވާހަކަ ސޫރަތުލް އަލްޙާއްޤާގައި މާތް ﷲ ބަޔާންކުރައްވާފައިވަނީ އޭނާގެ ޢަމަލުތަކުގެ ފޮތް އޭނާގެ ވާތަށް  ލިބޭ މީހެއްގެ ނަފްސުގެ ވާހަކައެވެ. މިއީ ދުނިޔެއިން ފެއިލްވުމުގެ ނިޝާނެކެވެ. މިއީ މިދުނިޔެއަށްޓަކައި ދިރިއުޅެ އާޚިރަތް އިހުމާލުކުރި ކޮންމެ މީހެއްގެ އަޑުކަމުގައިވެސް ވެދާނެއެވެ.

﴿28﴾ مَا أَغْنَىٰ عَنِّي مَالِيَهْ ۜ
ތިމަންގެ މުދާ، ތިމަންނާއަށް އެއްވެސްކަމެއް ފުއްދައެއް ނުދިނެވެ.

[ސޫރަތުލް އަލްޙާއްޤާ، 69:28]

﴿29﴾ هَلَكَ عَنِّي سُلْطَانِيَهْ
ތިމަންގެ އާރާއި ބާރު، ތިމަންގެ ކިބައިން ފިލައިހިނގައްޖެއެވެ.
[ސޫރަތުލް އަލްޙާއްޤާ، 69:29]

މިއީ ފަސޭހަކަމުގައި ދިރިއުޅެ، ޣާފިލުކަމުގައި މަރުވެދިޔަ މީހެއްގެ ހިތްގަދަވެގެންވާ ބަސްތަކެވެ. އެދުވަހު ރަންވެސް، ޚިދުމަތްތެރިންވެސް މުހިންމެއް ނުވާނެއެވެ.

﴿30﴾ خُذُوهُ فَغُلُّوهُ
(ޒަބާނިއްޔަ މަލާއިކަތުންނަށް ﷲ އަންގަވާނެތެވެ.) އޭނާ ހިފައި ކަސްތޮޅު އަޅާށެވެ!

[ސޫރަތުލް އަލްޙާއްޤާ، 69:30]

﴿31﴾ ثُمَّ الْجَحِيمَ صَلُّوهُ
ދެން އޭނާ ނަރަކަޔަށް ވައްދާށެވެ!

[ސޫރަތުލް އަލްޙާއްޤާ، 69:31]

﴿32﴾ ثُمَّ فِي سِلْسِلَةٍ ذَرْعُهَا سَبْعُونَ ذِرَاعًا فَاسْلُكُوهُ
ދެން ހަތްދިހަ މުށުގެ ދިގުމިންހުރި ހިލިހިލާއެއްގައި އޭނާ ހިލިހިލާ ޖަހާށެވެ!

[ސޫރަތުލް އަލްޙާއްޤާ، 69:32]

ކީއްވެގެންތޯ؟

﴿33﴾ إِنَّهُ كَانَ لَا يُؤْمِنُ بِاللَّهِ الْعَظِيمِ
ހަމަކަށަވަރުން، އޭނާ މާތް ﷲއަށް އީމާން ވާކަމުގައެއް ނުވެއެވެ.

[ސޫރަތުލް އަލްޙާއްޤާ، 69:33]

﴿34﴾ وَلَا يَحُضُّ عَلَىٰ طَعَامِ الْمِسْكِينِ
އަދި މިސްކީނުންނަށް ކާންދިނުމަކަށް އޭނާ ބާރުއަޅާކަމުގައެއް ނުވެއެވެ.

[ސޫރަތުލް އަލްޙާއްޤާ، 69:34]

﴿35﴾ فَلَيْسَ لَهُ الْيَوْمَ هَاهُنَا حَمِيمٌ
ފަހެ، މިއަދު މިތާކު އޭނާއަކަށް ރަޙްމަތްތެރިޔަކު ނުވެއެވެ.

[ސޫރަތުލް އަލްޙާއްޤާ، 69:35]

އޭނާގެ އަދަބުގެ އަސްލަކީ މުއްސަނދިކަމެއް ނޫނެވެ - އެއީ ކާފިރުކަމާއި، ބޮޑާކަމާއި، ހިތުގެ ހަރުކަމެވެ. އޭނާ އީމާނެއް ނުވިއެވެ. އޭނާ އޭނާގެ މުއްސަނދިކަން އެހެން މީހުންނަށް އެހީތެރިވުމަށް ބޭނުމެއް ނުކުރިއެވެ. އޭނާ އޭނާގެ ވެރިރަސްކަލާނގެ ޙަޟްރަތުގައި ތަވާޟުޢުވެރިއެއް ނުވިއެވެ.

