މަތީ ތަޢުލީމަށް ލޯނު ހޯދުމަށް 1300 އަށްވުރެ ގިނަ ފަރާތުން އެދިއްޖެ

ރާއްޖެއާއި ރާއްޖެއިން ބޭރުން މަތީ ތަޢުލީމު ހާސިލްކުރަން ބޭނުންވާ ފަރާތްތަކަށް ލޯނަށް އެދުމުގެ ފުރުޞަތު ހުޅުވާލުމުން 1300 އަށްވުރެ ގިނަ އެޕްލިކޭޝަން ލިބިފައިވާކަމަށް މަތީ ތަޢުލީމާއި މަސައްކަތްތެރިކަމާ ހުނަރުތައް ތަރައްޤީކުރުމާ ބެހޭ ވުޒާރާއިން ހާމަކޮށްފިއެވެ.

މިދިޔަ މާރިޗު މަހު ހުޅުވާލި މި ފުރުޞަތުގައި 500 ދަރިވަރުންނަށް ލޯނު ދޫކުރުމަށް ހަމަޖެހިފައިވާއިރު، އެޕްލިކޭޝަން ހުށަހެޅުމުގެ މުއްދަތު ހަމަވެފައިވަނީ އޭޕްރީލް މަހުގެ 30 ވަނަ ދުވަހުއެވެ.

ޕީއެސްއެމް ނިއުސްއަށް މަޢުލޫމާތު ދެމުން، މަތީ ތަޢުލީމާ ބެހޭ ވުޒާރާއިން ބުނީ ޖުމްލަ 1338 އެޕްލިކޭޝަން ލިބިފައިވާ ކަމަށެވެ. މީގެ ތެރޭގައި ހިމެނެނީ އަލަށް ހުށަހެޅި 913 އެޕްލިކޭޝަނާއި، މިހާރުވެސް ލޯނުގެ އެހީގައި ކިޔަވަމުންދާ ދަރިވަރުންގެ ތެރެއިން ޓޮޕް-އަޕްގެ ގޮތުގައި ހުށަހެޅި 259 އެޕްލިކޭޝަނެވެ. މިހާތަނަށް 646 އެޕްލިކޭޝަން ރިވިއުކޮށް ނިމިފައިވާ ކަމަށްވެސް އެ ވުޒާރާއިން ހާމަކުރިއެވެ.

މި އަހަރުގެ ލޯނު ސްކީމްގައި ނުކުޅެދުންތެރިކަން ހުންނަ ދަރިވަރުންނަށް ޚާއްޞަ އަހައްމިއްޔަތުކަމެއް ދީފައިވާއިރު، މިހާރުވެސް ކިޔަވަމުންދާ ދަރިވަރުންނަށް އިތުރު ޚަރަދުތަކަށް ލޯނު ނެގުމުގެ ފުރުޞަތު ދީފައިވެއެވެ. މީގެ އިތުރުން، ހިލޭ ޑިގްރީ ކޯސްތަކުގައި ކިޔަވާ ދަރިވަރުންނަށްވެސް އިތުރު ޚަރަދުތަކަށް ލޯނު ނެގު ނެގުމުގެ ފުރުޞަތު ހުޅުވާލާފައިވެއެވެ.

މަތީ ތަޢުލީމާ ބެހޭ ވަޒީރު ޑރ. ޢަލީ ޙައިދަރު އަޙްމަދު ވިދާޅުވި ގޮތުގައި، މި އަހަރުގެ ލޯނު ސްކީމްގެ ދެބައިކުޅަ އެއްބައި ޚާއްޞަކޮށްފައިވަނީ ހައިލީ ޓެކްނިކަލް ދާއިރާތަކަށެވެ. މި ދާއިރާތަކުން ކިޔެވުމަށް އެދޭ ފަރާތްތަކަށް ލޯނަށް ހޮވުމުގެ މަރުޙަލާގައި އިތުރު 10 ޕޮއިންޓް ލިބޭނެ ކަމަށްވެސް އެމަނިކުފާނު ވިދާޅުވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ނިންމެވުމާ އެއްގޮތަށް، މި ލޯނުތަކަކީ "ޝަރީޢާ ކޮމްޕްލަޔަންޓް" ލޯނުތަކަކަށް ހަދާފައިވާތީ، އިންޓްރެސްޓާއި އެޑްމިނިސްޓްރޭޓިވް ފީ ނުނަގާނެ ކަމަށް ވަޒީރު ހާމަކުރެއްވިއެވެ.

މިދިޔަ އަހަރުގެ ނިޔަލަށް 805 މިލިއަނަށްވުރެ ގިނަ ރުފިޔާ ލޯނުގެ ގޮތުގައި ދޫކޮށްފައިވާއިރު، މި އަހަރުގެ ފެބްރުއަރީގެ ނިޔަލަށް 71 މިލިއަން ރުފިޔާ ދޫކޮށްފައިވާކަމަށް ވަޒީރު ހާމަކުރެއްވިއެވެ.

މި ލޯނު ސްކީމަކީ ރާއްޖޭގެ ޒުވާނުންނަށް މަތީ ތަޢުލީމު ހާސިލުކުރުމުގެ ފުރުޞަތު ފަހިކޮށްދިނުމަށް ސަރުކާރުން ކުރިއަށް ގެންދާ މުހިންމު މަސައްކަތެކެވެ. މި ފުރުޞަތުގެ ސަބަބުން ގިނަ ދަރިވަރުންނަށް މާލީ ދަތިކަމެއްނެތި މަތީ ތަޢުލީމު ހާސިލުކުރުމުގެ ފުރުޞަތު ލިބިގެންދާނެއެވެ.

ލޯނު ސްކީމްގެ ދަށުން ހޮވޭ ދަރިވަރުންގެ ނަންތައް އާންމުކުރުމުގެ މަސައްކަތް ކުރިއަށްދާ ކަމަށާއި، ވީ އެންމެ އަވަހަކަށް މި މަޢުލޫމާތު ހާމަކުރާނެ ކަމަށް މަތީ ތަޢުލީމާ ބެހޭ ވުޒާރާއިން ބުނެފައިވެއެވެ. އަދި ހޮވޭ ދަރިވަރުންނަށް ލޯނު ދޫކުރުމުގެ މަސައްކަތް ވެސް ލަސްނުކޮށް ފެށޭނެ ކަމަށް އެ ވުޒާރާއިން ހާމަކޮށްފައިވެއެވެ.

މި ލޯނު ސްކީމްގެ ސަބަބުން ރާއްޖޭގެ އިޤްތިޞާދަށް ބޭނުންވާ ދާއިރާތަކުން ތަމްރީނުވެފައިވާ ޒުވާނުން އިތުރުވެ، ޤައުމުގެ ތަރައްޤީއަށް މުހިންމު ހިއްސާއެއް ކުރާނެ ކަމަށް ބެލެވެއެވެ. ޚާއްޞަކޮށް ހައިލީ ޓެކްނިކަލް ދާއިރާތަކަށް ދެވޭ އިސްކަމުގެ ސަބަބުން، މި ދާއިރާތަކުން ރާއްޖެއަށް ބޭނުންވާ ފަންނީ މީހުން އުފެއްދުމަށް މަގުފަހިވެގެންދާނެއެވެ.