އަމާޒަކީ ރާއްޖެ އިސްލާމިކް ފައިނޭންސްގެ ދާއިރާއިން ކުރިއަރާފައިވާ ޤައުމަކަށް ހެދުން: ރައީސް މުޢިއްޒު

ޑިޖިޓަލް އިޤްތިޞާދީ ބަދަލުތަކާއެކު، އިސްލާމިކް ފައިނޭންސްގެ ދާއިރާއިން ކުރިއަރާފައިވާ ޤައުމަކަށް ރާއްޖެ ހެދުމަކީ ސަރުކާރުގެ އަމާޒެއްކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.

ރައީސް މުޢިއްޒު މިފަދައިން ވިދާޅުވީ މިއަދު އިފްތިތާޙުކުރެވުނު މޯލްޑިވްސް އިސްލާމިކް ސޯޝަލް ފައިނޭންސް އިނީޝިއޭޓިވްް (މިސްފީ) ގެ ރަސްމިއްޔާތުގައި ދެއްކެވި ވާހަކަފުޅުގައެވެ.

ރައީސް މުޢިއްޒު ވިދާޅުވީ، ޙަޤީޤީ ތަރައްޤީއަށް ވާސިލުވުމަށްޓަކައި މުޖުތަމަޢުގެ ކޮންމެ ފަރުދަކަށްވެސް އަބުރުވެރިކަމާއި އިޙްތިރާމާއެކު ދިރިއުޅުމުގެ ފުރުސަތު ފަހިވެފައި އޮތުމަކީ މުހިންމު ކަމެއް ކަމުގައެވެ. އަދި މިސްފީގެ ސަބަބުން މާލީ ދާއިރާއާއި މަދަނީ ޖަމްޢިއްޔާތަކާ ދެމެދު ގުޅުން ބަދަހިވެ، މުޖުތަމަޢުގެ ބޭނުންޖެހިފައިވާ ފަރާތްތަކަށް އެހީތެރިވެވޭނެ ހަރުދަނާ ނިޒާމެއް ޤާއިމުކުރެވިގެންދާނެ ކަމަށް އުންމީދުކުރައްވާ ކަމަށްވެސް ވިދާޅުވިއެވެ.

މިކަން ހަޤީޤަތަކަށް ހެދުމަށް ޤާނޫނުތަކާއި ގަވާއިދުތަކަށް ގެންނަންޖެހޭ ބަދަލުތައް ގެނައުމަށް ސަރުކާރުން އޮތީ ތައްޔާރަށް  

ރައީސް މުޢިއްޒު

އަދި ޤައުމެއްގެ ތަރައްޤީ މިންކުރެވެނީ ހަމައެކަނި އިޤްތިޞާދީ ކުރިއެރުމަކުން ނޫންކަމާއި، އެއީ އަބުރުވެރިކަމާއި އިޙްތިރާމާއެކު މުޖުތަމަޢުގައި އުޅުމުގެ ފުރުސަތު އެންމެނަށް ފަހިކޮށްދެވިގެން ޙާޞިލުވާ އަމާޒެއްކަން ޤަބޫލުކުރަންޖެހޭ ކަމަށްވެސް އެމަނިކުފާނު ވިދާޅުވިއެވެ.

President Dr @MMuizzu attends the launching ceremony of the Maldives Islamic Social Finance Initiative. The initiative is part of his Administration’s strategic commitment to promote Islamic Finance in the Maldives and represents a significant milestone in incorporating social… pic.twitter.com/VgmazBOm7r

— The President's Office (@presidencymv) May 7, 2025

ރައީސް މުޢިއްޒު އިތުރަށް ވިދާޅުވީ މިސްފީއަކީ މާލީ ކަންކަމުގައި އެހެން ފަރާތްތަކުގެ ބައިވެރިވުން އިތުރުކޮށް، ޤައުމީ ތަރައްޤީގެ ޕްލޭންގައި ހިމެނޭ މުހިންމު ކަންކަން ހާސިލުކުރުމަށްވެސް އެހީތެރިވެދޭނެ މަސައްކަތެއް ކަމަށެވެ. އަދި މި އިނީޝިއޭޓިވްޓިވްގެ ދަށުން ޞަދަޤާތާއި، ވަޤުފް އަދި އިސްލާމިކް ކްރައުޑް ފަންޑިންގ ފަދަ ވަސީލަތްތައް ބޭނުންކޮށްގެން، އިސްލާމިކް ބޭންކިންގ ނިޒާމުގެ ތެރެއިން މުޖުތަމަޢުގެ ނާޒުކު ފަރާތްތައް މާލީގޮތުން ބާރުވެރިކުރެވި، އިޖުތިމާޢީ ޢަދާލަތު ޤާއިމުކުރެވިގެންދާނެ ކަމަށް އުންމީދުކުރައްވާ ކަމަށްވެސް ރައީސް މުޢިއްޒު ވިދާޅުވިއެވެ.