ޚަބަރު
ސީއެފްއެންއޭގެ މަންދޫބުން ހުޅުމާލޭގައި ލަނޑާ ހިއްކުމުގެ މަސައްކަތް ބައްލަވާލައްވައިފި
ސީއެފްއެންއޭގެ މަންދޫބުން ފޮޓޯ: ވުޒާރާ
ދިވެހިރާއްޖެއާއި ޗައިނާއާ ދެމެދު ވެފައިވާ ވިޔަފާރި އެއްބަސްވުމުގެ (އެފްޓީއޭ) ދަށުން ލިބޭ ފުރުޞަތުތައް ބޭނުންކޮށްގެން ޗައިނާއަށް މަސްވެރިކަމުގެ އުފެއްދުންތައް އެކްސްޕޯޓުކުރުން އިތުރުކުރުމުގެ މަސައްކަތް ދިވެހިރާއްޖެއިން ދަނީ ކުރަމުންނެވެ.
ޗައިނާގެ ޗެމްބަރ އޮފް ކޮމާސް އޮފް ފުޑްސްޓަފްސް އެންޑް ނޭޓިވް ޕްރޮޑިއުސް (ސީއެފްއެންއޭ) ގެ ވަފުދެއް 14 އޭޕްރިލްގައި ރާއްޖެއަށް ޒިޔާރަތްކޮށް، އެފްޓީއޭގެ ދަށުން ލިބޭ ފުރުޞަތުތައް ދިރާސާކުރުމުގެ މަސައްކަތް ވަނީ ފަށައިފައެވެ. މި ވަފުދުން ބުރާސްފަތި ދުވަހު ދިވެހި ލަނޑާ އެކްސްޕޯޓަރުންނާ ބައްދަލުކޮށް، ލަނޑާ ހިމެނޭ ގޮތަށް މަހުގެ އުފެއްދުންތައް ޑިއުޓީ ފްރީކޮށް ޗައިނާގެ ބާޒާރަށް ވެއްދުމުގެ ފުރުޞަތުތަކާ ބެހޭގޮތުން މަޝްވަރާކޮށްފައިވެއެވެ.
Representatives from China’s CFNA visited a sea cucumber drying site in Hulhumale' today and met with local exporters to explore opportunities for boosting exports, likely leveraging duty-free access under the China-Maldives Free-Trade Agreement. pic.twitter.com/zZgrIOCfs3
— Ministry of Economic Development and Trade (@MoEDmv) April 18, 2025
މި ބައްދަލުވުމުގައި މިހާރު ދިވެހި އެކްސްޕޯޓަރުން ދިމާވާ ލޮޖިސްޓިކަލް ގޮންޖެހުންތަކާއި، ސީއެފްއެންއޭގެ އެހީތެރިކަމާއެކު އެ ގޮންޖެހުންތައް ހައްލުކުރެވިދާނެ ގޮތްތަކާ ބެހޭގޮތުންވެސް މަޝްވަރާކުރެވުނެވެ.
ސީއެފްއެންއޭގެ ވަފުދުން މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް، މޯލްޑިވްސް ކަސްޓަމްސް ސަރވިސް، މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އަދި މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް (މިފްކޯ) ގެ އިސްވެރިންނާވެސް ބައްދަލުކޮށްފައިވެއެވެ.
2014 ގައި ސޮއިކުރެވި 2017 ގައި ރައްޔިތުންގެ މަޖިލީހުން ފާސްކުރި އެފްޓީއޭގެ ތަންފީޒު 2018 ގައި ވަނީ ހުއްޓާލާފައެވެ. ނަމަވެސް 2023 ގެ ނޮވެމްބަރުގައި ރައީސްކަމާއި ހަވާލުވެވަޑައިގެން ރައީސުލްޖުމްހޫރިއްޔާ ޑރ. މުޢިއްޒުގެ ސަރުކާރުން އެފްޓީއޭ އަލުން ތަންފީޒުކުރުމަށް މަސައްކަތްކޮށް، 2024 ގެ ޖަނަވަރީ 1 އިން ފެށިގެން އެއްބަސްވުން ވަނީ ފުރިހަމައަށް ތަންފީޒުކުރަން ފަށާފައެވެ.
އެފްޓީއޭގެ ދަށުން ދިވެހިރާއްޖޭގައި އުފައްދާ އަދި ޕްރޮސެސްކުރާ ހުރިހާ މަހުގެ އުފެއްދުމެއް ޗައިނާއަށް އެކްސްޕޯޓުކުރެވޭނީ ސުމެއްގެ ޓެރިފްގައެވެ. މިކަމުގެ ސަބަބުން ދިވެހިރާއްޖޭގެ އެންމެ ބޮޑު އެކްސްޕޯޓު ކޮމޮޑިޓީ ކަމުގައިވާ މަހުގެ އުފެއްދުންތަކުގެ އެކްސްޕޯޓު ވިޔަފާރި އިތުރަށް ފުޅާވެގެންދާނެއެވެ.
