ޕެރޭޑް ނިމެންދެން ބައެއް މަގުތަކުގައި އުޅަނދު ޕާކު ނުކުރުމަށް އިލްތިމާސްކޮށްފި

ދިިވެހި ސިފައިންގެ އަހަރީ ދުވަހާ ގުޅިގެން މިއަދު ހަވީރު ބޭއްވުމަށް ހަމަޖެހިފައިވާ ޕެރޭޑަށް ތައްޔާރުވުމުގެ ގޮތުން، ޕެރޭޑް ރޫޓުގައި ޕާކުކޮށްފައިވާ އުޅަނދުތައް ނެގުމުގެ މަސައްކަތް ފުލުހުން ވަނީ ފަށާފައެވެ. މި ޕެރޭޑް ނިމެންދެން ޗާޓުގައި ފާހަގަކޮށްފައިވާ މަގުތަކުގައި އުޅަނދު ޕާކު ނުކުރުމަށް އާންމުންނަށް އިލްތިމާސްކޮށްފައިވެއެވެ.

ސިފައިންގެ ފަރާތުން މަޢުލޫމާތު ދެއްވާފައިވާ ގޮތުގައި، މިއަދު ހަވީރު 16:15 ގައި ބަންޑާރަކޮށިން ފެށިގެން މަގުމަތީ ހިނގާލުމެއް ކުރިއަށްދާނެއެވެ. މި ހިނގާލުމުގައި ލަޝްކަރު ރައީސުލްޖުމްހޫރިއްޔާގެ އޮފީސް ކައިރިއަށް އައުމުން، ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ، ޑޮކްޓަރ މުޙައްމަދު މުޢިއްޒު މި ހިނގާލުން ޝަރަފުވެރިކޮށްދެއްވާނެއެވެ.

ދިވެހި ސިފައިންގެ އަހަރީ ދުވަހާ ގުޅިގެން މިއަދު ހަވީރު ޕެރޭޑް ބޭއްވުމަށް ހަމަޖެހިފައިވާ ރޫޓުގައި ޕާކް ކޮށްފައިވާ އުޅަނދުތައް ނެގުމުގެ މަސައްކަތް ފުލުހުން ދަނީ ކުރަމުން. މިޕެރޭޑް ނިމެންދެން ޗާޓުގައި ފާހަގަކޮށްފައިވާ މަގުތަކުގައި ޕާކު ނުކުރުމަށް ދަންނަވަން. pic.twitter.com/Yx7aG0DcxG

— Maldives Police (@PoliceMv) April 19, 2025

މާލޭގެ ކަނޑައެޅިފައިވާ މަގުތަކުން ކުރިއަށްދާ މި ހިނގާލުމުގައި ފަސް ސަރަހައްދެއްގައި ލަޝްކަރު މަޑުކުރާނެ ކަމަށް ސިފައިން ވިދާޅުވެފައިވެއެވެ. އެއީ އަމީރު އަޙްމަދު މަގު، ރައީސުލްޖުމްހޫރިއްޔާގެ އޮފީސް ކުރިމަތި، ސޯސަން މަގު ދިވެހިބަހުގެ އެކެޑަމީ ކުރިމަތި، މަޖީދީމަގާއި ޗާންދަނީމަގު ހަތަރު އަނގޮޅި، މަޖީދީމަގު މިލިޔަން ބުކްޝޮޕް ކުރިމަތި އަދި ބޮޑުތަކުރުފާނުމަގު ކަޅުތުއްކަލާކޮށި ހުޅަނގު އުތުރު ކަންމައްޗެވެ. ކޮންމެ ހުއްޓުމެއްގައިވެސް އަސްކަރީ ބޭންޑުގެ ރީތި ރާގުތައް އިވިގެންދާނެ ކަމަށް ސިފައިން ވަނީ ހާމަކުރައްވާފައެވެ.