﴿36﴾ وَلَا طَعَامٌ إِلَّا مِنْ غِسْلِينٍ
އަދި ޣިސްލީނު މެނުވީ (އެބަހީ: ނަރަކައިގެ އަހުލުވެރިންގެ ގައިން އޮހޮރޭ ފާ ދިޔަ މެނުވީ) އޭނާޔަކަށް ކާއެއްޗެއް ނުވެއެވެ.
[ސޫރަތުލް އަލްޙާއްޤާ، 69:36]

އެއްފަހަރު ގަނޑުވަރުތަކާއި ފަށުވީގައި ދިރިއުޅުނު މީހާއަށް ލިބުނު ހިތާމަވެރި ނިމުމެކެވެ. އެއްފަހަރު ހުރިހާ އެއްޗެއް ލިބިފައިވާ މީހާއަށް މިހާރު އެއްވެސް ރަޙްމަތްތެރިއެއް، އެއްވެސް އަރާމެއް، އެއްވެސް ސަލާމަތްވުމެއް ނެތެވެ.

ޤާރޫނުގެ ވާހަކަ އަދި ، ސޫރަތުލް ޙާއްޤާގެ އާޔަތްތަކާ އެކުގައި، އެއީ ގަދަފަދަ ހަނދާންކޮށްދިނުމެކެވެ. ދިރިއުޅުމުގެ ޙަޤީޤީ އަގު ވަޒަންކުރެވެނީ އަޅުގަނޑުމެންނަށް ލިބިފައިވާ އެއްޗަކުން ނޫނެވެ. އެހެނަސް އަޅުގަނޑުމެންނަށް ލިބިފައިވާ އެއްޗަކުން އަޅުގަނޑުމެން ކުރާ ކަންތަކުންނެވެ.

މިއަދު ކިތައް މީހުންނަކީ މިބިމުގައިހިނގާ ޤާރޫނުންތޯއެވެ.ފަސޭހަކަމުގައި ދިރިއުޅޭ، އެކަމަކުﷲ އާ ދުރުގައިވާ މީހުންނެވެ. ކިތައްކިތައް ހިތްތަކެއްގައި މުދަލުގެ ފަޚުރުވެރިކަން ފުރިފައިވޭތޯއެވެ.؟ ހުރިހާ އެއްޗެއް އެއް ވަގުތުކޮޅެއްގެ ތެރޭގައި ގެއްލިދާނެކަން ހަނދާންނައްތާލައިފައިވޭތޯއެވެ؟

އަޅުގަނޑުމެންގެ ޢަމަލުތަކުގެ ފޮތް އަޅުގަނޑުމެންގެ ވާތަށް ލިބެންދެން މަޑުނުކުރާށެވެ. މިހާރުން މިހާރަށް ތައުބާވާށެވެ. އަޅުގަނޑުމެންގެ ވަގުތު، އަޅުގަނޑުމެންގެ މުދަލާއި ފައިސާ، އަޅުގަނޑުމެންގެ ހުނަރުތައް ، މިހުރިހާ އެއްޗެއް އަޅުގަނޑުމެންނަށް މިތަކެތި ދެއްވި ފަރާތަށްޓަކައި ބޭނުންކުރާށެވެ.

﴿46﴾ الْمَالُ وَالْبَنُونَ زِينَةُ الْحَيَاةِ الدُّنْيَا ۖ وَالْبَاقِيَاتُ الصَّالِحَاتُ خَيْرٌ عِندَ رَبِّكَ ثَوَابًا وَخَيْرٌ أَمَلًا
މުދަލާއި ދަރިންނަކީ ދުނިޔޭގެ ދިރިއުޅުމުގެ ޒީނަތްތެރިކަމެވެ. އަދި ދެމިހުންނަނިވި ޞާލިޙު ޢަމަލުތައް، ކަލޭގެފާނުގެ ވެރިރަސްކަލާނގެ ޙަޟްރަތުގައި ޘަވާބުގެގޮތުން މާހެޔޮކަން ބޮޑެވެ. އަދި އެދޭ އެދުމެއްގެ ގޮތުން މާހެޔޮކަން ބޮޑުމެއެވެ.
[ސޫރަތުލް އަލްކަހްފު، 18:46]

"ޔާ ﷲ، އަޅަމެންގެ ހިތްތައް ބޮޑާކަމުން ސަލާމަތްކޮށްދެއްވާނދޭވެ. މުއްސަނދިކަމުގެ ސަބަބުން އިބަރަސްކަލާނގެ ރަޙްމަތަށް އަޅަމެން އަނދިރިވެ ނުދާނދޭވެ. ކޮންމެ ނިޢުމަތަކަށް ޝުކުރުވެރިވާ ބަޔަކު ކަމުގައި އަޅަމެން ލައްވާނދޭވެ. އަދި އިބަރަސްކަލާނގެ އަޅަމެންނަށް ދެއްވާފައިވާ ތަކެތި އިބަރަސްކަލާނގެއާ ގާތްވުމަށް ބޭނުންކުރާ ބަޔަކު ކަމުގައި އަޅަމެން ލައްވާނދޭވެ. ހިތާމަކުރާ މީހުންގެ ތެރެއިން އަޅަމެން ނުލައްވާނދޭވެ. އެހެނަސް ހިތްތައް ތަވާޟުޢުވެރި، އަތްތައް ދީލަތި، އަދި ޢަމަލުތަކުގެ ފޮތް ކަނާތަށް ލިބޭ މީހުންގެ ތެރެއިން އަޅަމެން ލައްވާނދޭވެ."
އާމީން.